ഇന്ത്യൻ ഓഹരി വിപണിയുടെ റേറ്റിംഗ് താഴ്ത്തി പ്രമുഖ ആഗോള ബ്രോക്കറേജ് സ്ഥാപനമായ ഗോൾഡ്മാൻ സാക്സ്. നിഫ്റ്റി 50 ന്റെ അടുത്ത 12 മാസത്തെ ലക്ഷ്യം മുൻപ് നിശ്ചയിച്ചിരുന്ന 29,300 ൽ നിന്ന് 25,900 ആയി കുറച്ചു. ഇന്ത്യൻ വിപണിയുടെ റേറ്റിംഗ് 'ഓവർവെയ്റ്റിൽ' (Overweight) നിന്ന് 'മാർക്കറ്റ് വെയ്റ്റിലേക്ക്' (Marketweight) മാറ്റുകയും ചെയ്തു. അമേരിക്ക-ഇറാൻ യുദ്ധത്തെത്തുടർന്ന് ക്രൂഡ് ഓയിൽ വിലയിലുണ്ടായ വർദ്ധനയാണ് വിപണിക്ക് തിരിച്ചടിയാകുന്നത്.
ഹോർമുസ് കടലിടുക്കിലെ (Strait of Hormuz) സംഘർഷം മൂലം എണ്ണവില ദീർഘകാലം ഉയർന്ന നിലയിൽ തുടരുന്നത് ഇന്ത്യയുടെ ആഭ്യന്തര സാമ്പത്തിക മേഖലയെ ദോഷകരമായി ബാധിക്കുമെന്ന് ഗോൾഡ്മാൻ സാക്സ് നിരീക്ഷിക്കുന്നു. എണ്ണവിലയിലുണ്ടാകുന്ന ആഘാതം കാരണം 2026 ലെ ഇന്ത്യയുടെ ജിഡിപി (GDP) വളർച്ചാ നിരക്ക് 5.9 ശതമാനമായി കുറയുമെന്നും ബ്രോക്കറേജ് സ്ഥാപനം പ്രവചിക്കുന്നു. കൂടാതെ, രൂപയുടെ മൂല്യം ഇടിയാനും 2026 ൽ ആർബിഐ (RBI) റിപ്പോ നിരക്കിൽ 50 ബേസിസ് പോയിന്റ് വർദ്ധന വരുത്താനും സാധ്യതയുണ്ട്.
മറ്റ് ഏഷ്യൻ വിപണികളെ അപേക്ഷിച്ച് എണ്ണവിലയിലെ മാറ്റങ്ങൾ ഇന്ത്യൻ വിപണിയെ കൂടുതൽ പ്രതികൂലമായി ബാധിക്കും. ശരാശരി എണ്ണവില മൂന്ന് മാസത്തേക്ക് ബാരലിന് 45 ഡോളർ വർദ്ധിച്ചാൽ ഇന്ത്യയുടെ പ്രതിവർഷ വരുമാന വളർച്ചയിൽ 9 ശതമാനം വരെ കുറവുണ്ടാകാം. വരുമാന വളർച്ച മന്ദഗതിയിലാകുന്നത് വിദേശ നിക്ഷേപകർ ഓഹരികൾ വിറ്റഴിക്കുന്നത് തുടരാൻ കാരണമായേക്കാം.
നിലവിലെ സാഹചര്യത്തിൽ ബാങ്കുകൾ, ടെലികോം, ഡിഫൻസ്, നിത്യോപയോഗ സാധനങ്ങൾ (Staples) എന്നീ മേഖലകളിൽ ഗോൾഡ്മാൻ സാക്സ് പോസിറ്റീവ് മനോഭാവം തുടരുന്നു. എന്നാൽ പലിശ നിരക്ക് വർദ്ധനവും പണപ്പെരുപ്പവും ബാധിക്കാൻ സാധ്യതയുള്ളതിനാൽ ഓട്ടോമൊബൈൽ, കൺസ്യൂമർ ഡ്യൂറബിൾസ്, എൻബിഎഫ്സി (NBFC) എന്നീ മേഖലകളുടെ റേറ്റിംഗ് താഴ്ത്തി. ഐടി (IT), ഫാർമ, കെമിക്കൽസ് മേഖലകളിലും നിലവിൽ 'അണ്ടർവെയ്റ്റ്' (Underweight) റേറ്റിംഗാണ് നൽകിയിരിക്കുന്നത്. സുസ്ഥിരമായ വരുമാനവും ശക്തമായ ബാലൻസ് ഷീറ്റുമുള്ള ഗുണനിലവാരമുള്ള കമ്പനികളിലേക്ക് നിക്ഷേപം മാറ്റാനാണ് ബ്രോക്കറേജ് സ്ഥാപനം നിക്ഷേപകർക്ക് നൽകുന്ന നിർദേശം.
Read DhanamOnline in English
Subscribe to Dhanam Magazine
