ഇന്ത്യയിലെ മുൻനിര സോഫ്റ്റ്‌വെയർ, എൻജിനീയറിംഗ് കമ്പനികളിൽ കഴിഞ്ഞ ഒരു വർഷത്തിനിടെ തൊഴിലവസരങ്ങളിൽ വൻ കുറവ്. ടി.സി.എസ് (TCS), ഇൻഫോസിസ്, എച്ച്.സി.എൽ ടെക്, വിപ്രോ, ടെക് മഹീന്ദ്ര, എൽ.ടി.ഐ മൈൻഡ്‌ട്രീ എന്നീ ആറ് പ്രമുഖ കമ്പനികളിലായി 92,000 ജീവനക്കാരാണ് ജോലി ഉപേക്ഷിച്ചു പോയത്. എന്നാൽ ഒഴിവുകളിലേക്ക് പുതിയ ആൾക്കാരെ നിയമിക്കുന്നത് കുറഞ്ഞതോടെ, ആകെ തൊഴിൽ നിയമനത്തിൽ (net intake) 24,422 എണ്ണത്തിന്റെ കുറവുണ്ടായതായി സ്റ്റാഫിംഗ് സ്ഥാപനമായ എക്‌സ്‌ഫെനോയുടെ (Xpheno) ഡാറ്റ വ്യക്തമാക്കുന്നു. ഇതോടെ കമ്പനികളുടെ ആകെ ജീവനക്കാരുടെ എണ്ണം 3 ശതമാനം കുറഞ്ഞ് 797,722 ആയി മാറിയിട്ടുണ്ട്.
നിര്‍മ്മിത ബുദ്ധിയുടെ (AI) കടന്നുവരവ്: ആപ്ലിക്കേഷൻ മെയ്ന്റനൻസ്, മാനുവൽ ടെസ്റ്റിംഗ്, ഇൻഫ്രാസ്ട്രക്ചർ സപ്പോർട്ട് തുടങ്ങിയ പരമ്പരാഗത ഐടി ജോലികൾ എഐ ഏറ്റെടുക്കുന്നതാണ് പ്രധാന കാരണം. 5 മുതൽ 12 വർഷം വരെ പരിചയസമ്പത്തുള്ള ജീവനക്കാരെയാണ് ഇത് കൂടുതൽ ബാധിച്ചത്.
വർക്ക്ഫോഴ്സ് ഒപ്റ്റിമൈസേഷൻ: കമ്പനികൾ നിലവിലുള്ള ജീവനക്കാർക്ക് എഐ പരിശീലനം നൽകി കാര്യക്ഷമത വർദ്ധിപ്പിക്കുന്നതിനോടൊപ്പം പ്രോജക്ടുകളിൽ ഉൾപ്പെടാത്ത 'ബെഞ്ച്' (bench) ജീവനക്കാരുടെ എണ്ണം കുറയ്ക്കുകയും ചെയ്യുന്നു.
പുതിയ അവസരങ്ങളും വെല്ലുവിളികളും: പരമ്പരാഗത ജോലികൾ കുറയുമ്പോഴും എഐ, ക്ലൗഡ്, സൈബർ സെക്യൂരിറ്റി, സ്‌പെഷ്യലൈസ്ഡ് എൻജിനീയറിംഗ് മേഖലകളിൽ പ്രതിവർഷം 16 ശതമാനം വളർച്ച ഉണ്ടാകുന്നുണ്ട്. എന്നാൽ പരമ്പരാഗത മേഖലകളിൽ നിന്ന് ജോലി നഷ്ടപ്പെടുന്നവർക്ക് ഇത്തരം പുതിയ സാങ്കേതികവിദ്യകളിൽ ആവശ്യത്തിന് വൈദഗ്ധ്യമില്ലാത്തത് വലിയൊരു വെല്ലുവിളിയാണ്.
അതേസമയം, സെപ്റ്റംബർ പാദത്തിൽ ടി.സി.എസ് (4,258), എച്ച്.സി.എൽ ടെക് (6,450), ടെക് മഹീന്ദ്ര (5,446) എന്നീ കമ്പനികൾ പുതിയ ജീവനക്കാരെ കൂട്ടിച്ചേർത്തപ്പോൾ വിപ്രോയിൽ 6,716 ജീവനക്കാരെ കുറച്ചു. വ്യവസായ മേഖലയിൽ വളർച്ച തിരിച്ചെത്തുന്നതോടെ നിയമനങ്ങളിൽ പുരോഗതിയുണ്ടാകുമെന്നാണ് വിലയിരുത്തൽ.
