ജിയോ ഓഹരി ലിസ്റ്റിങ്ങിന് ശേഷം വാങ്ങണോ? ഐപിഒയിൽ ഓഹരി കിട്ടാത്തവർ എന്ത് വില വരെ നിക്ഷേപം പരി​ഗണിക്കാം?

ഇന്ത്യൻ വിപണിയിൽ ചരിത്രം കുറിച്ച ഏറ്റവും വലിയ പബ്ലിക് ഇഷ്യുവിന് (ഐപിഒ) ശേഷം, ബി.എസ്.ഇയിലും എൻ.എസ്.ഇയിലും നാളെ (ഒക്ടോബർ 28) ജിയോ പ്ലാറ്റ്‌ഫോം ഓഹരികളുടെ ലിസ്റ്റിങ് നടക്കും. ഇന്നലെ (ഒക്ടോബർ 26) ഓഹരികളുടെ അലോട്ട്‌മെന്റ് പൂർത്തിയാക്കിയിരുന്നു. ഇതിൽ ജിയോ ഓഹരികളൊന്നും ലഭിക്കാത്ത അപേക്ഷകർക്ക് ഇന്ന് (ഒക്ടോബർ 27) പണം തിരികെ നൽകും (Refund). ഇതിനിടെ ജിയോ ഓ​ഹരികളുടെ ​ഗ്രേ മാർക്കറ്റ് പ്രീമിയം (GMP) 263 രൂപയായി (23.5% ലിസ്റ്റിങ് നേട്ടത്തിനുള്ള സാധ്യത) ഉയർന്നു.

ഈയൊരു പശ്ചാത്തലത്തിൽ ലിസ്റ്റിംഗിന് ശേഷം ജിയോ വാങ്ങണോ, അങ്ങനെയെങ്കിൽ എന്ത് വില വരെ വാങ്ങാം എന്നതാണ് അലോട്ട്മെന്റ് ലഭിക്കാത്ത നിക്ഷേപകരുടെ മുന്നിലുള്ള ചോദ്യം. ഒരു വിഭാ​ഗം വിപണി വിദഗ്ധരാകട്ടെ ദീർഘകാലയളവ് ലക്ഷ്യമാക്കി ജിയോ ഓഹരികൾ പരി​ഗണിക്കാം എന്ന ശുപാർശ നൽകിയിട്ടുണ്ട്. ഇതിന്റെ വിവിധ വശങ്ങൾ പരിശോധിക്കാം.

എന്തുകൊണ്ടാണ് ദീർഘകാല നിക്ഷേപമായി കാണുന്നത്?

നൂതന സാങ്കേതികവിദ്യകൾ നടപ്പിലാക്കുന്നതിൽ ടെലികോം കമ്പനികൾ വഹിക്കുന്ന പങ്കിനെ അടിസ്ഥാനമാക്കിയാണ് എലിക്സർ ഇക്വിറ്റീസിലെ (Elixir Equities) അനലിസ്റ്റുകൾ ജിയോ ഓഹരിയിലെ ദീർഘകാല നിക്ഷേപത്തെ ന്യായീകരിക്കുന്നത്. ഇന്നത്തെ കാലത്ത് ഉപഭോക്താക്കൾ ഉപയോഗിക്കുന്ന ഏത് സാങ്കേതികവിദ്യയും നടപ്പിലാക്കണമെങ്കിലോ അതിന്റെ വ്യാപ്തിയും സേവനവും വർധിപ്പിക്കണമെങ്കിലോ, അതിനാവശ്യമായ അടിസ്ഥാന സൗകര്യങ്ങൾ ഒരുക്കേണ്ടത് ഭാരതി എയർടെൽ, ജിയോ തുടങ്ങിയ ടെലികോം കമ്പനികളാണ്. 5ജി-യുടെ കാര്യത്തിൽ മാത്രമല്ല, ബ്രോഡ്‌ബാൻഡ്, ഭാവിയിലെ നൂതന ആശയവിനിമയ സാങ്കേതികവിദ്യകൾ എന്നിവയുടെ കാര്യത്തിലും ഇത് ബാധകമാണെന്നും ടെലികോം മേഖലയെ മൊത്തത്തിൽ ശുഭപ്രതീക്ഷയോടെയാണ് കാണുന്നതെന്നും എലിക്സർ ഇക്വിറ്റീസിന്റെ റിസർച്ച് റിപ്പോർട്ടിൽ വ്യക്തമാക്കി.

പുതിയ ഡിജിറ്റൽ സേവനങ്ങൾ രാജ്യത്ത് അവതരിപ്പിക്കുന്നതിനായി ബിസിനസ് സ്ഥാപനങ്ങൾ ആശ്രയിക്കുന്നത് ജിയോ, എയർടെൽ പോലുള്ള നെറ്റ്‌‍വർക്കുകളെയാണ്. കൂടാതെ സമീപ ഭാവിയിൽ രാജ്യത്തെ ടെലികോം നിരക്കുകളിൽ മാറ്റങ്ങൾ വരുമെന്നും ഇതുവഴി നേടുന്ന വരുമാന വർധനയിലൂടെ ടെലികോം ഓഹരികളിൽ അനുകൂലമായ ഒരു ഇടക്കാല മുന്നേറ്റത്തിന് വഴിയൊരുക്കാമെന്നും മോത്തിലാൽ ഓസ്വാളിന്റെ റിസർച്ച് റിപ്പോർട്ടിൽ സൂചിപ്പിച്ചു.

ഏത് വില വരെ നിക്ഷേപം പരി​ഗണിക്കാം?

ദീർഘകാലത്തേക്ക് കൈവശം വെക്കുകയാണെങ്കിൽ, ഏകദേശം 1,300 രൂപ വരെയുള്ള വിലയിൽ ജിയോ പ്ലാറ്റ്ഫോംസ് ഓഹരികൾ വാങ്ങുന്നത് ന്യായമാണെന്ന് എലിക്സർ ഇക്വിറ്റീസിലെ അനലിസ്റ്റുകൾ അഭിപ്രായപ്പെട്ടു. ഇത് ഐപിഒയിൽ നിശ്ചയിച്ച ഓഹരിയുടെ ഇഷ്യൂ വിലയായ 1,119 രൂപ എന്നതിനേക്കാളും 16 ശതമാനം ഉയരെയാണെന്നതും ഓർക്കുക.

എന്നാൽ മോത്തിലാൽ ഒസ്വാളിന്റെ അനലിസ്റ്റുൾ കുറച്ചുകൂടി പരിമിതമായ ഒരു നിക്ഷേപ പരിധിയാണ് നിർദ്ദേശിക്കുന്നത്. ഐപിഒയിലെ ഇഷ്യൂ വിലയിലോ അല്ലെങ്കിൽ അതിനേക്കാൾ 5-10 ശതമാനം വരെ ഉയർന്ന വിലയിലോ വരെ ജിയോ ഓഹരികൾ ദീർഘകാലയളവ് കണക്കാക്കി വാങ്ങുന്നത് പരി​ഗണിക്കാം. 1,119 രൂപ എന്ന ജിയോ ഓ​ഹരിയുടെ ഇഷ്യൂ വിലയെ അടിസ്ഥാനമാക്കിയാൽ, ഏകദേശം 1,175 മുതൽ 1,231 രൂപ വരെയുള്ള വില നിലവാരമാണിത്.

ഓഹരി വാങ്ങുന്നതിന് മുൻപ് ശ്രദ്ധിക്കേണ്ട കാര്യങ്ങൾ

ഇവിടെ നൽകിയിരിക്കുന്ന ജിയോ ഓഹരികളുടെ നിക്ഷേപ പരിധികൾ, ബ്രോക്കറേജ് സ്ഥാപനങ്ങളിലെ അനലിസ്റ്റുകളുടെ വ്യക്തിപരമായ അഭിപ്രായങ്ങൾ മാത്രമാണ്. ലിസ്റ്റിംഗ് ദിവസം നടക്കാൻപോകുന്ന വ്യാപാരത്തിലൂടെ നിശ്ചയിക്കപ്പെടുന്ന വിലയെക്കുറിച്ചുള്ള പ്രവചനങ്ങളല്ല ഇവ.

രാജ്യത്തിന്റെ ഡിജിറ്റൽ സമ്പദ്‍വ്യവസ്ഥയുടെ വളർച്ചയ്ക്ക് ടെലികോം നെറ്റ്‌‍വർക്കിന്റെ ആവശ്യകതയെയും നിരക്ക് വർധനയേയും (tariffs hike) കുറിച്ചുള്ള അനുമാനങ്ങളെ അടിസ്ഥാനമാക്കിയാണ് ഈ വിലയിരുത്തലുകൾ പ്രധാനമായും രൂപപ്പെടുത്തിയിരിക്കുന്നത്. ടെലികോം നിരക്കുകളിൽ മാറ്റം വരുമെന്ന് പ്രതീക്ഷിക്കുന്നുണ്ടെങ്കിലും, അക്കാര്യം കമ്പനികൾ ഔദ്യോഗികമായി ഇതുവരെ പ്രഖ്യാപിച്ചിട്ടില്ല.

ജിയോ പ്ലാറ്റ്ഫോംസിന്റെ വിപണിയിലെ ലിസ്റ്റിംഗിന് ശേഷം ഓഹരികൾ വാങ്ങാൻ ഉദ്ദേശിക്കുന്ന നിക്ഷേപകർ, തങ്ങൾ എത്രത്തോളം തുക നിക്ഷേപിക്കണം (position size), എത്ര കാലത്തേക്ക് വരെ ഓഹരികൾ കൈവശം വെക്കണം (holding period) എന്നിവ മുൻകൂട്ടി തീരുമാനിക്കേണ്ടതുണ്ട്. കാരണം, ഈ ബ്രോക്കറേജ് സ്ഥാപനങ്ങളിലെ വിശകലന വിദഗ്ധർ നൽകിയിരിക്കുന്ന ശുപാർശകൾ, നിരവധി വർഷങ്ങൾ വരെ നീണ്ടുനിൽക്കുന്ന ഒരു നിക്ഷേപ കാഴ്ചപ്പാടിനെ അടിസ്ഥാനമാക്കിയുള്ളതാണ് എന്നതും ഓർക്കുക.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ നഷ്ട സാധ്യതകള്‍ക്ക് കൂടി വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ മാർ​ഗനിർദേശം തേടുകയോ ചെയ്യേണ്ടതുണ്ട്.)

Jio Platforms IPO investors who missed the allotment can assess post-listing entry levels suggested by Elixir Equities and Motilal Oswal, along with the associated risks.