ജിയോയ്ക്ക് പിന്നാലെ ഇന്ത്യൻ ഐപിഒ വിപണി പിടിച്ചുകുലുക്കാൻ കൊക്കോ കോളയും എത്തുന്നു; ഡിആർഎച്ച്പി ഈയാഴ്ച ഫയൽ ചെയ്തേക്കും

ഇന്ത്യൻ വിപണിയിൽ ചരിത്രം കുറിച്ച ജിയോ പ്ലാറ്റ്‌ഫോംസ് പൊതുഓഹരി വില്പനയ്ക്ക് (IPO) പിന്നാലെ ഇന്ത്യയുടെ പ്രൈമറി മാർക്കറ്റിലേക്ക് മറ്റൊരു വൻകിട കമ്പനി കൂടി ചുവടുവെക്കുന്നു. ആഗോള ബ്രാൻഡ് ആയ കോക്കോ-കോളയുടെ (Coca Cola) ഇന്ത്യൻ ബോട്ടിലിങ് വിഭാഗമായ ഹിന്ദുസ്ഥാൻ കോക്കോ-കോള ഹോൾഡിങ്‌സ് (HCCH) പ്രാരംഭ പൊതുഓഹരി വില്പനയ്ക്കുള്ള ഡ്രാഫ്റ്റ് റെഡ് ഹെറിങ് പ്രോസ്‌പെക്ടസ് (DRHP), വിപണി നിയന്ത്രകരായ സെബിക്ക് (SEBI) മുമ്പാകെ ഈയാഴ്ച തന്നെ ഫയൽ ചെയ്തേക്കുമെന്ന് റിപ്പോർട്ട്. ഏകദേശം ഒരു ബില്യൺ ഡോളർ (ഏകദേശം 9,500 കോടി രൂപ) സമാഹരിക്കാനാണ് ഈ മെഗാ ഐപിഒയിലൂടെ കമ്പനി ലക്ഷ്യമിടുന്നത്.

ഓഹരി വിപണിയിലേക്ക്

പൂർണമായും ഓഫർ-ഫോർ-സെയിൽ (OFS) മാതൃകയിലായിരിക്കും ഹിന്ദുസ്ഥാൻ കോക്കോ-കോള ഹോൾഡിങ്‌സിന്റെ പ്രാരംഭ പൊതുഓഹരി വില്പന (IPO) നടക്കുകയെന്നാണ് സൂചന. ഇന്ത്യയിലെ ബോട്ടിലിങ് പ്രവർത്തനങ്ങൾ റിഫ്രാഞ്ചൈസ് ചെയ്യാനുള്ള കോക്കോ-കോള കമ്പനിയുടെ തന്ത്രപരമായ ദീർഘകാല പദ്ധതികളുടെ ഭാഗമായാണ് ഈ നീക്കം. ഐപിഒ നടപടികൾക്കായി പ്രമുഖ ആ​ഗോള സാമ്പത്തിക ഉപദേശക സ്ഥാപനമായ റോത്ത്‌സ്‌ചൈൽഡ് & കോ ബാങ്കിനെ (Rothschild & Co) കൺസൾട്ടന്റായി നിയമിച്ചിട്ടുണ്ട്. ഹിന്ദുസ്ഥാൻ കോക്കോ-കോള ഹോൾഡിങ്‌സിന്റെ ഐപിഒയുമായി ബന്ധപ്പെട്ട ഔദ്യോഗിക ഫയലിങ് (DRHP) ഈ ആഴ്ചയിൽ തന്നെ സെബിക്ക് (SEBI) സമർപ്പിച്ചേക്കുമെന്ന് മണികൺട്രോൾ റിപ്പോർട്ട് ചെയ്തു.

കമ്പനി വിശദാംശം

രാജ്യത്ത് 1997-ൽ പ്രവർത്തനം ആരംഭിച്ച ഹിന്ദുസ്ഥാൻ കോക്കോ-കോള ഹോൾഡിങ്‌സിന്, നിലവിൽ 10 സംസ്ഥാനങ്ങളിലായി 14 അത്യാധുനിക ബോട്ടിലിങ് പ്ലാന്റുകളുണ്ട്. ആഗോള ബ്രാൻഡുകളായ കോക്കോ-കോള, തംസ് അപ്പ്, സ്‌പ്രൈറ്റ്, ഫാന്റ എന്നിവയുടെ പാക്കേജിംഗും വിതരണവും നിർവഹിക്കുന്നത് ഈ കമ്പനിയാണ്. 2,000-ത്തിലധികം വിതരണക്കാരുടെ ശക്തമായ ശൃംഖലയിലൂടെ 17 ലക്ഷത്തിലധികം റീട്ടെയിൽ ഔട്ട്‌ലെറ്റുകളിലേക്ക് കമ്പനിയുടെ ഉൽപ്പന്നങ്ങൾ നേരിട്ടെത്തുന്നുണ്ട്.

ഏകദേശം 5,000 ജീവനക്കാരാണ് ഹിന്ദുസ്ഥാൻ കോക്കോ-കോള ഹോൾഡിങ്‌സിനായി ജോലി ചെയ്യുന്നത്. കമ്പനിയുടെ ഓഹരി പങ്കാളിത്തത്തിലേക്ക് വന്നാൽ, 2025 ജൂലൈയിൽ പ്രമുഖ വ്യവസായ ഗ്രൂപ്പായ ജൂബിലന്റ് ഭാരതിയ ഗ്രൂപ്പ് ഹിന്ദുസ്ഥാൻ കോക്കോ-കോള ഹോൾഡിങ്‌സിന്റെ 40 ശതമാനം ഓഹരികൾ സ്വന്തമാക്കിയിരുന്നു. ബാക്കി 60 ശതമാനം ഓഹരികളും കോക്കോ-കോള കമ്പനിയുടെ കൈവശം നിലനിർത്തിയിക്കുന്നു.

എന്തുകൊണ്ട് ഈ ഐപിഒ ശ്രദ്ധേയമാകുന്നു?

ഇന്ത്യയിലെ ഏറ്റവും വലിയ ബിവറേജ് ബോട്ടിലറുകളിലൊന്ന് പബ്ലിക് മാർക്കറ്റിലേക്ക് എത്തുമ്പോൾ അത് കൺസ്യൂമർ-സ്റ്റേപ്പിൾസ് (അനിവാര്യ ഉപഭോക്തൃ ഉൽപ്പന്നങ്ങൾ) സെക്ടറിന് പുതിയ കരുത്തേകും. കോക്കോ-കോള കമ്പനി തങ്ങളുടെ നേരിട്ടുള്ള ഉടമസ്ഥതയിലുള്ള ബിസിനസ് ഘടനയിൽ നിന്ന് ഫ്രാഞ്ചൈസി മോഡലിലേക്ക് മാറുന്നതിന്റെ അടുത്ത നിർണായക ഘട്ടം കൂടിയാണിത്. ഈ മാറ്റത്തോടെ പ്രാദേശിക പങ്കാളികൾക്കായിരിക്കും ഉത്പാദനം, വിതരണം, റീട്ടെയിൽ വിപണനം എന്നിവയുടെ പൂർണ ചുമതല.

സമീപകാലത്ത് വിപണിയിലെത്തിയ ജിയോ പ്ലാറ്റ്ഫോംസ് ഐപിഒയ്ക്ക് പിന്നാലെ ഹിന്ദുസ്ഥാൻ കോക്കോ-കോള ഹോൾഡിങ്‌സ് (HCCH) കൂടി എത്തുന്നതോടെ ഇന്ത്യൻ ഐപിഒ വിപണിയുടെ വൈവിധ്യമാണ് വ്യക്തമാകുന്നത്. ഡിജിറ്റൽ ഇൻഫ്രാസ്ട്രക്ചർ രംഗത്തുനിന്നും ദൈനംദിന ഉപഭോക്തൃ ഉൽപ്പന്നങ്ങളിലേക്ക് വിപണിയുടെ ശ്രദ്ധ മാറുന്നു എന്നതിന്റെ സൂചനയാണിതെന്നും അനലിസ്റ്റുകൾ ചൂണ്ടിക്കാട്ടി.

Hindustan Coca-Cola Holdings is reportedly preparing a roughly ₹9,500 crore IPO, with its draft prospectus expected to be filed with SEBI this week.