റഷ്യന് എണ്ണ വാങ്ങുന്നതിന്റെ പേരില് പിഴച്ചുങ്കം ചുമത്തിയതോടെ മോശമായ ഇന്ത്യ-യു.എസ് ബന്ധത്തില് നേരിയ മഞ്ഞുരുക്കം. വളരെ നല്ല സുഹൃത്തായ പ്രധാനമന്ത്രി നരേന്ദ്ര മോദിയുമായി വരും ആഴ്ചകളിൽ സംസാരിക്കാൻ ആഗ്രഹിക്കുന്നതായി ട്രംപ് പറഞ്ഞു. ഇരു രാജ്യങ്ങളും തമ്മിലുള്ള വ്യാപാര തടസങ്ങൾ പരിഹരിക്കുന്നതിനുള്ള ചർച്ചകൾ വിജയകരമായ പരിസമാപ്തിയിലെത്താന് ബുദ്ധിമുട്ട് ഉണ്ടാകില്ലെന്നും ട്രംപ് പറഞ്ഞു.
ഇന്ത്യയും യുഎസും അടുത്ത സുഹൃത്തുക്കളും സ്വാഭാവിക വ്യാപാര പങ്കാളികളുമാണെന്ന് മോദി ഇതിനോട് പ്രതികരിച്ചു. രണ്ട് ജനതയ്ക്കും കൂടുതല് തിളക്കമുള്ള ഭാവി ഉറപ്പാക്കാന് ഇരു രാജ്യങ്ങളും ഒരുമിച്ച് പ്രവർത്തിക്കുമെന്നും മോദി പറഞ്ഞു.
ഇന്ത്യ-യുഎസ് വ്യാപാര ചർച്ചകളെക്കുറിച്ചുള്ള ട്രംപിന്റെ സൂചനകൾ ഇരു രാജ്യങ്ങളും തമ്മിലുള്ള വ്യാപാര കരാർ സംബന്ധിച്ച പ്രതീക്ഷകളെ വീണ്ടും ഉണർത്തിയിരിക്കുകയാണ്. യുഎസിലേക്കുള്ള ഇന്ത്യൻ കയറ്റുമതിയുടെ 25 ശതമാനം അധിക തീരുവ നിർത്തലാക്കാൻ കഴിയുമെന്ന പ്രതീക്ഷകളെ ഇത് കൂടുതൽ ശക്തിപ്പെടുത്തിയിട്ടുണ്ട്. താരിഫ് മൂലം പ്രതിസന്ധിയിലായിരിക്കുന്ന മേഖലകളായ തുണിത്തരങ്ങൾ, രത്നങ്ങൾ, ആഭരണങ്ങൾ, ചില ഇനം ഭക്ഷ്യവസ്തുക്കൾ, ഇലക്ട്രോണിക്സ് തുടങ്ങിയവയ്ക്ക് വലിയ ആശ്വാസമാകുന്നതാണ് പുതിയ നീക്കം.
ബുധനാഴ്ച നടന്ന ആദ്യ ഇടപാടുകളിൽ സെൻസെക്സും നിഫ്റ്റിയും ഏകദേശം അര ശതമാനം ഉയർന്നു. അതേസമയം, ട്രംപിന്റെ പ്രസ്താവനകളുടെ പേരില് വലിയൊരു കുതിപ്പ് നേരത്തെ പ്രതീക്ഷിക്കേണ്ടെന്ന അഭിപ്രായവും വിപണി വിദഗ്ധര് പങ്കുവെക്കുന്നു. വാക്കുകളിലല്ല, ട്രംപിന്റെ പ്രവൃത്തികളിലായിരിക്കണം വിപണി ശ്രദ്ധ കേന്ദ്രീകരിക്കേണ്ടതെന്ന അഭിപ്രായമാണ് പൊതുവെ ഉയരുന്നത്. ഷാങ്ഹായ് (Shanghai Cooperation Organisation, SCO) യോഗത്തിന് ശേഷം ട്രംപ് ഒരു പരിധിവരെ പ്രതിരോധാത്മക നിലപാട് സ്വീകരിച്ചതായാണ് കാണപ്പെടുന്നത്.
വിപണിയെ മുന്നോട്ട് നയിക്കുന്ന പ്രധാന ഘടകം കമ്പനികളുടെ വരുമാനത്തിലെ വീണ്ടെടുക്കലായിരിക്കും. ആഭ്യന്തര പരിഷ്കാരങ്ങൾ, പലിശ നിരക്ക് കുറയ്ക്കൽ, ആഗോള അനിശ്ചിതത്വങ്ങൾ ലഘൂകരിക്കൽ എന്നിവയുടെ പിന്തുണയോടെ ഡിസംബർ പാദത്തിൽ നിന്ന് വരുമാനം വർദ്ധിക്കുമെന്നാണ് വിദഗ്ദ്ധരുടെ പ്രതീക്ഷ. 2024 സെപ്റ്റംബറിലെ റെക്കോർഡ് ഉയരം സുസ്ഥിരമായി മറികടക്കാൻ ഇന്ത്യൻ ഓഹരി വിപണിക്ക് വരുമാന ശക്തി ആവശ്യമാണ്.
ട്രംപിന്റെ പോസ്റ്റ് പോസിറ്റീവ് ആയി വിലയിരുത്താവുന്നതാണ്. വ്യാപാര കരാറിന്റെ തുടർച്ച എന്ന നിലയിലുളള പ്രസ്താവന ഇന്ത്യൻ വിപണികൾക്ക് പോസിറ്റീവ് ഉത്തേജകമായിരിക്കും. ഇന്ത്യൻ ഓഹരി വിപണി ഏകദേശം 12 മാസമായി തിരിച്ചുവരവ് കൂടാതെയാണ് കടന്നുപോയത്. അതിനാല് തിരിച്ചുവരവ് ആസന്നമാണ്. പക്ഷേ ഓഹരികളുടെ ഉയർന്ന മൂല്യനിർണയങ്ങളെ ന്യായീകരിക്കാൻ വരുമാനം വര്ധിക്കേണ്ടത് അത്യാവശ്യ ഘടകമാണെന്ന് വിദഗ്ധര് ചൂണ്ടിക്കാട്ടുന്നു.
Trump’s trade decisions spark optimism in Indian stock markets amidst evolving Indo-US economic ties.
Read DhanamOnline in English
Subscribe to Dhanam Magazine
