ഒന്നര വര്‍ഷത്തിന് ശേഷം വൊഡഫോണിന് വരിക്കാര്‍ കൂടുന്നു
സജീവ വരിക്കാരുടെ എണ്ണത്തില്‍ ജിയോയ്ക്ക് തിരിച്ചടി
കഴിഞ്ഞ 15 മാസത്തിനിടെ ഇതാദ്യമായി വൊഡഫോണിന്റെ വരിക്കാരുടെ എണ്ണത്തില്‍ വര്‍ധന. ടെലികോം റെഗുലേറ്ററി അഥോറിറ്റി ഓഫ് ഇന്ത്യയുടെ ടൈലികോം സബ്‌സ്‌ക്രൈബര്‍ ഡാറ്റ പ്രകാരം 2021 ഫെബ്രുവരിയില്‍ വൊഡഫോണിന് ഏഴ് ലക്ഷം വരിക്കാരാണ് കൂടിയത്. കഴിഞ്ഞ 15 മാസത്തിനിടയില്‍ അഞ്ച് കോടി വരിക്കാരെയാണ് വൊഡഫോണിന് നഷ്ടമായിരുന്നത്. അതേസമയം എയര്‍ടെല്ലും റിലയന്‍സും 66 ദശലക്ഷം വരിക്കാരെ കണ്ടെത്തിയ കാലയളവ് കൂടിയായിരുന്നു ഇത്. ഫെബ്രുവരിയിലെ കണക്കനുസരിച്ച് എയര്‍ടെല്‍ 37 ലക്ഷവും ജിയോ 43 ലക്ഷം വരിക്കാരെയും പുതുതായി കണ്ടെത്തിയിട്ടുണ്ട്.
വരിക്കാരുടെ എണ്ണത്തില്‍ റിലയന്‍സ് ജിയോ മുന്നിലാണെങ്കിലും സജീവ വരിക്കാരുടെ നിരക്ക് കുറവാണെന്ന് റിപ്പോര്‍ട്ട് പറയുന്നു. 78 ശതമാനം സജീവ വരിക്കാരുള്ള ജിയ ഇക്കാര്യത്തില്‍ ബിഎസ്എന്‍എല്ലിനും എംടിഎന്‍എല്ലിനും മാത്രം മുന്നിലാണ്.
സജീവ വരിക്കാരുടെ എണ്ണത്തില്‍ മുന്നില്‍ എയര്‍ടെല്ലാണ്. 34.8 കോടി വരിക്കാരില്‍ 34 കോടിയും സജീവ വരിക്കാരാണ്. 41.5 കോടി വരിക്കാരുള്ള ജിയോയ്ക്ക് 32.4 കോടി സജീവ വരിക്കാറേയുള്ളൂ. സജീവ വരിക്കാരുടെ നിരക്കില്‍ വൊഡഫോണും ജിയോയ്ക്ക് മുന്നിലാണ്. 28.3 കോടി വരിക്കാറുള്ള വൊഡഫോണിന്റെ 25.6 കോടി വരിക്കാരും സജീവമാണ്.
