പശ്ചിമേഷ്യയില് തുടരുന്ന ഇറാന്-ഇസ്രയേല്-യു.എസ് സംഘര്ഷം ഇന്ത്യയിലെ സെറാമിക് ടൈല് വ്യവസായത്തിനും ഓഹരി വിപണിക്കും വലിയ തിരിച്ചടിയായി. രാജ്യത്തെ പ്രമുഖ ടൈല് നിര്മാതാക്കളായ സെറ സാനിറ്ററിവെയര്, കജാരിയ സെറാമിക്സ്, സോമാനി സെറാമിക്സ് എന്നിവയുടെ ഓഹരികള് അടുത്തകാലത്തെ ഉയര്ന്ന നിലകളില്നിന്ന് 26% വരെ ഇടിഞ്ഞു.
ടൈല് നിര്മാണത്തിന് ആവശ്യമായ പ്രധാന ഇന്ധനങ്ങളായ പ്രോപെയ്നും പ്രകൃതിവാതകവും പശ്ചിമേഷ്യയില്നിന്നാണ് കൂടുതലായി ലഭിക്കുന്നത്. യുദ്ധത്തെ തുടര്ന്ന് ഇവയുടെ വിതരണം തടസപ്പെട്ടു. വില കുത്തനെ ഉയര്ന്നു. ഇത് ഈ വ്യവസായത്തെ സമ്മര്ദ്ദത്തിലാക്കി.
ഇന്ത്യയിലെ ടൈല് നിര്മാണത്തിന്റെ ഹൃദയഭാഗമാണ് ഗുജറാത്തിലെ മോര്ബി. ലോകത്തിലെ തന്നെ ഏറ്റവും വലിയ സെറാമിക് ടൈല് ക്ലസ്റ്ററുകളിലൊന്നായ ഇവിടെ നൂറുകണക്കിന് യൂണിറ്റുകളാണ് പ്രവര്ത്തിക്കുന്നത്. 90 മുതല് 95 വരെ ഫാക്ടറികള് ഇതിനകം പ്രവര്ത്തനം നിര്ത്തിയിട്ടുണ്ട്. മൊത്തം 700ഓളം യൂണിറ്റുകളുള്ള ക്ലസ്റ്ററിലാണ് ഈ സ്ഥിതി. പ്രോപെയ്ന് ലഭ്യത കുറഞ്ഞതാണ് പ്രധാന കാരണം. മാര്ച്ച് 15ന് ശേഷം ഗുജറാത്ത് ഗ്യാസ് വ്യവസായ ഉപഭോക്താക്കള്ക്ക് ഗ്യാസ് വിതരണം നിര്ത്താന് സാധ്യതയുണ്ടെന്ന ആശങ്കയും വ്യവസായത്തെ കൂടുതല് ആശങ്കപ്പെടുത്തുന്നു.
ഇന്ധന പ്രതിസന്ധി: ടൈല് നിര്മാണത്തില് ഉപയോഗിക്കുന്ന കില്നുകള് ഉയര്ന്ന ചൂടില് പ്രവര്ത്തിക്കേണ്ടതിനാല് പ്രോപെയ്ന് അല്ലെങ്കില് ഗ്യാസ് അനിവാര്യമാണ്. വിതരണം തടസ്സപ്പെട്ടാല് ഉത്പാദനം തന്നെ നില്ക്കും.
ചെലവ് വര്ധന: യുദ്ധത്തെ തുടര്ന്ന് ഊര്ജത്തിന് വില കുത്തനെ ഉയര്ന്നതോടെ നിര്മാണച്ചെലവ് കൂടുന്നു.
കയറ്റുമതി പ്രശ്നങ്ങള്: മോര്ബി മേഖലയില്നിന്നുള്ള ടൈല് കയറ്റുമതിയുടെ 35-40% വരെ മിഡില് ഈസ്റ്റ് രാജ്യങ്ങളിലേക്കാണ്. യുദ്ധം മൂലം ഈ വിപണികളിലും അനിശ്ചിതത്വം വര്ധിച്ചു.
മോര്ബി ക്ലസ്റ്ററിലെ നിരവധി ചെറുകിട യൂണിറ്റുകള് ഇതിനകം തന്നെ ഉത്പാദനം കുറക്കുകയോ താല്ക്കാലികമായി നിര്ത്തുകയോ ചെയ്തിട്ടുണ്ട്. ഗ്യാസ് ഉപയോഗിക്കുന്ന യൂണിറ്റുകളില് പകുതിയിലധികവും, ഡ്യുവല് ഫ്യൂവല് യൂണിറ്റുകളില് 70 ശതമാനത്തോളവും പ്രവര്ത്തനം നിര്ത്തിയെന്നാണ് റിപ്പോര്ട്ടുകള്. ഈ സ്ഥിതി തുടര്ന്നാല് തൊഴിലും കയറ്റുമതിയും പ്രതിസന്ധിയിലാകുമെന്ന് വ്യവസായ സംഘടനകള് മുന്നറിയിപ്പ് നല്കുന്നു.
വലിയ കമ്പനികള്ക്ക് ഈ പ്രതിസന്ധി പൂര്ണമായും ദോഷകരമാകണമെന്നില്ല. കജാരിയ, സോമാനി, സെറ പോലുള്ള വലിയ കമ്പനികള്ക്ക് 45 മുതല് 60 ദിവസത്തേക്ക് മതിയാകുന്ന സ്റ്റോക്ക് കൈവശമുണ്ടെന്നാണ് കണക്കുകള്. ചെറുകിട യൂണിറ്റുകള്ക്ക് സാധാരണയായി 18 മുതല് 20 ദിവസത്തെ സ്റ്റോക്കാണ് ഉള്ളത്. ഉത്പാദനം കുറയുന്നതോടെ വിപണിയില് ടൈല് ലഭ്യത കുറയുകയും വലിയ കമ്പനികള്ക്ക് വില 7-15% വരെ ഉയര്ത്താനുള്ള സാധ്യതയും ഉണ്ടെന്നാണ് വിലയിരുത്തല്.
ഇന്ത്യയിലെ ടൈല് വ്യവസായത്തിന്റെ അടുത്ത നീക്കം പശ്ചിമേഷ്യയിലെ രാഷ്ട്രീയ സാഹചര്യത്തെ ആശ്രയിച്ചായിരിക്കും. യുദ്ധം നീണ്ടാല് മോര്ബിയിലെ കൂടുതല് യൂണിറ്റുകള് അടച്ചുപൂട്ടേണ്ടി വരാനും ഓഹരി വിപണിയില് കൂടി സമ്മര്ദ്ദം വര്ധിക്കാനും സാധ്യതയുണ്ട്. എന്നാല് സാഹചര്യം ശമിച്ചാല് നിലവിലെ ഇടിവ് താല്ക്കാലികമായേക്കാമെന്നും ചില വിപണി വിദഗ്ധര് വിലയിരുത്തുന്നു.
Read DhanamOnline in English
Subscribe to Dhanam Magazine
