2025 ഇന്ത്യൻ ഓഹരി വിപണിയെ സംബന്ധിച്ചിടത്തോളം വലിയ തിരിച്ചടികളുടെ വർഷമായാണ് അവസാനിക്കുന്നത്. കഴിഞ്ഞ ഏതാനും വർഷങ്ങളായി ആഗോള തലത്തിൽ തന്നെ മികച്ച പ്രകടനം കാഴ്ചവെച്ചിരുന്ന ഇന്ത്യൻ സൂചികകൾ, 2025 ൽ മറ്റ് വികസ്വര വിപണികളെക്കാൾ (Emerging Markets) പിന്നിലായതായി റിപ്പോർട്ടുകൾ സൂചിപ്പിക്കുന്നു. നിഫ്റ്റി 50 ഈ വർഷം 10.7 ശതമാനം ഉയർന്നപ്പോൾ, സെൻസെക്സ് 9.5 ശതമാനം നേട്ടമാണ് രേഖപ്പെടുത്തിയത്. 1993 ന് ശേഷമുള്ള ഏറ്റവും മോശം പ്രകടനങ്ങളിലൊന്നാണ് നിഫ്റ്റിയും സെൻസെക്സും ഈ വർഷം രേഖപ്പെടുത്തിയത്.
2025 ൽ ജപ്പാനിലെ നിക്കി, ദക്ഷിണ കൊറിയയിലെ കോസ്പി എന്നിവ 28 ശതമാനവും 72 ശതമാനവും ഉയർന്നപ്പോള് ചൈനയുടെ സിഎസ്ഐ 300 സൂചിക 17 ശതമാനവും ഹോങ്കോങ്ങിലെ ഹാങ് സെങ് ഈ വർഷം 29 ശതമാനവും ഉയർന്നു. വാൾസ്ട്രീറ്റിൽ, എസ് & പി 500 സൂചിക 17 ശതമാനം നേട്ടമുണ്ടാക്കിയപ്പോൾ, 21 ശതമാനം നേട്ടമാണ് നാസ്ഡാക്ക് 100 ഉണ്ടാക്കിയത്.
പ്രധാനമായും മൂന്ന് കാരണങ്ങളാണ് ഇന്ത്യൻ വിപണിയിൽ അനുഭവപ്പെട്ട ഈ ഇടിവിന് പിന്നില്.
വിദേശ നിക്ഷേപകരുടെ പിൻവാങ്ങൽ: 2025 ൽ വിദേശ പോർട്ട്ഫോളിയോ നിക്ഷേപകർ (FPIs) ഇന്ത്യൻ വിപണിയിൽ നിന്ന് വലിയ തോതിൽ പണം പിൻവലിച്ചു. ചൈനീസ് വിപണികൾ കൂടുതൽ ആകർഷകമായതും അമേരിക്കൻ ബോണ്ട് യീൽഡിലെ വർദ്ധനവുമാണ് നിക്ഷേപകരെ ഇന്ത്യയിൽ നിന്ന് അകറ്റിയത്.
ലാഭക്ഷയവും ഉയർന്ന മൂല്യനിർണയവും: പല പ്രമുഖ കമ്പനികളുടെയും വരുമാന വളർച്ച നിക്ഷേപകർ പ്രതീക്ഷിച്ചതിലും താഴെയായിരുന്നു. ഇതിനോടൊപ്പം ഓഹരികളുടെ വില അവയുടെ യഥാർത്ഥ മൂല്യത്തേക്കാൾ (Valuation) വളരെ കൂടുതലായി നിന്നതും തിരുത്തലുകൾക്ക് കാരണമായി.
ആഗോള രാഷ്ട്രീയ സാഹചര്യങ്ങൾ: ഭൗമരാഷ്ട്രീയ സംഘർഷങ്ങളും ആഗോള സാമ്പത്തിക നയങ്ങളിലെ മാറ്റങ്ങളും വളർന്നുവരുന്ന വിപണികളെ മൊത്തത്തിൽ ബാധിച്ചെങ്കിലും, ഇന്ത്യയെ ഇത് കൂടുതൽ ഗുരുതരമായി ബാധിച്ചു. യുഎസ് താരിഫുകളും ആഭ്യന്തര വിപണിക്ക് തിരിച്ചടിയായി.
2025 ഇന്ത്യൻ ഓഹരി വിപണിക്ക് തിരുത്തലിന്റെയും പുനർചിന്തനത്തിന്റെയും വർഷമായി മാറി. വരും വർഷങ്ങളിൽ ശക്തമായ വരുമാന വളർച്ചയിലൂടെ മാത്രമാണ് വിപണിക്ക് ഈ തകർച്ചയിൽ നിന്ന് കരകയറാൻ സാധിക്കുക.
Indian stock markets underperformed in 2025, lagging behind major Asian peers due to FPI outflows, valuation concerns, and global uncertainties.
Read DhanamOnline in English
Subscribe to Dhanam Magazine
