'നിഴലും നായാട്ടും' ഒരേ ദിവസം; കുഞ്ചാക്കോ ബോബന്റെ രണ്ട് ഒടിടി റിലീസുകള്‍ ഉടന്‍
ആമസോണ്‍ പ്രൈമിലൂടെയായിരിക്കും നയന്‍താര-കുഞ്ചാക്കോബോബന്‍ ചിത്രം നിഴല്‍ എത്തുക.
ഒ.ടി.ടി റിലീസുകളുടെ കാലമാണിത്. കോവിഡ് രണ്ടാം തരംഗത്തില്‍ ഒ.ടി.ടി റിലീസ് ആയെത്തിയ വിഷു ചിത്രങ്ങള്‍ക്ക് ശേഷം വണ്ടും മലയാളം റിലീസുകള്‍ ഒരുങ്ങുകയാണ്. നയന്‍താര-കുഞ്ചാക്കോ ബോബന്‍ ചിത്രം നിഴല്‍ ആണ് ഒ.ടി.ടി റിലീസിന് ഈ മാസം ആദ്യമെത്തുന്നത്. ഒപ്പം കുഞ്ചാക്കോ ബോബന്റെ തന്നെ നായാട്ടും റിലീസ് ചെയ്യുന്നു.
തൊട്ടടുത്ത ദിവസങ്ങളില്‍ തിയറ്ററുകളിലെത്തിയ ചിത്രങ്ങളാണ് നായാട്ട്, നിഴല്‍ എന്നിവ. രണ്ടു ചിത്രങ്ങളും ഒരേ ദിവസം വ്യത്യസ്ത സ്ട്രീമിംഗ് പ്ലാറ്റ് ഫോമുകളിലൂടെ പ്രദര്‍ശനത്തിനെത്തുമെന്നു മാത്രം. ആദ്യമായാണ് മലയാളത്തില്‍ ഒരു താരത്തിന്റെ രണ്ട് ചിത്രങ്ങള്‍ ഒരേ സമയം ഓടിടി റിലീസ് ചെയ്യുന്നത്.
തിയേറ്ററുകളിലെത്തി ഒരു മാസത്തിനകം സിനിമയ്ക്ക് ഒ.ടി.ടി റിലീസ് പ്രഖ്യാപിക്കുന്നത് ഇപ്പോഴത്തെ പുതിയ ട്രെന്‍ഡ് ആയി മാറുകയാണ് ആണ്. ഏപ്രില്‍ എട്ടിനാണ് നായാട്ട് ബിഗ് സ്‌ക്രീനില്‍ എത്തിയത്. ചിത്രം നെറ്റ്ഫ്‌ലിക്‌സില്‍ എത്തുന്ന വിവരം ജോജു ജോര്‍ജും കുഞ്ചാക്കോബോബനും ചേര്‍ന്നാണ് അറിയിച്ചത്. 'വേട്ട തുടരും. നെറ്റ്ഫ്‌ലിക്‌സില്‍ ഉടന്‍ സ്ട്രീമിംഗ് ആരംഭിക്കും.'-കുഞ്ചാക്കോ ബോബന്‍ കുറിച്ചു.
ചാര്‍ലി എന്ന കൊമേർഷ്യൽ ഹിറ്റിനു ശേഷം സംവിധായകന്‍ മാര്‍ട്ടിന്‍ പ്രക്കാട്ട് സംവിധാനം ചെയ്യുന്ന സിനിമയാണ് 'നായാട്ട്'. ജോസഫിലൂടെ ശ്രദ്ധേയനായ ഷാഹി കബീറിന്റെതാണ് രചന. ഛായാഗ്രഹണം ഷൈജു ഖാലിദും എഡിറ്റിംഗ് മഹേഷ് നാരായണനും നിര്‍വഹിക്കുന്നു. അന്‍വര്‍ അലിയുടെ വരികള്‍ക്ക് വിഷ്ണു വിജയാണ് സംഗീതമൊരുക്കുന്നത്. സംവിധായകന്‍ രഞ്ജിത്തിന്റെയും ശശികുമാറിന്റെയൂം ഉടമസ്ഥതയിലുള്ള ഗോള്‍ഡ് കോയിന്‍ പിക്‌ചേഴ്‌സും മാര്‍ട്ടിന്‍ പ്രക്കാട്ട് ഫിലിംസും ചേര്‍ന്നാണ് ചിത്രം നിര്‍മ്മിക്കുന്നത്.