ഉല്പ്പന്നങ്ങളുടെ വില ഉയര്ത്തിയതിന് പിന്നാലെ വിപണിയില് മുന്നേറി പേപ്പര് നിര്മാണ കമ്പനികള്. പേപ്പര് നിര്മാണ കമ്പനികള് മികച്ച നേട്ടം കൊയ്യുമെന്ന വിലയിരുത്തലില് ആഭ്യന്തര നിക്ഷേപകരുടെ താല്പര്യം വര്ധിച്ചതോടെയാണ് പേപ്പര് നിര്മാണ കമ്പനികളുടെ ഓഹരി വില ഉയരാന് തുടങ്ങിയത്. പേപ്പറുകളുടെ ഡിമാന്റ് വര്ധിച്ചതും കമ്പനികള്ക്ക് നേട്ടമായി. കോവിഡ് മഹാമാരി നീങ്ങിയതിന് പിന്നാലെ അടുത്തിടെയാണ് സ്കൂളുകളും കോളേജുകളും ഓഫീസുകളും കോടതികളും പൂര്ണമായും തുറന്നുപ്രവര്ത്തിക്കാന് തുടങ്ങിയത്. പിന്നാലെയാണ് പേപ്പറുകളുടെ ഡിമാന് വിപണിയില് കുത്തനെ ഉയര്ന്നത്. ഇതിന്റെ ഫലമായി പപ്പര് കമ്പനികള് അടുത്ത ഏതാനും പാദങ്ങളില് ശക്തമായ വരുമാന വളര്ച്ച കൈവരിക്കാന് സാധ്യതയുണ്ടെന്ന് വിശകലന വിദഗ്ധര് പറയുന്നു. ജെകെ പേപ്പര്, വെസ്റ്റ് കോസ്റ്റ് പേപ്പര്, ആന്ധ്രാ പേപ്പര് എന്നിവയാണ് വിപണിയില് മുന്നേറുന്നത്.
ജെകെ പേപ്പര്, വെസ്റ്റ് കോസ്റ്റ് പേപ്പര് മില്സ്, ശേഷസായി പേപ്പര്, ആന്ധ്ര പേപ്പര്, ക്വാണ്ടം പേപ്പേഴ്സ് എന്നിവയുടെ ഓഹരികള് കഴിഞ്ഞ അഞ്ച് ട്രേഡിംഗ് ദിവസങ്ങളിലായി 20 - 25 ശതമാനം വരെ ഉയര്ന്നു. ടിഎന് ന്യൂസ് പ്രിന്റും ഓറിയന്റ് പേപ്പറും ഇക്കാലയളവില് 15 ശതമാനത്തിലധികം നേട്ടമുണ്ടാക്കി.
എഴുത്തിനും പ്രിന്റിംഗിനുമുള്ള പേപ്പറുകളുടെ മൊത്തവില കിലോഗ്രാമിന് 39-46 രൂപയില് നിന്ന് കഴിഞ്ഞ ഒരു വര്ഷത്തിനിടെ 75-80 രൂപയായി ഉയര്ന്നു. കോട്ടഡ് പേപ്പറിന്റെ വില കിലോഗ്രാമിന് 40 ശതമാനം ഉയര്ന്ന് 100 രൂപയായപ്പോള് ക്രാഫ്റ്റ് പേപ്പറിന്റെയും ബോര്ഡിന്റെയും വില കിലോഗ്രാമിന് 31-33 രൂപയില് നിന്ന് 27-44 രൂപയായും ഉയര്ന്നു.
Read DhanamOnline in English
Subscribe to Dhanam Magazine
