ഫാര്‍മ, ഓട്ടോ ഘടകങ്ങള്‍, ചെമ്പ്, അലുമിനിയം, ട്രംപിന്റെ താരിഫ് ആഘാതം ഏല്‍ക്കാത്ത മേഖലകള്‍ ഇവയാണ്; പക്ഷെ എത്ര നാള്‍?

ഇന്ത്യന്‍ ഉല്‍പ്പന്നങ്ങള്‍ക്ക് 25 ശതമാനം വരെ ഇറക്കുമതി ചുങ്കം ഏര്‍പ്പെടുത്തിയിരിക്കുകയാണ് യു.എസ് പ്രസിഡന്റ് ഡൊണള്‍ഡ് ട്രംപ്. എന്നാല്‍ ഫാർമസ്യൂട്ടിക്കൽസ്, ഓട്ടോ ഘടകങ്ങൾ, ചെമ്പ്, ലോഹങ്ങൾ തുടങ്ങിയ മേഖലകളിലെ ഇന്ത്യൻ കയറ്റുമതിയെ പുതുതായി വികസിപ്പിച്ച താരിഫ് വ്യവസ്ഥയിൽ നിന്ന് ഒഴിവാക്കുമെന്ന് വ്യക്തത വരുത്തിയിരിക്കുകയാണ് ട്രംപ് ഭരണകൂടം. അതേസമയം തുണിത്തരങ്ങൾ, ഇലക്ട്രോണിക്സ്, യന്ത്രങ്ങൾ, രാസവസ്തുക്കൾ, മറ്റ് വിപണി വസ്തുക്കൾ തുടങ്ങിയവയ്ക്ക് കൂടിയ താരിഫ് നിരക്ക് നല്‍കേണ്ടി വരും.

മറ്റു രാജ്യങ്ങളുമായി ദീർഘകാലമായി നിലനിൽക്കുന്ന യുഎസ് വ്യാപാര കമ്മി അമേരിക്കൻ ഉൽപ്പാദനത്തെ ദുർബലപ്പെടുത്തുന്നതായും വിപണിയില്‍ അപകടസാധ്യതകൾ സൃഷ്ടിക്കുന്നതായുമാണ് ട്രംപ് വ്യക്തമാക്കുന്നത്. 2024 ൽ യുഎസുമായി 4570 കോടി ഡോളറിന്റെ ചരക്ക് വ്യാപാര കമ്മിയാണ് ഇന്ത്യക്കുളളത്.

പുതുക്കിയ താരിഫ് പട്ടികയില്‍ നിന്ന് നിലവില്‍ ഒഴിവാക്കപ്പെടുന്ന മേഖലകളാണ് ഇവിടെ പരിശോധിക്കുന്നത്.

ഫാർമസ്യൂട്ടിക്കൽസ്: 2024 ൽ ഇന്ത്യ ഏകദേശം 900 കോടി ഡോളറിന്റെ ഔഷധ ഉൽപ്പന്നങ്ങൾ യുഎസിലേക്ക് കയറ്റുമതി ചെയ്തതായി റോയിട്ടേഴ്‌സ് റിപ്പോർട്ട് ചെയ്യുന്നു. ഈ കയറ്റുമതികൾ പ്രധാനമായും ജനറിക് മരുന്നുകളാണ്. യു.എസിലെ ജനറിക്‌ മരുന്ന് വിപണിയിൽ ഇന്ത്യയുടെ ആധിപത്യം നിലനിർത്താന്‍ സഹായിക്കുന്നതാണ് താരിഫില്‍ നിന്ന് ഒഴിവാക്കിയ നടപടി.

ഓട്ടോ കമ്പോണന്റ്സ്: 2025 സാമ്പത്തിക വർഷത്തിൽ 735 കോടി ഡോളറിന്റെ കയറ്റുമതിയാണ് ഈ മേഖലയില്‍ നടന്നതെന്ന് ഓട്ടോമോട്ടീവ് കമ്പോണന്റ് മാനുഫാക്ചറേഴ്സ് അസോസിയേഷൻ ഓഫ് ഇന്ത്യ വ്യക്തമാക്കുന്നു. തത്തുല്യ ഇറക്കുമതി ചുങ്കത്തില്‍ (reciprocal tariffs) നിന്ന് ഒഴിവാക്കപ്പെട്ട മറ്റൊരു പ്രധാന മേഖലയാണിത്. അതേസമയം സെക്ഷൻ 232 താരിഫുകൾ പ്രകാരം 25 ശതമാനം തീരുവ ഇപ്പോഴും ഈ മേഖലയില്‍ ബാധകമാണ്. ദേശീയ സുരക്ഷയ്ക്ക് ഭീഷണിയായി കണക്കാക്കുന്ന ഇറക്കുമതികൾക്ക് തീരുവ ചുമത്താൻ പ്രസിഡന്റിന് അധികാരം നൽകുന്ന വകുപ്പാണ് 232.

ചെമ്പ്: 2024 ൽ ഇന്ത്യ ഏകദേശം 13,000 ടൺ ചെമ്പാണ് യുഎസിലേക്ക് കയറ്റുമതി ചെയ്തത്. മറ്റ് രാജ്യങ്ങളിൽ നിന്നുള്ള ചെമ്പ് ഇറക്കുമതിക്ക് 50 ശതമാനം തീരുവ പുതിയതായി ഏർപ്പെടുത്തിയിട്ടുണ്ടെങ്കിലും, ഇന്ത്യൻ ചെമ്പ് കയറ്റുമതി ഒഴിവാക്കിയിരിക്കുന്നു.

ലോഹങ്ങൾ (ഇരുമ്പ്, അലുമിനിയം മുതലായവ): യുഎസിനെ പരസ്പര ഇറക്കുമതി താരിഫ് ചുമത്താൻ അനുവദിക്കുന്നതാണ് 2025 ഏപ്രിൽ 2 ന് ട്രംപ് പുറപ്പെടുവിച്ച എക്സിക്യൂട്ടീവ് ഓർഡർ 14257. ഈ മേഖല EO 14257 ന്റെ ഇളവ് പട്ടികയിൽ തുടർന്നും സംരക്ഷിക്കപ്പെടുന്നു. എന്നിരുന്നാലും, ഓട്ടോ ഭാഗങ്ങൾ പോലെ ഇവയും നിലവിലുള്ള സെക്ഷൻ 232 താരിഫുകൾക്ക് വിധേയമാണ്.

അതേസമയം മേഖലകള്‍ തിരിച്ചുളള താരിഫുകൾ ഇപ്പോഴും പരിഗണനയിലാണെന്നാണ് വൈറ്റ് ഹൗസ് വ്യക്തമാക്കുന്നത്. ഇന്ത്യയില്‍ നിന്നുളള ഫാർമ, ഓട്ടോ പാർട്‌സ് ഉല്‍പ്പന്നങ്ങള്‍ക്ക് പിന്നീട് മേഖലാ താരിഫുകൾ പ്രഖ്യാപിച്ചാല്‍ അത്ഭുതപ്പെടാനാകില്ല. വസ്ത്രങ്ങൾ, രത്നങ്ങൾ, എഞ്ചിനീയറിംഗ് ഉൽപ്പന്നങ്ങൾ, ഇലക്ട്രോണിക്സ് തുടങ്ങിയ മറ്റ് കയറ്റുമതികളിൽ ഭൂരിഭാഗവും ഇനി 25 ശതമാനം തീരുവ നേരിടേണ്ടിവരും. മുമ്പ് ഇത് 10 ശതമാനമായിരുന്നു.

തീരുവ ഒഴിവാക്കാൻ മൂന്നാം രാജ്യങ്ങൾ വഴി അയയ്ക്കുന്ന ഉൽപ്പന്നങ്ങൾക്ക് (ട്രാൻസ്ഷിപ്പ് സാധനങ്ങള്‍) 40 ശതമാനം പിഴയും ട്രംപിന്റെ എക്സിക്യൂട്ടീവ് ഉത്തരവ് ചുമത്തുന്നു. അത്തരം നടപടികളിൽ ഏർപ്പെട്ടിരിക്കുന്ന രാജ്യങ്ങളുടെയും കമ്പനികളുടെയും പട്ടിക ആറ് മാസത്തിലൊരിക്കല്‍ പ്രസിദ്ധീകരിക്കാനും യു.എസിന് പദ്ധതിയുണ്ട്.

_{India’s exports like pharma, auto parts, and copper spared from Trump’s new US tariffs—for now.}