ഇന്ത്യയുടെ വ്യവസായ വളര്ച്ചയുടെ നട്ടെല്ലായി മാറുകയാണ് സ്റ്റീല് മേഖല. ദേശീയ പാതകള്, അതിവേഗ റെയില് പാതകള്, തുറമുഖങ്ങള്, വിമാനത്താവളങ്ങള്, വ്യവസായ ഇടനാഴികള്, സ്മാര്ട്ട് നഗരങ്ങള്, ഊര്ജ പദ്ധതികള് തുടങ്ങി രാജ്യത്തിന്റെ അടിസ്ഥാന സൗകര്യ വികസനത്തിന് ആവശ്യമായ പ്രധാന അസംസ്കൃത വസ്തുവാണ് സ്റ്റീല്. ഇതോടെ രാജ്യത്തെ പ്രമുഖ സ്റ്റീല് കമ്പനികള് ഉല്പ്പാദന ശേഷി വന്തോതില് വര്ധിപ്പിക്കുന്ന മത്സരത്തിലാണ്.
കേന്ദ്ര സ്റ്റീല് മന്ത്രാലയത്തിന്റെ കണക്കുകള് പ്രകാരം 2024-25 സാമ്പത്തിക വര്ഷത്തില് ഇന്ത്യയുടെ മൊത്തം ക്രൂഡ് സ്റ്റീല് ഉല്പ്പാദന ശേഷി 20.03 കോടി ടണ്ണിലെത്തി. ഇതേ കാലയളവില് 15.21 കോടി ടണ് സ്റ്റീല് ഉല്പ്പാദിപ്പിക്കുകയും ചെയ്തു. ദേശീയ സ്റ്റീല് നയം അനുസരിച്ച് 2030-31ഓടെ 30 കോടി ടണ് ഉല്പ്പാദന ശേഷിയും 25.5 കോടി ടണ് വാര്ഷിക ഉല്പ്പാദനവുമാണ് ഇന്ത്യ ലക്ഷ്യമിടുന്നത്.
സ്ഥാപിത ഉല്പ്പാദന ശേഷിയുടെ അടിസ്ഥാനത്തില് രാജ്യത്തെ ഏറ്റവും വലിയ സ്റ്റീല് നിര്മാതാവ് ജെ.എസ്.ഡബ്ല്യു സ്റ്റീലാണ്. നിലവില് ഏകദേശം 3.57 കോടി ടണ് വാര്ഷിക ശേഷിയുള്ള കമ്പനി അടുത്ത അഞ്ച് വര്ഷത്തിനുള്ളില് അത് 5 കോടി ടണ്ണായി ഉയര്ത്താനുള്ള പദ്ധതിയിലാണ്. കര്ണാടകയിലെ വിജയനഗര് പ്ലാന്റ് രാജ്യത്തെ ഏറ്റവും വലിയ ഒറ്റ സ്റ്റീല് നിര്മാണ കേന്ദ്രങ്ങളിലൊന്നാണ്.
രണ്ടാം സ്ഥാനത്തുള്ള ടാറ്റ സ്റ്റീലിന് ഏകദേശം 2.61 കോടി ടണ് വാര്ഷിക ശേഷിയുണ്ട്. ഒഡീഷയിലെ കലിംഗനഗര് പ്ലാന്റിന്റെ വികസനം പൂര്ത്തിയാകുന്നതോടെ കമ്പനിയുടെ ഉല്പ്പാദന ശേഷി കൂടുതല് ഉയരും. ഇന്ത്യയുടെ കിഴക്കന് മേഖലയിലെ ഏറ്റവും വലിയ വ്യവസായ നിക്ഷേപ പദ്ധതികളിലൊന്നായാണ് ഈ വികസനം വിലയിരുത്തപ്പെടുന്നത്.
രാജ്യത്തെ ഏറ്റവും വലിയ പൊതുമേഖല സ്റ്റീല് കമ്പനിയായ സ്റ്റീല് അതോറിറ്റി ഓഫ് ഇന്ത്യ ലിമിറ്റഡ് മൂന്നാം സ്ഥാനത്താണ്. ഏകദേശം 2.03 കോടി ടണ് ശേഷിയുള്ള കമ്പനി 2030ഓടെ 3.5 കോടി ടണ്ണിലധികം ശേഷിയിലെത്താനാണ് ലക്ഷ്യമിടുന്നത്. റെയില്വേയ്ക്ക് ആവശ്യമായ റെയില്പാളങ്ങളും കട്ടിയുള്ള സ്റ്റീല് ഉല്പ്പന്നങ്ങളും നല്കുന്നതില് സെയിലിന് പ്രധാന പങ്കുണ്ട്.
ആര്സലര് മിത്തലും നിപ്പോണ് സ്റ്റീലും ചേര്ന്നുള്ള സംയുക്ത സംരംഭമായ എ.എം./എന്.എസ് ഇന്ത്യ, ജിന്ഡാല് സ്റ്റീല് ആന്ഡ് പവര്, വിശാഖ സ്റ്റീല്, ശ്യാം മെറ്റാലിക്സ്, ജിന്ഡാല് സ്റ്റെയിന്ലസ്, എ.പി.എല് അപ്പോളോ, വേദാന്ത തുടങ്ങിയ കമ്പനികളും വന്തോതില് വികസന പദ്ധതികള് പ്രഖ്യാപിച്ചിട്ടുണ്ട്.
ഗുജറാത്തിലെ ഹസീര പ്ലാന്റില് ആയിരക്കണക്കിന് കോടി രൂപയുടെ നിക്ഷേപമാണ് എ.എം./എന്.എസ് ഇന്ത്യ നടത്തുന്നത്. ജിന്ഡാല് സ്റ്റീല് ആന്ഡ് പവര് ഒഡീഷയിലെ അങ്കുള് പ്ലാന്റ് വികസിപ്പിക്കുമ്പോള്, ജിന്ഡാല് സ്റ്റെയിന്ലസ് രാജ്യത്തെ സ്റ്റെയിന്ലസ് സ്റ്റീല് ഉല്പ്പാദനത്തില് ഒന്നാം സ്ഥാനത്ത് തുടരുന്നു.
'മേക്ക് ഇന് ഇന്ത്യ', ദേശീയ അടിസ്ഥാന സൗകര്യ പദ്ധതി, വ്യവസായ ഇടനാഴികള്, പ്രതിരോധ ഉല്പ്പാദനം, പുനരുപയോഗ ഊര്ജ പദ്ധതികള് എന്നിവയുടെ വളര്ച്ചയാണ് സ്റ്റീലിന്റെ ആവശ്യകത ഉയര്ത്തുന്നത്. ലോകത്തിലെ രണ്ടാമത്തെ വലിയ സ്റ്റീല് ഉല്പ്പാദക രാജ്യമാണ് ഇപ്പോള് ഇന്ത്യ. അടുത്ത ഏതാനും വര്ഷങ്ങള്ക്കുള്ളില് ചൈനയ്ക്ക് പിന്നാലെ ആഗോള സ്റ്റീല് വ്യവസായത്തിലെ ഏറ്റവും വലിയ വളര്ച്ചാ കേന്ദ്രമായി ഇന്ത്യ മാറുമെന്നാണ് വിലയിരുത്തല്.
അതേസമയം, ചൈനയില് നിന്നുള്ള വിലകുറഞ്ഞ ഇറക്കുമതി, അസംസ്കൃത വസ്തുക്കളുടെ വിലയിലെ ചാഞ്ചാട്ടം, കാര്ബണ് പുറന്തള്ളല് നിയന്ത്രണങ്ങള്, ഹരിത സ്റ്റീല് ഉല്പ്പാദനത്തിലേക്കുള്ള മാറ്റം എന്നിവ കമ്പനികള്ക്ക് വെല്ലുവിളിയാകുന്നു. എന്നിരുന്നാലും, ആഭ്യന്തര ആവശ്യകതയുടെ ശക്തമായ വളര്ച്ച ഇന്ത്യയുടെ സ്റ്റീല് മേഖലയെ മുന്നോട്ട് നയിക്കുമെന്നാണ് വിദഗ്ധരുടെ വിലയിരുത്തല്.
ഇന്ത്യയുടെ അടുത്ത വ്യവസായ കുതിപ്പിന്റെ അടിത്തറ സ്റ്റീലായിരിക്കുമെന്ന് ഉറപ്പാണ്. രാജ്യത്തെ അടിസ്ഥാന സൗകര്യ വികസനവും ഉല്പ്പാദന മേഖലയിലെ വളര്ച്ചയും മുന്നോട്ട് പോകുമ്പോള്, സ്റ്റീല് കമ്പനികളുടെ പങ്ക് കൂടുതല് നിര്ണായകമാകാനാണ് സാധ്യത.
Read DhanamOnline in English
Subscribe to Dhanam Magazine
