മഹാരാഷ്ട്രയിലെ മുനിസിപ്പല് കോര്പ്പറേഷന് തെരഞ്ഞെടുപ്പുകളുടെ പശ്ചാത്തലത്തില് ജനുവരി 15ന് ഇന്ത്യയിലെ ഓഹരി വിപണികള് പൂര്ണമായി അടച്ചത് നിക്ഷേപകരിലും വിപണി വിദഗ്ധരിലും വിമര്ശനങ്ങള്ക്ക് ഇടയാക്കി. ബോംബെ സ്റ്റോക്ക് എക്സ്ചേഞ്ച് (BSE), നാഷണല് സ്റ്റോക്ക് എക്സ്ചേഞ്ച് (NSE) എന്നിവ എല്ലാ സെഗ്മെന്റുകളിലും വ്യാപാരം നിര്ത്തിവച്ചു.
മുംബൈ ഉള്പ്പെടെ 28 മുനിസിപ്പല് കോര്പ്പറേഷനുകളില് നടന്ന തിരഞ്ഞെടുപ്പുകള്ക്കായി മഹാരാഷ്ട്ര സര്ക്കാര് പ്രഖ്യാപിച്ച പൊതു അവധിയോടൊപ്പമാണ് വിപണികളും അടച്ചത്. ഇതോടെ ഇക്വിറ്റി, ഡെറിവേറ്റീവ്, കറന്സി, പലിശ നിരക്ക് ഡെറിവേറ്റീവ് വിഭാഗങ്ങളിലെ വ്യാപാരം പൂര്ണമായും നിലച്ചു.
ദേശീയതലത്തിലുള്ള ഡിജിറ്റല് വിപണികള് ഒരു പ്രാദേശിക തെരഞ്ഞെടുപ്പിന്റെ പേരില് അടയ്ക്കേണ്ടതുണ്ടോ എന്ന ചോദ്യമാണ് പ്രധാന വിമര്ശനമായി ഉയര്ന്നത്. സീറോധയുടെ സഹസ്ഥാപകനും സിഇഒയുമായ നിതിന് കാമത്ത് ഈ തീരുമാനത്തിനെതിരെ സമൂഹമാധ്യമങ്ങളില് പ്രതികരിച്ചു. ഒരു ദേശീയ ധനവിപണിയുടെ പ്രവര്ത്തനം സംസ്ഥാനതല ഭരണകാര്യങ്ങളുമായി ബന്ധിപ്പിക്കുന്നത് യുക്തിസഹമല്ലെന്ന നിലപാടാണ് അദ്ദേഹം പങ്കുവച്ചത്.
ഇന്നത്തെ സാഹചര്യത്തില് ഇന്ത്യയിലുടനീളം പ്രവര്ത്തിക്കുന്ന നിക്ഷേപകരും സ്ഥാപനങ്ങളും വിപണിയില് സജീവമാണ്. ബാങ്കുകളും മറ്റ് ധനകാര്യ സ്ഥാപനങ്ങളും മിക്ക സംസ്ഥാനങ്ങളിലും സാധാരണ പോലെ പ്രവര്ത്തിക്കുന്നു. അന്നേരം വിപണി അടച്ചത് വ്യാപാര തന്ത്രങ്ങളിലും വിലനിര്ണയത്തിലും തടസമുണ്ടാക്കുമെന്നാണ് വിമര്ശകരുടെ വാദം. അതേസമയം, പഴയ പ്രവര്ത്തന രീതികളും പ്രവര്ത്തനസൗകര്യങ്ങളും കണക്കിലെടുത്താണ് ഇത്തരം അവധികള് തുടരുന്നതെന്ന നിലപാടാണ് മറുവശത്ത്.
വിപണി അടച്ചതോടെ ആഗോള വിപണികളിലെ നീക്കങ്ങള്ക്കും ആഭ്യന്തര സാമ്പത്തിക സൂചനകള്ക്കും അനുസരിച്ച് നിലപാട് മാറ്റാന് നിക്ഷേപകര്ക്ക് സാധിച്ചില്ല. വര്ഷാരംഭത്തില് തന്നെ ചാഞ്ചാട്ടം ശക്തമായ സാഹചര്യത്തില് ഇത്തരമൊരു ഇടവേള അനിശ്ചിതത്വം വര്ധിപ്പിക്കുമെന്ന ആശങ്കയും വിപണിയില് ഉയരുന്നുണ്ട്.
കേന്ദ്ര ബജറ്റ് ഫെബ്രുവരി 1ന് അവതരിപ്പിക്കുമെന്ന് സര്ക്കാര് അറിയിച്ചതോടെ, ആ ദിവസം വിപണി പ്രവര്ത്തിക്കണമോ എന്ന ചര്ച്ച വീണ്ടും സജീവമായി. ഫെബ്രുവരി 1 ഈ വര്ഷം ഞായറാഴ്ചയായതിനാല്, സാധാരണ രീതിയില് അത് ട്രേഡിംഗ് ദിനമല്ല.
മുന്വര്ഷങ്ങളില് അവധി ദിനത്തില് ബജറ്റ് വന്നപ്പോള് പ്രത്യേക ട്രേഡിംഗ് സെഷനുകള് സംഘടിപ്പിച്ച അനുഭവം ഇന്ത്യക്കുണ്ട്. 2025ല് ഫെബ്രുവരി 1 ശനിയാഴ്ച BSEയും NSEയും പ്രത്യേക സെഷന് നടത്തി. ബജറ്റിലെ നികുതി, ചെലവ്, മേഖലാതല പ്രഖ്യാപനങ്ങള് എന്നിവയോട് ഉടന് പ്രതികരിക്കാന് ഇതു നിക്ഷേപകര്ക്ക് സഹായകമായി.
ബജറ്റ് ദിനത്തില് തന്നെ വ്യാപാരം നടക്കുന്നത് വിലനിര്ണയത്തിലെ സുതാര്യതയും വിപണി കാര്യക്ഷമതയും വര്ധിപ്പിക്കുമെന്ന് പല വിപണി വിദഗ്ധരും അഭിപ്രായപ്പെടുന്നു. ബജറ്റ് പ്രഖ്യാപനങ്ങള്ക്ക് പിന്നാലെ വിപണി തുറക്കുന്നത്, തിങ്കളാഴ്ച വരെ കാത്തിരിക്കേണ്ട അവസ്ഥ ഒഴിവാക്കും. എന്നാല്, ഇത്തരമൊരു പ്രത്യേക സെഷന് നടത്തണമെങ്കില് നിക്ഷേപകര്ക്ക് മുന്കൂട്ടി വ്യക്തമായ അറിയിപ്പുകള് നല്കേണ്ടതുണ്ട്. ബജറ്റ് ദിനത്തില് പ്രത്യേക ട്രേഡിംഗ് സെഷന് ഉണ്ടാകുമോ എന്ന കാര്യത്തില് ഔദ്യോഗിക തീരുമാനം വന്നിട്ടില്ല. പ്രവര്ത്തനപരമായ സാധ്യതകള് പഠിച്ചുവരികയാണെന്നാണ് എക്സ്ചേഞ്ച് വൃത്തങ്ങളില് നിന്നുള്ള സൂചന.
ജനുവരി 15 പോലുള്ള പ്രാദേശിക അവധികളും ഫെബ്രുവരി 1 പോലുള്ള ദേശീയ സാമ്പത്തിക ദിനങ്ങളും ഉയര്ത്തുന്ന ചോദ്യങ്ങള് ഇന്ത്യന് ഓഹരി വിപണികളുടെ പ്രവര്ത്തനരീതിയില് വ്യക്തമായ നയരൂപീകരണത്തിന്റെ ആവശ്യകത വീണ്ടും ഓര്മിപ്പിക്കുന്നു. ജനാധിപത്യ നടപടികളോടുള്ള ബഹുമാനവും ആധുനിക ദേശീയ ധനവിപണിയുടെ ആവശ്യകതകളും തമ്മില് സന്തുലനം കണ്ടെത്തുക എന്നതാണ് മുന്നിലുള്ള വെല്ലുവിളി.
കേന്ദ്ര ബജറ്റ് എന്നത് ഇന്ത്യന് ധനവിപണികള്ക്ക് വര്ഷത്തിലെ ഏറ്റവും നിര്ണായകമായ ദിവസങ്ങളിലൊന്നാണ്. നികുതി നയങ്ങള്, സര്ക്കാര് ചെലവ്, കടം എടുക്കല്, വിവിധ മേഖലകള്ക്കുള്ള വിഹിതം എന്നിവ ഓഹരി വിപണിയില് നേരിട്ട സ്വാധീനം ചെലുത്തുന്നു. സാധാരണയായി, നാഷണല് സ്റ്റോക്ക് എക്സ്ചേഞ്ച് (NSE), ബോംബെ സ്റ്റോക്ക് എക്സ്ചേഞ്ച് (BSE) എന്നിവ തിങ്കള് മുതല് വെള്ളി വരെ മാത്രമാണ് പ്രവര്ത്തിക്കുന്നത്. ശനി, ഞായര് ദിവസങ്ങള് വ്യാപാര അവധിയാണ്. ബജറ്റ് ദിവസം അവധിയായപ്പോള് പ്രത്യേക ട്രേഡിംഗ് സെഷന് നടത്തിയത് ഇന്ത്യന് വിപണികള്ക്ക് പുതിയ കാര്യമല്ല.
ബജറ്റ് ദിനത്തില് വിപണി പ്രവര്ത്തിക്കണമെന്ന അഭിപ്രായത്തിന് പിന്നില് ചില പ്രധാന കാരണങ്ങളുണ്ട്. ബജറ്റിലെ പ്രഖ്യാപനങ്ങള് കേട്ട ശേഷം നിക്ഷേപകര്ക്ക് അടുത്ത ദിവസം വരെ കാത്തിരിക്കാതെ അന്നേ തന്നെ തീരുമാനമെടുക്കാന് കഴിയണം എന്നാണ് പ്രധാന വാദം. അത് വഴി വിലനിര്ണയം (price discovery) കൂടുതല് സുതാര്യവും കാര്യക്ഷമവുമാകുമെന്ന് വിപണി വിദഗ്ധര് പറയുന്നു. അന്താരാഷ്ട്ര വിപണികള് തുറന്നിരിക്കുന്ന സമയത്ത് ഇന്ത്യന് വിപണി അടച്ചിരുന്നത് ഗ്യാപ്-അപ്പ്, ഗ്യാപ്-ഡൗണ് പോലുള്ള അപ്രതീക്ഷിത ചലനങ്ങള്ക്ക് കാരണമാകുമെന്ന ആശങ്കയും ഇവര് ചൂണ്ടിക്കാട്ടുന്നു. പ്രത്യേക ട്രേഡിംഗ് സെഷനുകളോട് പൂര്ണ പിന്തുണയില്ലാത്തവരുമുണ്ട്. ശനി, ഞായര് ദിവസങ്ങളില് ബാങ്കുകള്ക്കു പുറമെ, ക്ലിയറിംഗ് സ്ഥാപനങ്ങള്, ബാക്ക് ഓഫീസ് സംവിധാനങ്ങള് എന്നിവ പൂര്ണ ശേഷിയില് പ്രവര്ത്തിക്കാറില്ലെന്നതാണ് പ്രധാന വാദം.
Read DhanamOnline in English
Subscribe to Dhanam Magazine
