

പ്രമുഖ ആര്ട്ടിഫിഷ്യല് ഇന്റലിജന്സ് (AI) കമ്പനിയായ ആന്ത്രോപിക് (Anthropic) നാസ്ഡാക് (Nasdaq) ഓഹരി വിപണിയിൽ നടത്തിയ റെക്കോർഡ് അരങ്ങേറ്റത്തിന് പിന്നാലെ, ഇന്ത്യൻ നിക്ഷേപകർക്കിടയിൽ ഏറ്റവും കൂടുതൽ വ്യാപാരം ചെയ്യപ്പെടുന്ന യു.എസ് ഓഹരികളിലൊന്നായി മാറി. ഇൻഡ്മണി (INDmoney) പ്ലാറ്റ്ഫോമിലെ ആകെ അന്താരാഷ്ട്ര നിക്ഷേപങ്ങളുടെ 40 ശതമാനവും വെസ്റ്റഡ് (Vested) പ്ലാറ്റ്ഫോമിലെ വ്യാപാര മൂല്യത്തിന്റെ 11 ശതമാനവും ആന്ത്രോപിക് ഓഹരികളായിരുന്നു. ഗിഫ്റ്റ് സിറ്റി (GIFT City) വഴി ഇന്ത്യക്കാർക്ക് അന്താരാഷ്ട്ര നിക്ഷേപം സാധ്യമാക്കുന്ന പ്രധാന പ്ലാറ്റ്ഫോമുകളാണ് ഇൻഡ്മണിയും വെസ്റ്റഡും.
ഐ.പി.ഒ (IPO) വിലയായ 83 ഡോളറിൽ നിന്ന് 34 ശതമാനം പ്രീമിയത്തോടെ 111.5 ഡോളര് നിരക്കിലാണ് ആന്ത്രോപിക് ഓഹരികൾ വ്യാപാരം ആരംഭിച്ചത്. ലോകത്തിലെ ഏറ്റവും വലിയ പ്രാരംഭ ഓഹരി വിൽപ്പനയിലൂടെ കമ്പനിയുടെ വിപണി മൂല്യം ഏകദേശം 2 ട്രില്യൺ ഡോളറിലെത്തി. മുൻപ് നടന്ന സ്പേസ് എക്സിന്റെ (SpaceX) ലിസ്റ്റിംഗിനെ മറികടന്നുള്ള നേട്ടമാണിത്.
വെസ്റ്റഡ് പ്ലാറ്റ്ഫോമില് എ.എം.ഡിക്ക് (AMD) തൊട്ടുപിന്നിലും എൻവിഡിയക്ക് (Nvidia) മുന്നിലുമായി ഏറ്റവും കൂടുതൽ വ്യാപാരം നടന്ന രണ്ടാമത്തെ ഓഹരിയായി ആന്ത്രോപിക് മാറി. വെസ്റ്റഡിലെ ആകെ സജീവ ട്രേഡര്മാരില് 20 ശതമാനത്തോളം പേർ ഈ ഓഹരികൾ വാങ്ങി, ശരാശരി വാങ്ങൽ ഓർഡർ തുക 1,100 ഡോളര് (ഏകദേശം 10 ഓഹരികൾ) ആയിരുന്നു. വ്യാഴാഴ്ചയിലെ സെഷനിൽ വെസ്റ്റഡിൽ എൻവിഡിയയേക്കാൾ ഏഴു മടങ്ങ് കൂടുതൽ വ്യാപാരമാണ് ആന്ത്രോപികിൽ നടന്നത്.
വിപണി വിലയിരുത്തൽ: ഗ്രോ (Groww), അപ്സ്റ്റോക്സ് (Upstox), സീറോധ (Zerodha), ഏഞ്ചൽ വൺ (Angel One) തുടങ്ങിയ ആഭ്യന്തര ബ്രോക്കർമാർ ഗിഫ്റ്റ് സിറ്റി വഴി യു.എസ് വിപണി സൗകര്യം നൽകുന്നത് ഇന്ത്യൻ നിക്ഷേപകരുടെ പങ്കാളിത്തം വിപുലീകരിച്ചിട്ടുണ്ട്. എന്നാൽ ആദ്യ ദിനത്തിലെ വ്യാപാരം ഡിമാന്ഡിനെ മാത്രമാണ് സൂചിപ്പിക്കുന്നതെന്നും, കമ്പ്യൂട്ടിംഗ് ചെലവുകൾ കുറയുന്നതിനനുസരിച്ച് ലാഭവിഹിതം ഉയരുന്നുണ്ടോ എന്നും വരും ക്വാർട്ടറുകളിലെ പ്രകടനവുമാണ് യഥാർത്ഥ പരിശോധനയെന്നും വിലയിരുത്തപ്പെടുന്നു.
Read DhanamOnline in English
Subscribe to Dhanam Magazine