കേരളത്തിലെ മുന്നിര സ്വര്ണ വായ്പ കമ്പനികളായ മുത്തൂറ്റ് ഫിനാന്സ്, മണപ്പുറം ഫിനാന്സ് ഓഹരികള്ക്ക് വലിയ മുന്നേറ്റം പ്രവചിച്ച് ആഗോള ബ്രേക്കറേജ് സ്ഥാപനമായ സി.എല്.എസ്.എ. മുത്തൂറ്റ് ഫിനാന്സിന്റെ റേറ്റിംഗ് 'ഹോള്ഡ്' എന്നതില് നിന്ന് 'ഔട്ട്പെര്ഫോം' എന്നതിലേക്ക് ഉയര്ത്തിയ സി.എല്.എസ്.എ മണപ്പുറം ഫിനാന്സിന്റെ 'ഔട്ട്പെര്ഫോം' സ്റ്റാറ്റസ് നിലനിറുത്തുകയും ചെയ്തു.
2025 സാമ്പത്തിക വര്ഷം ഇതു വരെയുള്ള സ്വര്ണത്തിന്റെ മുന്നേറ്റം ഇരു സ്വര്ണപണയ സ്ഥാപനങ്ങള്ക്കും ഗുണകരമാകുമെന്നാണ് ബ്രോക്കറേജ് കണക്കുകൂട്ടുന്നത്. അടുത്ത 12 മാസത്തിനുള്ളില് 10 മുതല് 14 ശതമാനം വരെയാണ് ഈ ഓഹരികളുടെ വിലയില് ബ്രോക്കറേജ് മുന്നേറ്റം പ്രതീക്ഷിക്കുന്നത്. മുത്തൂറ്റ് ഫിനാന്സിന്റെ ലക്ഷ്യവില 2,400 രൂപയായും മണപ്പുറം ഫിനാന്സിന്റെ ലക്ഷ്യവില 225 രൂപയായുമാണ് ഉയര്ത്തിയിരിക്കുന്നത്.
ഈ മേഖലയിലെ മുഖ്യ എതിരാളിയായ ഐ.ഐ.എഫ്.എല്ലിന് ആര്.ബി.ഐ വിലക്കേര്പ്പെടുത്തിയതു മൂലമുള്ള നേട്ടവും ഇരു കമ്പനികള്ക്കും ലഭിക്കുമെന്നാണ് സി.എല്.എസ്.എ അനലിസ്റ്റുകള് പറയുന്നത്. ചട്ടങ്ങള് പാലിക്കുന്നതില് വീഴ്ചവരുത്തുന്നുവെന്നാരോപിച്ച് ഐ.ഐ.എഫ്.എല്ലിനെ 2024 മാര്ച്ച് മുതല് സെപ്റ്റംബര് വരെ വായ്പകള് അനുവദിക്കുന്നതില് നിന്ന് റിസര്വ് ബാങ്ക് വിലക്കിയിരുന്നു.
മുത്തൂറ്റ് ഫിനാന്സ് ഓഹരികള് ഇന്ന് 2,200 രൂപയിലാണ് വ്യാപാരം നടത്തുന്നത്. കേരള ഓഹരികളില് ഏറ്റവും ഉയര്ന്ന വിപണി മൂല്യമുള്ള ഓഹരിയാണ് മുത്തൂറ്റ് ഫിനാന്സ്. ഈ മാസം അഞ്ചിന് കമ്പനിയുടെ വിപണി മൂല്യം 91,085 കോടി രൂപയിലെത്തി പുതിയ നാഴികക്കല്ല് പിന്നിട്ടിരുന്നു. വിപണി മൂല്യം 90,000 കോടി പിന്നിട്ട ആദ്യ കേരള കമ്പനിയുമാണ് മുത്തൂറ്റ് ഫിനാന്സ്. കഴിഞ്ഞ ഒരു വര്ഷക്കാലയളവില് 62.47 ശതമാനമാണ് ഓഹരി നിക്ഷേപകര്ക്ക് നല്കിയ നേട്ടം. അഞ്ച് വര്ഷക്കാലയളവില് ഓഹരിയുടെ ഉയര്ച്ച 194 ശതമാനവും.
മണപ്പുറം ഫിനാന്സ് ഓഹരികള്ക്ക് 9.7 ശതമാനം ഉയര്ച്ചയാണ് സി.എല്.എസ്.എ പ്രവചിക്കുന്നത്. നിലവില് 192.21 രൂപയാണ് ഓഹരിയുടെ വില. കഴിഞ്ഞ ഒരു വര്ഷക്കാലയളവില് 9.94 ശതമാനം നേട്ടം ഓഹരി നല്കിയിട്ടുണ്ട്. അഞ്ച് വര്ഷക്കാലയളവില് 19.62 ശതമാനമാണ് ഓഹരിയുടെ ഉയര്ച്ച. മണപ്പുറം ഫിനാന്സിന്റെ ഉപകമ്പനിയായ ആശിര്വാദ് ഫിനാന്സിനെ വായ്പകള് നല്കുന്നതില് നിന്ന് ആര്.ബി.ഐ വിലക്കിയത് ഓഹരികളെ ഇടക്കാലത്ത് മോശമായി ബാധിച്ചിരുന്നു. ജനുവരി എട്ടിന് ആര്.ബി.ഐ വിലക്ക് പിന്വലിച്ചു.
ഇരു കമ്പനികളുടെയും നിഷ്ക്രിയ ആസ്തികള് ചെറുതായി കൂടുന്നുണ്ടെങ്കിലും സ്വര്ണ വില ഉയര്ന്ന് നില്ക്കുന്നത് കമ്പനികള്ക്ക് ആശ്വാസം നല്കുന്നുണ്ടെന്ന് ബ്രോക്കറേജ് കണക്കുകൂട്ടുന്നു.
യു.എസില് ഡൊണാള്ഡ് ട്രംപ് അധികാരത്തിലേറിയതിനു ശേഷം സ്വര്ണ വില നേട്ടം തുടരുകയാണ്. ട്രംപിന്റെ നയങ്ങള് ഉണ്ടാക്കുന്ന അനിശ്ചിതത്വങ്ങളെ പ്രതിരോധിക്കാനുള്ള സുരക്ഷിത നിക്ഷേപമെന്നതാണ് സ്വര്ണത്തിന്റെ തിളക്കം കൂട്ടുന്നത്. കേരളത്തില് സ്വര്ണ വില ഈ വര്ഷം ഇതുവരെ 13.4 ശതമാനത്തോളമാണ് ഉയര്ന്നത്.
(Equity investing is subject to market risk. Always do your own research or consult a financial expert before investing)
Read DhanamOnline in English
Subscribe to Dhanam Magazine
