സ്വര്‍ണം വാങ്ങല്‍ ₹10 ലക്ഷം കടന്നാല്‍ ഇനി ഇ.ഡി വന്നേക്കും, പിന്നാലെ ഇന്റലിജന്‍സും
സ്വര്‍ണക്കടകളും ഉപയോക്താക്കളും പണംതിരിമറി തടയല്‍ നിയമത്തിന് കീഴില്‍; സംശയനിഴലില്‍ നിറുത്തുന്നുവെന്ന് വ്യാപാരികള്‍
Image : Canva
സ്വര്‍ണാഭരണ വിപണിക്കുമേല്‍ കൂടുതല്‍ പിടിമുറുക്കി കേന്ദ്രം. സ്വര്‍ണാഭരണ മേഖലയെ പണം തിരിമറി തടയല്‍ നിയമത്തിന് (പി.എം.എല്‍.എ/PMLA) കീഴിലാക്കി 2020 ഡിസംബര്‍ 28ന് ധനമന്ത്രാലയം നോട്ടിഫിക്കേഷന്‍ ഇറക്കിയിരുന്നു. ഒന്നോ അതിലധികമോ തവണയായി ഉപയോക്താവുമായി 10 ലക്ഷം രൂപയ്ക്കുമേല്‍ വില്‍പന ഇടപാട് നടന്നാല്‍ അക്കാര്യം അറിയിക്കണമെന്ന് കാട്ടി ഇതിന് തൊട്ടുപിന്നാലെ സ്വര്‍ണ വ്യാപാരികള്‍ക്ക് എന്‍ഫോഴ്‌സ്‌മെന്റ് ഡയറക്ടറേറ്റ് (ഇ.ഡി) സര്‍ക്കുലറും അയച്ചിരുന്നു.
ലക്ഷ്യം തീവ്രവാദ ഫണ്ടിംഗും കള്ളപ്പണവും തടയല്‍
തീവ്രവാദ ഫണ്ടിംഗും കള്ളപ്പണവും തടയാനാണ് നടപടിയെന്ന് സര്‍ക്കുലറില്‍ പറയുന്നു. ഇ.ഡിക്കും എഫ്.ഐ.യുവിനും നല്‍കാനുള്ള വിവരങ്ങള്‍ വ്യാപാരികള്‍ രേഖപ്പെടുത്തി സൂക്ഷിക്കണം. തുടർന്ന് 7 ദിവസത്തിനകം വിവരം ബന്ധപ്പെട്ട അന്വേഷണ ഏജൻ‌സിക്ക് കൈമാറണം.
കഴിഞ്ഞ സാമ്പത്തിക വർഷം (2022-23) 500 കോടി രൂപയ്ക്കുമേല്‍ വിറ്റുവരവുണ്ടായിരുന്ന സ്വർണാഭരണ വ്യാപാരികൾ ഇതിനായി നോഡല്‍ ഓഫീസറെ നിയമിക്കണം. 500 കോടി രൂപയ്ക്ക് താഴെയുള്ളവര്‍ പ്രതിനിധാനം ചെയ്യുന്ന വ്യാപാര അസോസിയേഷന്‍/സംഘടന വഴിയും നോഡല്‍ ഓഫീസറെ നിയമിക്കണം. ചട്ടം പാലിച്ചില്ലെങ്കില്‍ ഒരുലക്ഷം രൂപവരെയാണ് പിഴ.
ആരെയൊക്കെ സംശയിക്കാം
സംശയകരമായ പെരുമാറ്റം, വിദേശ കറന്‍സിയില്‍ പണമടയ്ക്കാമെന്ന് പറയുന്ന ഉപയോക്താക്കള്‍, ഒന്നിലധികം അക്കൗണ്ടുകളില്‍ നിന്ന് ആര്‍.ടി.ജി.എസ്., യു.പി.ഐ, എന്‍.ഇ.എഫ്.ടി എന്നിവ വഴി പണം അടയ്ക്കാമെന്ന് പറയുന്നവര്‍, ഗോള്‍ഡ് പര്‍ച്ചേസ് സ്‌കീം അക്കൗണ്ടുകളിലേക്ക് വിദേശത്ത് നിന്നും മറ്റും സംശയകരമെന്ന് തോന്നുന്നവിധം വന്‍ തുക എത്തുമ്പോള്‍, യു.എ.പി.എ (Unlawful Activities Prevention Act) അടക്കം ക്രിമിനല്‍ പട്ടികയില്‍ ഉള്‍പ്പെടുന്നവര്‍ എന്നിങ്ങനെയുള്ള ഉപയോക്താക്കളുടെ വിവരം കൈമാറാനാണ് നിര്‍ദേശം.
റെഡ് ഫ്ലാഗ് (Red Flag Indicators /RFI) അഥവാ 'ചെങ്കൊടി' സൂചകങ്ങൾ എന്ന് സർക്കുലറിൽ വിശേഷിപ്പിച്ചിട്ടുള്ള സ്വ‌ർണ, അമൂല്യരത്നാഭരണ വ്യാപാര മേഖലയിലുള്ളവരാണ് വിവരം രേഖപ്പെടുത്തുകയും ഇ.ഡിക്കും എഫ്.ഐ.യുവിനും നോഡൽ ഓഫീസ‌‌‌ർ മുഖേന കൈമാറുകയും ചെയ്യേണ്ടത്.
Assistant Editor