ഓഹരികൾ ഡിജിറ്റൽ രൂപത്തിലേക്ക് മാറ്റാനുള്ള നീക്കത്തിൽ സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ (SEBI) ഒരു അവസാന അവസരം കൂടി നിക്ഷേപകർക്ക് നൽകിയിരിക്കുകയാണ്. യഥാർത്ഥ നിക്ഷേപകരുടെ അവകാശങ്ങൾ സംരക്ഷിക്കുന്നതിനും നിക്ഷേപം എളുപ്പമാക്കുന്നതിനും വേണ്ടിയാണ് ഡീമെറ്റീരിയലൈസേഷൻ (dematerialization) പ്രോത്സാഹിപ്പിക്കുന്നത്. 2019 ഏപ്രിൽ 1 മുതൽ ഭൗതികമായ ഓഹരി കൈമാറ്റങ്ങൾ ഔദ്യോഗികമായി നിർത്തിയിരുന്നു.
2019 ഏപ്രിൽ 1-ന് മുമ്പ് വാങ്ങിയ ഓഹരികളുടെ യഥാർത്ഥ ഫിസിക്കൽ സർട്ടിഫിക്കറ്റുകളും ട്രാൻസ്ഫർ ഡീഡുകളും കൈവശമുള്ള നിക്ഷേപകർക്ക് അവ വീണ്ടും സമർപ്പിക്കാൻ സെബി ഇപ്പോൾ കൂടുതല് സാവകാശം നല്കിയിരിക്കുകയാണ്. നേരത്തെ 2021 മാര്ച്ച് 31 വരെയായിരുന്നു ഈ സമയം. പുതിയ അവസരമനുസരിച്ച്, രജിസ്ട്രാര്സ് ആന്ഡ് കമ്പനീസിന്റെ പരിശോധനക്ക് വിധേയമായി ഈ കൈമാറ്റങ്ങൾ പുതുതായി സമർപ്പിക്കാം. എന്നാൽ തർക്കങ്ങളോ തട്ടിപ്പ് സംശയിക്കുന്ന കേസുകളോ ഈ അവസരത്തിന് യോഗ്യമല്ല.
ലിസ്റ്റിംഗ് ഒബ്ലിഗേഷൻസ് ആൻഡ് ഡിസ്ക്ലോഷർ റിക്വയർമെൻ്റ്സ് (LODR) റെഗുലേഷൻസ്, 2015-ൽ നിക്ഷേപകരുടെ സേവനങ്ങൾ ലളിതമാക്കാനായി വരുത്തിയ മാറ്റങ്ങൾ സെബി അംഗീകരിച്ചു. ഡ്യൂപ്ലിക്കേറ്റ് സർട്ടിഫിക്കറ്റുകൾ നൽകുക, ഓഹരികൾ കൈമാറ്റം ചെയ്യുക തുടങ്ങിയ ആവശ്യങ്ങൾക്കായി മുമ്പ് ആവശ്യമുണ്ടായിരുന്ന 'ലെറ്റർ ഓഫ് കൺഫർമേഷൻ്റെ' (Letter of Confirmation) ആവശ്യകത ഒഴിവാക്കി എന്നതാണ് ഇതിലെ ഒരു പ്രധാന മാറ്റം. പഴയ സമ്പ്രദായത്തിൽ ഈ കത്ത് ലഭിക്കാൻ ഏകദേശം 150 ദിവസമെടുത്തിരുന്നു.
പുതിയ പരിഷ്കാരങ്ങൾ പ്രകാരം ശരിയായ പരിശോധനകൾക്ക് ശേഷം, സെക്യൂരിറ്റികൾ നേരിട്ട് നിക്ഷേപകരുടെ ഡീമാറ്റ് അക്കൗണ്ടിലേക്ക് ക്രെഡിറ്റ് ചെയ്യപ്പെടും. ഇത് പ്രോസസിംഗ് സമയം ഏകദേശം 30 ദിവസമായി കുറയ്ക്കുന്നതിനും ഭൗതിക രേഖകൾ നഷ്ടപ്പെടാനുള്ള സാധ്യത കുറയ്ക്കുന്നതിനും കാരണമാകും. 2026 ജനുവരി 6 വരെയാണ് പ്രത്യേക റീ-ലോഡ്ജ്മെന്റ് വിൻഡോ ഉളളത്. ഈ ഭേദഗതികൾ നിക്ഷേപം എളുപ്പമാക്കുമെന്നും യഥാർത്ഥ നിക്ഷേപകരുടെ അവകാശങ്ങൾ സംരക്ഷിക്കുമെന്നും സെബി പ്രതീക്ഷിക്കുന്നു.
SEBI offers last chance to convert physical shares to demat, simplifying investor processes and timelines.
Read DhanamOnline in English
Subscribe to Dhanam Magazine
