ഇന്ത്യയും യുഎസും തമ്മില് കുറച്ചു കാലമായി നിലനിന്ന വ്യാപാര കരാര് അനിശ്ചിതത്വം അവസാനിപ്പിക്കുന്നുവെന്ന പ്രതീതിയില് അടിച്ചു കയറി ഇന്ത്യന് ഓഹരി വിപണി. തീരുവ ഇളവ് പ്രഖ്യാപിച്ചതോടെ വിപണികളില് ഉണര്വ് പ്രകടമായതോടൊപ്പം, തുടര്ച്ചയായി പിന്മാറിക്കൊണ്ടിരുന്ന വിദേശ സ്ഥാപന നിക്ഷേപകര് (FII) വീണ്ടും ഇന്ത്യന് വിപണിയിലേക്ക് മടങ്ങിയെത്തുമോയെന്ന ചര്ച്ചകളും ശക്തം.
കരാര് പ്രഖ്യാപനത്തിന് പിന്നാലെ നിഫ്റ്റി 50, സെന്സെക്സ് സൂചികകള് ശക്തമായി ഉയര്ന്നു. കയറ്റുമതിയുമായി ബന്ധപ്പെട്ട മേഖലകള്, പ്രത്യേകിച്ച് എന്ജിനീയറിംഗ് ഉല്പ്പന്നങ്ങള്, ഓട്ടോ ഘടകങ്ങള്, വസ്ത്രവ്യവസായം തുടങ്ങിയ ഓഹരികളിലാണ് കൂടുതല് വാങ്ങല് താല്പര്യം പ്രകടമായത്. രൂപയും ഡോളര് വിനിമയത്തില് നേട്ടമുണ്ടാക്കി.
കരാര് പ്രകാരം, ഇന്ത്യയില് നിന്നുള്ള ചില ഉല്പ്പന്നങ്ങള്ക്ക് യുഎസ് ഈടാക്കിയിരുന്ന ഉയര്ന്ന തീരുവകള് ഗണ്യമായി കുറയ്ക്കും. മുമ്പ് ചില മേഖലകളില് 50 ശതമാനം വരെ എത്തിയിരുന്ന തീരുവകള് ഏകദേശം 18 ശതമാനമായി കുറയുമെന്നാണ് വിലയിരുത്തല്. ഇതോടെ ഇന്ത്യന് കയറ്റുമതി കമ്പനികളുടെ മത്സരം വര്ധിക്കുകയും ലാഭസാധ്യത മെച്ചപ്പെടുകയും ചെയ്യും എന്നാണ് വിപണി വിദഗ്ധരുടെ വിലയിരുത്തല്.
2025-ലും 2026 ആരംഭത്തിലും ഇന്ത്യന് ഓഹരി വിപണിയില് നിന്ന് എഫ്ഐഐകള് വന്തോതില് പണം പിന്വലിച്ചിരുന്നു. വ്യാപാര തര്ക്കങ്ങളും തീരുവ വര്ധനവും ആഗോള അനിശ്ചിതത്വവും ചേര്ന്നതാണ് ഈ പിന്മാറ്റത്തിന് പ്രധാന കാരണം. കണക്കുകള് പ്രകാരം, കഴിഞ്ഞ വര്ഷം മാത്രം ഒരു ലക്ഷം കോടി രൂപയ്ക്കു മുകളിലാണ് വിദേശ നിക്ഷേപകര് ഇന്ത്യന് വിപണിയില് നിന്ന് പിന്വലിച്ചത്.
എന്നാല്, ഇന്ത്യ-യുഎസ് വ്യാപാര കരാര് പ്രഖ്യാപിച്ചതിന് പിന്നാലെ ഈ പിന്മാറ്റത്തിന്റെ വേഗം കുറഞ്ഞിട്ടുണ്ട്. ഫെബ്രുവരി ആരംഭത്തില് ചില ദിവസങ്ങളില് എഫ്ഐഐകള് നെറ്റ് വാങ്ങല് നടത്തിയതായും വിപണി ഡാറ്റ സൂചിപ്പിക്കുന്നു. തീരുവ സംബന്ധിച്ച വ്യക്തതയും നയപരമായ സ്ഥിരതയും മറ്റ് വിപണികളുമായി താരതമ്യം ചെയ്യുമ്പോള് ഇന്ത്യയെ കൂടുതല് ആകര്ഷകമാക്കുമെന്നാണ് ബ്രോക്കറേജ് സ്ഥാപനങ്ങളുടെ വിലയിരുത്തല്.
വിദേശ നിക്ഷേപകര് പിന്മാറിയ കാലഘട്ടത്തില് ആഭ്യന്തര സ്ഥാപന നിക്ഷേപകര് (DII) വിപണിക്ക് ശക്തമായ പിന്തുണ നല്കിയിരുന്നു. മ്യൂച്വല് ഫണ്ടുകളിലേക്കുള്ള സ്ഥിരമായ ഒഴുക്കാണ് ഇന്ത്യന് വിപണിയെ വലിയ തകര്ച്ചയില് നിന്ന് രക്ഷിച്ചത്. ഈ ആഭ്യന്തര നിക്ഷേപ പിന്തുണ തുടരുമെന്നത് വിപണിക്ക് ഒരു സുരക്ഷിതത്വ ഘടകമായി തുടരുന്നു.
ഇന്ത്യ-യുഎസ് വ്യാപാര കരാര് വിപണികള്ക്ക് ശക്തമായ പോസിറ്റീവ് സിഗ്നലാണെങ്കിലും, എഫ്ഐഐകള് തുടര്ച്ചയായി തിരിച്ചെത്തുമോ എന്നത് ആഗോള പലിശനിരക്കുകള്, കോര്പ്പറേറ്റ് ലാഭഫലങ്ങള്, മറ്റ് ജിയോപൊളിറ്റിക്കല് സംഭവവികാസങ്ങള് തുടങ്ങിയ ഘടകങ്ങളെ ആശ്രയിച്ചിരിക്കും എന്നാണ് വിദഗ്ധരുടെ മുന്നറിയിപ്പ്. രൂപയുടെ ചലനങ്ങളും ആഗോള മൂലധന ഒഴുക്കുകളും നിര്ണായകമായിത്തന്നെ തുടരും. വലിയൊരു നയ അനിശ്ചിതത്വം നീങ്ങിയതോടെ, 2026-ല് ഇന്ത്യയുടെ റിസ്ക്റിട്ടേണ് പ്രൊഫൈല് വിദേശ നിക്ഷേപകര്ക്ക് കൂടുതല് അനുകൂലമാകുമെന്നതാണ് വിപണിയിലെ പൊതുവായ വിലയിരുത്തല്.
Read DhanamOnline in English
Subscribe to Dhanam Magazine
