കഴിഞ്ഞ ഒരു മാസത്തിനുള്ളിൽ ഇന്ത്യൻ ഓഹരി വിപണിയിലെ നിഫ്റ്റി മെറ്റൽ സൂചികയിൽ 8.53 ശതമാനത്തിന്റെ വലിയ ഇടിവാണ് രേഖപ്പെടുത്തിയത്. പശ്ചിമേഷ്യയിലെ ഭൗമരാഷ്ട്രീയ സംഘർഷങ്ങൾ (യുഎസ്-ഇറാൻ യുദ്ധം), ആഗോള തലത്തിലെ അനിശ്ചിതത്വം, അടിസ്ഥാന ലോഹങ്ങളുടെ വിലയിലെ ചാഞ്ചാട്ടം, നിക്ഷേപകർ നടത്തിയ ലാഭമെടുപ്പ് (Profit-taking) എന്നിവയാണ് ഈ തകർച്ചയ്ക്ക് പ്രധാന കാരണങ്ങള്.
സൂചിക ഇടിഞ്ഞെങ്കിലും മെറ്റല് ഓഹരികളെക്കുറിച്ച് ശുഭാപ്തിവിശ്വാസമാണ് അനലിസ്റ്റുകള് പ്രകടിപ്പിക്കുന്നത്. ഓഹരി വില താഴുന്നത് നിക്ഷേപകർക്ക് ഒരു വാങ്ങൽ അവസരമായി (Buy on Dips) കാണാമെന്നാണ് ഇവരുടെ വിലയിരുത്തൽ. ആഭ്യന്തര വിപണിയിലെ ശക്തമായ ഡിമാൻഡും സുരക്ഷാ തീരുവയും മെറ്റല് കമ്പനികൾക്ക് ദീർഘകാലാടിസ്ഥാനത്തിൽ ഗുണകരമാണ്.
നിലവിലെ പാദത്തിൽ എച്ച്ആർസി (Hot-rolled coil, HRC) വിലയിൽ 14 ശതമാനവും റീബാർ വിലയിൽ (rebar prices) 7 ശതമാനവും വർദ്ധനവുണ്ടായിട്ടുണ്ട്. എന്നാൽ അസംസ്കൃത വസ്തുക്കളായ കോക്കിംഗ് കോൾ, ഇരുമ്പയിര് എന്നിവയുടെ വിലയിൽ 2 ശതമാനം വർദ്ധനവ് മാത്രമേ ഉണ്ടായുള്ളൂ എന്നത് കമ്പനികളുടെ ലാഭവിഹിതം (Spread) വർദ്ധിപ്പിക്കാൻ സഹായിക്കും.
ഹോർമുസ് കടലിടുക്കിലെ (Strait of Hormuz) തടസങ്ങൾ എൽഎൻജി (LNG), എൽപിജി വിതരണത്തെ ബാധിക്കുന്നത് ഗ്യാസിനെ ആശ്രയിക്കുന്ന ജെഎസ്ഡബ്ല്യു സ്റ്റീൽ, എഎംഎൻഎസ് ഇന്ത്യ തുടങ്ങിയ കമ്പനികൾക്ക് വെല്ലുവിളിയാണ്. എന്നാൽ ടാറ്റാ സ്റ്റീൽ, സെയിൽ (SAIL) തുടങ്ങിയ സംയോജിത സ്ഥാപനങ്ങളെ (Integrated players) ഇത് കാര്യമായി ബാധിക്കില്ല.
മെറ്റല് മേഖലയിലെ പ്രമുഖ ഓഹരികളായ ടാറ്റാ സ്റ്റീൽ (ലക്ഷ്യവില ₹220), കോൾ ഇന്ത്യ (ലക്ഷ്യവില ₹500), എപിഎൽ അപ്പോളോ ട്യൂബ്സ് എന്നിവയ്ക്ക് 'ബൈ' (Buy) റേറ്റിംഗാണ് ആക്സിസ് സെക്യൂരിറ്റീസ് നൽകിയിരിക്കുന്നത്. അതേസമയം, സെയിൽ (SAIL), ഹിൻഡാൽകോ, നാൽകോ (NALCO) എന്നീ ഓഹരികൾക്ക് നിലവിൽ 'ഹോൾഡ്' (Hold) റേറ്റിംഗാണ് നൽകിയിരിക്കുന്നത്. നിലവിലെ വിപണി സാഹചര്യം കണക്കിലെടുത്ത് കൃത്യമായ പഠനത്തിന് ശേഷം മാത്രം നിക്ഷേപം നടത്തുന്നതാണ് ഉചിതം.
Disclaimer: മേൽസൂചിപ്പിച്ച വിവരങ്ങള് പഠനാവശ്യാർത്ഥം പങ്കുവെച്ചതാണ്. ഓഹരി നിക്ഷേപം വിപണിയുടെ നഷ്ടസാധ്യതകൾക്ക് വിധേയമാണ്. നിക്ഷേപത്തിന് മുൻപ് സ്വന്തം നിലയിൽ കൂടുതൽ പഠിക്കുകയോ അല്ലെങ്കിൽ സെബി അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യാവുന്നതാണ്.
Read DhanamOnline in English
Subscribe to Dhanam Magazine
