കേന്ദ്ര സർക്കാർ പൊതുമേഖലാ സ്ഥാപനമായ ഭാരത് ഹെവി ഇലക്ട്രിക്കൽസ് ലിമിറ്റഡിന്റെ (BHEL) ഓഹരികൾ 'ഓഫർ ഫോർ സെയിൽ' (OFS) വഴി വിറ്റഴിക്കാൻ ആരംഭിച്ചു. ഇന്ന് (ഫെബ്രുവരി 11) ആരംഭിച്ച ഓഹരി വിൽപ്പന വഴി കമ്പനിയുടെ 3 ശതമാനം ഓഹരികളാണ് (ഏകദേശം 10.44 കോടി ഓഹരികൾ) ആദ്യഘട്ടത്തിൽ വിറ്റഴിക്കുന്നത്.
സർക്കാർ നിശ്ചയിച്ചിട്ടുള്ള ഫ്ലോർ പ്രൈസ് (Floor Price) ഓഹരി ഒന്നിന് 254 രൂപയാണ്. ഇത് ഓഹരി വിപണിയിലെ മുൻപത്തെ ക്ലോസിംഗ് വിലയേക്കാൾ ഏകദേശം 8 ശതമാനം കുറവാണ്. 3 ശതമാനം ഓഹരികൾ വിൽക്കുന്നതിലൂടെ ഏകദേശം 2,650 കോടി രൂപ സമാഹരിക്കാനാണ് സർക്കാർ ലക്ഷ്യമിടുന്നത്. ഇതിനുപുറമെ, ഓഹരികൾക്ക് ആവശ്യക്കാർ ഏറുന്നുവെങ്കിൽ 2 ശതമാനം ഓഹരികൾ കൂടി (6.96 കോടി ഓഹരികൾ) അധികമായി വിൽക്കാനുള്ള 'ഗ്രീൻഷൂ' (Greenshoe) ഓപ്ഷനും സർക്കാർ നിലനിർത്തിയിട്ടുണ്ട്. ഇത് കൂടി ഉൾപ്പെടുത്തിയാൽ ആകെ 5 ശതമാനം ഓഹരികൾ വിറ്റഴിക്കുകയും അതുവഴി 4,422 കോടി രൂപ സമാഹരിക്കുകയും ചെയ്യാം.
ഫെബ്രുവരി 11 ന് സ്ഥാപന നിക്ഷേപകർക്കും (Non-retail), ഫെബ്രുവരി 12 ന് വ്യക്തിഗത നിക്ഷേപകർക്കും (Retail) ബിഡ് സമർപ്പിക്കാൻ സാധിക്കും. ഓഹരി വിൽപ്പന പ്രഖ്യാപിച്ചതിന് പിന്നാലെ ബിഎസ്ഇയിൽ കമ്പനിയുടെ ഓഹരി വില 5 ശതമാനം ഇടിഞ്ഞ് 261.40 രൂപയിലെത്തി. നിലവിൽ കേന്ദ്ര സർക്കാരിന് കമ്പനിയിൽ 63.17 ശതമാനം ഓഹരി പങ്കാളിത്തമുണ്ട്.
ശക്തമായ സാമ്പത്തിക വളർച്ചക്കിടയിലാണ് ബി.എച്ച്.ഇ.എൽ ഓഹരികൾ വിറ്റഴിക്കുന്നത്. 2025 ഡിസംബറിൽ അവസാനിച്ച പാദത്തിൽ കമ്പനി 382 കോടി രൂപ അറ്റാദായം നേടിയിരുന്നു, ഇത് മുൻവർഷത്തെ അപേക്ഷിച്ച് 206 ശതമാനം വർദ്ധനവാണ്. പ്രവർത്തന വരുമാനം 16 ശതമാനം വർദ്ധിച്ച് 8,473 കോടി രൂപയായും ഉയർന്നു. കൂടാതെ, ഭാരത് കോൾ ഗ്യാസിഫിക്കേഷൻ ആൻഡ് കെമിക്കൽസ് ലിമിറ്റഡിൽ നിന്ന് 2,800 കോടി രൂപയുടെ വലിയൊരു പദ്ധതിയും കമ്പനിക്ക് അടുത്തിടെ ലഭിച്ചിട്ടുണ്ട്. മികച്ച സാമ്പത്തിക ലാഭം പ്രകടിപ്പിക്കുന്ന പൊതുമേഖലാ സ്ഥാപനത്തിന്റെ ഓഹരികൾ കുറഞ്ഞ നിരക്കിൽ വാങ്ങാൻ താൽപ്പര്യപ്പെടുന്ന നിക്ഷേപകർക്ക് ഈ ഒ.എഫ്.എസ് മികച്ച അവസരമാണ്.
Disclaimer: മേൽസൂചിപ്പിച്ച വിവരങ്ങള് പഠനാവശ്യാർത്ഥം പങ്കുവെച്ചതാണ്. ഓഹരി നിക്ഷേപം വിപണിയുടെ നഷ്ടസാധ്യതകൾക്ക് വിധേയമാണ്. നിക്ഷേപത്തിന് മുൻപ് സ്വന്തം നിലയിൽ കൂടുതൽ പഠിക്കുകയോ അല്ലെങ്കിൽ സെബി അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യാവുന്നതാണ്.
Government offers BHEL shares via OFS at a discounted floor price of ₹254, presenting a strong investment opportunity.
Read DhanamOnline in English
Subscribe to Dhanam Magazine
