വിപണിയിലെ മാറ്റങ്ങൾ അറിയാൻ നാളെ ബിഎസ്ഇ മോക്ക് ട്രേഡിംഗ്, ബ്രോക്കർമാർക്കും ട്രേഡർമാർക്കും പരിശീലനത്തിന് മികച്ച സമയം

ഓഹരി, കറൻസി, കമ്മോഡിറ്റി വിഭാഗങ്ങൾക്കായി വിപുലമായ മോക്ക് ട്രേഡിംഗ് ഡ്രിൽ ബോംബെ സ്റ്റോക്ക് എക്സ്ചേഞ്ച് (BSE) നടത്തുന്നു. എക്സ്ചേഞ്ചിന്റെ ട്രേഡിംഗ് ഇൻഫ്രാസ്ട്രക്ചർ സ്ഥിരതയുള്ളതാണെന്നും തത്സമയ വിപണി പ്രവർത്തനങ്ങൾ കൈകാര്യം ചെയ്യാൻ പ്രാപ്തമാണെന്നും ഉറപ്പാക്കുകയാണ് ഈ പരീക്ഷണത്തിന്റെ പ്രാഥമിക ലക്ഷ്യം.

ഓഹരികൾ (Equity), ഇക്വിറ്റി ഡെറിവേറ്റീവ്സ്, കറൻസി, കമ്മോഡിറ്റി, ഇലക്ട്രോണിക് ഗോൾഡ് റെസിപ്റ്റ്സ് (EGR) എന്നീ വിഭാഗങ്ങൾ ഉൾപ്പെടുന്നതാണ് നാളെയുളള (മാര്‍ച്ച് 14) സെഷന്‍. ട്രേഡിംഗ് മെമ്പര്‍മാര്‍ക്കും ബ്രോക്കിംഗ് സ്ഥാപനങ്ങള്‍ക്കും അവരുടെ സിസ്റ്റങ്ങൾ എക്സ്ചേഞ്ച് പ്ലാറ്റ്‌ഫോമുമായി എത്രത്തോളം കൃത്യമായി ബന്ധിക്കപ്പെട്ടിരിക്കുന്നു എന്ന് പരിശോധിക്കാനും ഓർഡർ മാനേജ്‌മെന്റ് പ്രക്രിയകൾ വിലയിരുത്താനും ഇത് സഹായിക്കുന്നു. പ്രൈമറി സൈറ്റിൽ (PR) നിന്നും ഡിസാസ്റ്റർ റിക്കവറി സൈറ്റിൽ (DR) നിന്നും ഒരേസമയം ഈ ഡ്രില്‍ നടത്തുമെന്നത് ഇതിന്റെ പ്രത്യേകതയാണ്.

പരീക്ഷിക്കാൻ അവസരം

സ്വന്തമായി വികസിപ്പിച്ചെടുത്ത പ്ലാറ്റ്‌ഫോമുകളോ തേർഡ് പാർട്ടി ആപ്പുകളോ ഉപയോഗിക്കുന്നവർക്ക് വിവിധ ഫങ്ഷണാലിറ്റികൾ പരീക്ഷിക്കാൻ ഈ അവസരം ഉപയോഗിക്കാം. വ്യാപാരം തടസപ്പെടുന്ന സാഹചര്യങ്ങൾ (Trading Halts), റിസ്ക് റിഡക്ഷൻ മോഡുകൾ തുടങ്ങിയ അസാധാരണ വിപണി സാഹചര്യങ്ങളെ സിസ്റ്റം എങ്ങനെ നേരിടുന്നു എന്ന് ഇതിലൂടെ മനസ്സിലാക്കാം.

ഇത് പൂർണമായും പരീക്ഷണാടിസ്ഥാനത്തിലുള്ളതും നിക്ഷേപകർക്ക് അവബോധം നൽകുന്നതിനും വേണ്ടിയുള്ളതാണ്. അതിനാൽ ഈ സെഷനിൽ നടത്തുന്ന ഇടപാടുകൾക്ക് യാതൊരുവിധ സാമ്പത്തിക ബാധ്യതകളോ മാർജിൻ പേയ്‌മെന്റുകളോ ഉണ്ടായിരിക്കില്ല. യഥാർത്ഥ വിപണി പ്രവർത്തനങ്ങളിൽ ഉണ്ടാകാനിടയുള്ള സാങ്കേതിക തടസങ്ങൾ മുൻകൂട്ടി കണ്ടെത്താനും ഒഴിവാക്കാനുമാണ് ഇത്തരം മോക്ക് സെഷനുകൾ നടത്തുന്നത്.

_{BSE will conduct a mock trading drill on March 14 across equity, derivatives, currency, commodity, and EGR segments to test system readiness and infrastructure stability.}