സൂക്ഷ്മ, ചെറുകിട, ഇടത്തരം വ്യവസായങ്ങള്‍ക്ക് 'ഉദ്യം' രജിസ്‌ട്രേഷന് പാന്‍കാര്‍ഡ്, ജിഎസ്ടിഎന്‍ എന്നിവ നിര്‍ബന്ധമാണോ?

സൂക്ഷ്മ, ചെറുകിട, ഇടത്തരം വ്യവസായങ്ങള്‍ (MSME) ആരംഭിക്കുവാന്‍ ആഗ്രഹിക്കുന്നവര്‍ www.udyamregtsiration.gov.in എന്ന ഓണ്‍ലൈന്‍ പോര്‍ട്ടലില്‍ രജിസ്‌ട്രേഷന്‍ നടത്തണമെന്ന് കേന്ദ്ര സര്‍ക്കാര്‍ 2020 ജൂണില്‍ ഒരു വിജ്ഞാപനം വഴി ആവശ്യപ്പെട്ടിട്ടുണ്ട്. ആ വിജ്ഞാപനം അനുസരിച്ച് നിക്ഷേപം (Investment), വില്‍പ്പന (Turnover) എന്നിവ സംബന്ധിച്ച വിവരങ്ങള്‍ ഗവണ്‍മെന്റ് ഡാറ്റാ ബേസില്‍നിന്നും ലഭ്യമാകുന്നതായിരിക്കും. കൂടാതെ 01-04-2021 മുതല്‍ പാന്‍കാര്‍ഡ്, ജിഎസ്ടിഎന്‍ (GSTIN) എന്നിവ നിര്‍ബന്ധമാണെന്നും വിജ്ഞാപനം നടത്തിയിരുന്നു. എന്നാല്‍ 05-03-2021 ലെ ഒരു വിജ്ഞാപനം വഴി കേന്ദ്ര സൂക്ഷ്മ, ചെറുകിട, ഇടത്തരം വ്യവസായ മന്ത്രാലയം ചില ഇളവുകള്‍ വരുത്തിയിട്ടുണ്ട്. താഴെ ചേര്‍ക്കുന്നവയാണ് പ്രധാനപ്പെട്ട മാറ്റങ്ങള്‍:

2017 ലെ സെന്‍ട്രല്‍ ഗുഡ്‌സ് ആന്റ് സര്‍വീസ് ടാക്‌സ് ആക്ട് അനുസരിച്ച് ജിഎസ്ടിഎന്‍ (GSTIN) വേണമെന്ന നിബന്ധനയില്‍ ഇളവ് വരുത്തിയിരിക്കുന്നു. ഏതെങ്കിലും കേന്ദ്രനിയമം അനുസരിച്ചോ, സംസ്ഥാന നിയമം അനുസരിച്ചോ അല്ലാതെയുള്ള ഉടമസ്ഥാവകാശ സ്ഥാപനങ്ങളുടെ (Proprietorship-enterprise) ഉടമസ്ഥര്‍ക്ക് അവരുടെ പാന്‍കാര്‍ഡ് സ്ഥാപനത്തിന്റെ രജിസ്‌ട്രേഷന് വേണ്ടി ഉപയോഗിക്കുവാന്‍ കഴിയുന്നതാണ്.

മറ്റുള്ള സ്ഥാപനങ്ങളുടെ 'ഉദ്യം'(Udyam) രജിസ്‌ട്രേഷന് സ്ഥാപനങ്ങളുടെ പാന്‍കാര്‍ഡ് നിര്‍ബന്ധമാണ്. മറ്റുള്ള കാര്യങ്ങള്‍ 26-06-2020 എന്ന തീയതിയിലെ കേന്ദ്ര സര്‍ക്കാര്‍ വിജ്ഞാപനം അനുസരിച്ചായിരിക്കും (Number 5.0.2119 (E) dated the 26th June 2020). താഴെ പറയുന്ന മൂന്ന് തരത്തിലുള്ള സ്ഥാപനങ്ങള്‍ക്കാണ് 'ഉദ്യം' രജിസ്‌ട്രേഷന്‍ സാധ്യമാകുന്നത്.

സൂക്ഷ്മ വ്യവസായങ്ങള്‍ (Micro enterprise-s)

ചെറുകിട സ്ഥാപനങ്ങള്‍ (Small enterprise-s)

ഇടത്തരം സ്ഥാപനങ്ങള്‍ (Medium enterprise-s)

പുതിയ വിജ്ഞാപനം അനുസരിച്ച് കമ്പനി, എല്‍എല്‍പി, സഹകരണ സംഘം, സൊസൈറ്റി, ട്രസ്റ്റ് എന്നീ സ്ഥാപനങ്ങളുടെ ഉദ്യം രജിസ്‌ട്രേഷനും പാന്‍ കാര്‍ഡ് നിര്‍ബന്ധമാണ്.

(പട്ടാമ്പി ശ്രീനീലകണ്ഠ ഗവണ്‍മെന്റ് സംസ്‌കൃത കോളേജിലെ കൊമേഴ്‌സ് വിഭാഗം അസിസ്റ്റന്റ് പ്രൊഫസറാണ് ലേഖകന്‍)