പശ്ചിമേഷ്യയിലെ യുഎസ്-ഇസ്രായേല്-ഇറാന് സംഘര്ഷം ശക്തമാകുന്നതോടെ ആഗോള വിപണികളില് അനിശ്ചിതത്വം വര്ധിച്ചിരിക്കുകയാണ്. ഇതിന്റെ പ്രതിഫലനം ഇന്ത്യന് ഓഹരി വിപണിയിലും പ്രകടം. ക്രൂഡ് ഓയില് വില ഉയര്ന്നതു കൊണ്ടും നിക്ഷേപകര് സുരക്ഷിത ആസ്തികളിലേക്ക് മാറിത്തുടങ്ങിയത് കൊണ്ടും വിപണിയില് വന് അസ്ഥിരതയാണ് രൂപപ്പെട്ടത്.
ഇത്തരം സാഹചര്യങ്ങളില് പല നിക്ഷേപകരും പരിഭ്രാന്തിയോടെ ഓഹരി വില്ക്കുന്നു. എന്നാല് വിപണി വിദഗ്ധര് പറയുന്നത് യുദ്ധമോ രാഷ്ട്രീയ സംഘര്ഷങ്ങളോ മൂലമുള്ള വിപണി ഇടിവുകള് പലപ്പോഴും താല്ക്കാലികമായിരിക്കും എന്നതാണ്. അതുകൊണ്ട് ദീര്ഘകാല നിക്ഷേപ ലക്ഷ്യങ്ങളെ മറക്കാതെ ശാന്തമായ സമീപനം സ്വീകരിക്കുകയാണ് നല്ലത്.
വിദഗ്ധരുടെ അഭിപ്രായത്തില് ഈ സാഹചര്യത്തില് നിക്ഷേപകര് ശ്രദ്ധിക്കേണ്ട ഏതാനും പ്രധാന കാര്യങ്ങള് പറയാം.
ആദ്യമായി, വിപണിയിലെ ഇടിവു കണ്ട് പെട്ടെന്ന് പോര്ട്ട്ഫോളിയോയില് വലിയ മാറ്റങ്ങള് വരുത്തരുത്. വിപണി താഴേക്ക് പോകുമ്പോള് തിടുക്കത്തില് തന്ത്രം മാറ്റിയാല് കൂടുതല് നഷ്ടം ഉണ്ടാകാം.
രണ്ടാമതായി, ശക്തമായ അടിത്തറയുള്ള കമ്പനികളിലാണ് നിക്ഷേപം നിലനിര്ത്തേണ്ടത്. സ്ഥിരമായ വരുമാനവും കുറഞ്ഞ കടബാധ്യതയും ഉള്ള കമ്പനികള് ഇത്തരം അസ്ഥിര സാഹചര്യങ്ങളില് മികച്ച പ്രകടനം കാഴ്ചവയ്ക്കാന് സാധ്യതയുണ്ട്.
മൂന്നാമതായി, നിക്ഷേപങ്ങള് വ്യത്യസ്ത മേഖലകളിലേക്ക് വ്യാപിപ്പിക്കുന്നതും പ്രധാനമാണ്. ഓഹരികള്ക്കൊപ്പം സ്വര്ണം, ബോണ്ടുകള് പോലുള്ള ആസ്തികളിലും നിക്ഷേപം ഉണ്ടായാല് അപകടസാധ്യത കുറയ്ക്കാന് സഹായിക്കും.
നാലാമതായി, വിപണി ഇടിവ് ചിലപ്പോള് മികച്ച അവസരവുമാകാം. ഗുണമേന്മയുള്ള ഓഹരികള് കുറഞ്ഞ വിലയില് വാങ്ങാനുള്ള അവസരമായി ഇതിനെ കാണുന്ന നിക്ഷേപകരുമുണ്ട്.
പശ്ചിമേഷ്യയിലെ സംഘര്ഷം നീണ്ടുനില്ക്കുകയാണെങ്കില് ക്രൂഡ് ഓയില് വിലയും ആഗോള സാമ്പത്തിക സാഹചര്യങ്ങളും വിപണിയെ തുടര്ന്നും സ്വാധീനിക്കാനിടയുണ്ട്. എന്നാല് ചരിത്രം കാണിക്കുന്നത് ഇത്തരം ജിയോപൊളിറ്റിക്കല് ആഘാതങ്ങള് സാധാരണയായി വിപണിയില് ദീര്ഘകാല തകര്ച്ചയ്ക്ക് കാരണമാകാറില്ല എന്നതാണ്.
അതുകൊണ്ട് തന്നെ, ഈ അനിശ്ചിത സാഹചര്യത്തില് നിക്ഷേപകര്ക്ക് ഏറ്റവും പ്രധാനമായി വേണ്ടത് ശാന്തമായ സമീപനമാണ്. ദീര്ഘകാല നിക്ഷേപത്തില് മനസു വെക്കുക.
Read DhanamOnline in English
Subscribe to Dhanam Magazine
