ആഗോള നിക്ഷേപ സ്ഥാപനമായ ബ്ലാക്ക്സ്റ്റോണിന്റെ (Blackstone Group) ഉടമസ്ഥതയിലുള്ള എജിഎസ് ഹെൽത്ത് (AGS Health), 4,800 കോടി രൂപ സമാഹരിക്കാനായി ഓഹരി വിപണിയിലേക്ക് (IPO) പ്രവേശിക്കുന്നു. യുഎസ് ആരോഗ്യ സേവന ദാതാക്കൾക്ക് റെവന്യൂ സൈക്കിൾ മാനേജ്മെന്റ് (RCM) സേവനങ്ങൾ നൽകുന്ന കമ്പനി, ഇതിനായുള്ള പുതുക്കിയ ഡ്രാഫ്റ്റ് റെഡ് ഹെറിംഗ് പ്രോസ്പെക്ടസ് (DRHP) സെബിക്ക് (SEBI) സമർപ്പിച്ചു.
ഐപിഒയിലൂടെ 1,800 കോടി രൂപയുടെ പുതിയ ഓഹരികളും (Fresh Issue), ബ്ലാക്ക്സ്റ്റോണിന്റെ ഹോൾഡിംഗ് കമ്പനിയായ ബിസിപി ഏഷ്യ II ടോപ്കോ (BCP Asia II Topco) വഴി 3,000 കോടി രൂപയുടെ ഓഫർ ഫോർ സെയിലും (OFS) ആണ് കമ്പനി ലക്ഷ്യമിടുന്നത്. കൂടാതെ, 360 കോടി രൂപ വരെയുള്ള പ്രീ-ഐപിഒ പ്ലേസ്മെന്റിനും കമ്പനി ശ്രമിച്ചേക്കാം, അങ്ങനെ സംഭവിക്കുകയാണെങ്കിൽ പുതിയ ഓഹരികളുടെ അളവിൽ കുറവുണ്ടാകും.
ഫണ്ട് വിനിയോഗം: തമിഴ്നാട് ആസ്ഥാനമായി പ്രവർത്തിക്കുന്ന ഈ കമ്പനി, ഐപിഒയിലൂടെ ലഭിക്കുന്ന തുകയിൽ നിന്ന് 1,600 കോടി രൂപ തങ്ങളുടെ ഉപകമ്പനികളുടെ (AGS Health BCP LLC, AGS Health BCP Holdings) കടബാധ്യതകൾ തിരിച്ചടയ്ക്കാൻ ഉപയോഗിക്കും. 2026 മാർച്ചിലെ കണക്കനുസരിച്ച് കമ്പനിക്ക് ഏകദേശം 4,238.8 കോടി രൂപയുടെ കടബാധ്യതയുണ്ട്. ബാക്കി തുക പൊതുവായ കോർപ്പറേറ്റ് ആവശ്യങ്ങൾക്കായി വിനിയോഗിക്കും.
യുഎസിലെ മുൻനിരയിലുള്ള 20 ആശുപത്രികളിൽ 11 എണ്ണമുൾപ്പെടെ 82 ഹെൽത്ത് സിസ്റ്റങ്ങൾക്കും ഹോസ്പിറ്റലുകൾക്കും എജിഎസ് ഹെൽത്ത് നിലവിൽ സേവനം നൽകുന്നുണ്ട്. ഡ്യൂക്ക് ഹെൽത്ത് (Duke Health), അപ്പോളോ എംഡി (ApolloMD) തുടങ്ങിയവ ഇവരുടെ പ്രമുഖ ഉപഭോക്താക്കളാണ്. സാമ്പത്തികമായി മികച്ച പ്രകടനം കാഴ്ചവയ്ക്കുന്ന കമ്പനി, 2026 സാമ്പത്തിക വർഷത്തിൽ 206.9 കോടി രൂപ ലാഭവും 2,041.4 കോടി രൂപ വരുമാനവും രേഖപ്പെടുത്തി.
Read DhanamOnline in English
Subscribe to Dhanam Magazine
