പെപ്സി, കൊക്കകോള, പിസ്സ, ബർഗർ കമ്പനികള്‍ക്ക് വെല്ലുവിളി, സ്കൂളുകൾക്ക് സമീപം ജങ്ക് ഫുഡ് വിൽപനയ്ക്ക് പിടിവീഴും

കുട്ടികളിൽ വർദ്ധിച്ചുവരുന്ന അമിതവണ്ണവും (Obesity) ആരോഗ്യപ്രശ്നങ്ങളും തടയുന്നതിനായി സ്കൂളുകൾക്ക് 50 മീറ്റർ ചുറ്റളവിൽ ജങ്ക് ഫുഡുകളുടെ വിൽപന നിയന്ത്രിക്കാൻ ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) നിയമങ്ങൾ കർശനമാക്കാന്‍ ഒരുങ്ങുന്നു. കൊഴുപ്പ്, പഞ്ചസാര, ഉപ്പ് എന്നിവ ഉയർന്ന അളവിലുള്ള (HFSS, High in Fat, Salt and Sugar) ശീതളപാനീയങ്ങൾ, ചിപ്സുകൾ, പിസ്സ, ബർഗർ തുടങ്ങിയവയുടെ വിൽപന സ്കൂൾ പരിസരങ്ങളിൽ തടയുകയാണ് ഈ നീക്കത്തിന്റെ പ്രധാന ലക്ഷ്യമെന്ന് റോയിട്ടേഴ്‌സ് റിപ്പോര്‍ട്ട് ചെയ്യുന്നു.

വർദ്ധിച്ചുവരുന്ന ബാല്യകാല അമിതവണ്ണം

വേൾഡ് ഒബേസിറ്റി ഫെഡറേഷൻ ഡാറ്റ പ്രകാരം ഇന്ത്യയിൽ 5 മുതൽ 19 വയസ് വരെയുള്ള കുട്ടികളിൽ അമിതവണ്ണമുള്ളവരുടെ എണ്ണം 2015-ലെ 2.8 കോടിയിൽ നിന്ന് 2025-ഓടെ 4.1 കോടിയായി ഉയർന്നു. ഇത് 2040-ഓടെ 5.6 കോടിയിലേക്ക് എത്തുമെന്നാണ് കണക്കാക്കപ്പെടുന്നത്. കുട്ടികളിൽ ചെറുപ്പത്തിലേ തന്നെ ആരോഗ്യകരമായ ഭക്ഷണശീലങ്ങൾ വളർത്തിയെടുക്കുകയാണ് ഈ 'സേഫ് ഫുഡ്' പദ്ധതിയിലൂടെ എഫ്.എസ്.എസ്.എ.ഐ ലക്ഷ്യമിടുന്നത്.

ഇന്ത്യയിലെ 15 ലക്ഷം സ്‌കൂളുകള്‍ക്ക് സമീപമുള്ള കുടുംബം നടത്തുന്ന കടകൾ, റെസ്റ്റോറന്റുകൾ, പഞ്ചസാര ചേർത്ത സോഫ്റ്റ് ഡ്രിങ്കുകൾ, ഉപ്പിട്ട ചിപ്‌സ് എന്നിവ മുതൽ എണ്ണമയമുള്ള സമൂസകൾ, കൊഴുപ്പുള്ള പിസ്സകൾ അല്ലെങ്കിൽ ബർഗറുകൾ വരെ വിൽക്കുന്ന ഭക്ഷണശാലകളെ ഈ നിയമം ബാധിക്കുമെന്നാണ് കരുതുന്നത്. അതേസമയം ഇത് ബിസിനസുകളെ വലിയ തോതിൽ ബാധിക്കില്ലെന്നും കട ഉടമകൾക്ക് HFSS അടങ്ങിയിട്ടില്ലാത്ത ഭക്ഷണങ്ങൾ വിൽക്കാൻ കഴിയുമെന്നുമാണ് അധികൃതരുടെ വിലയിരുത്തല്‍.

ആശങ്കയുമായി വ്യാപാരികള്‍

ഈ പുതിയ നിയന്ത്രണം സ്കൂളുകൾക്ക് സമീപമുള്ള കടയുടമകൾക്കും പെപ്സികോ, നെസ്ലെ, കൊക്കകോള തുടങ്ങിയ ബഹുരാഷ്ട്ര കമ്പനികൾക്കും വലിയ വെല്ലുവിളിയാകും. വിൽപനയിൽ മൂന്നിലൊന്ന് വരെ കുറവുണ്ടാകുമെന്ന് ചെറുകിട കച്ചവടക്കാർ ഭയപ്പെടുന്നു. അതേസമയം മഹാരാഷ്ട്ര പോലുള്ള സംസ്ഥാനങ്ങൾ ഇതിനകം സ്കൂളുകൾക്ക് 50 മീറ്റർ ചുറ്റളവിൽ ഇത്തരം ഭക്ഷണങ്ങൾ വിൽക്കുന്നതിനെതിരെ കർശന പരിശോധന ആരംഭിക്കുകയും വിൽപന നിർത്തിവെക്കാൻ ഉത്തരവിടുകയും ചെയ്തിട്ടുണ്ട്. 50 മീറ്റർ നിയന്ത്രണത്തിന്റെ അടിസ്ഥാന ചട്ടങ്ങൾ 2020 ൽ തന്നെ FSSAI നോട്ടിഫൈ ചെയ്തിരുന്നു; ഇപ്പോഴത്തെ നീക്കം അവ കൂടുതൽ ശക്തമാക്കാനും പ്രായോഗികമായി നടപ്പാക്കാനും ലക്ഷ്യമിടുന്നതാണ്.

ചെറുപ്പത്തിൽ തന്നെയുള്ള അനാവശ്യ ഭക്ഷണശീലങ്ങളിൽ നിന്ന് കുട്ടികളെ പിന്തിരിപ്പിക്കാനും, കമ്പനികളെ കൂടുതൽ പോഷകസമൃദ്ധമായ ഉൽപ്പന്നങ്ങൾ നിർമ്മിക്കാൻ പ്രേരിപ്പിക്കാനും ഈ നീക്കം വഴി സാധിക്കുമെന്നാണ് വിലയിരുത്തപ്പെടുന്നത്.