ഇന്ത്യന് മൂലധന വിപണി കാത്തിരുന്ന ഏറ്റവും വലിയ പ്രാഥമിക ഓഹരി വില്പ്പനയ്ക്ക് (IPO) വഴിതുറന്നു. റിലയന്സ് ഇന്ഡസ്ട്രീസിന്റെ ടെലികോം വിഭാഗമായ ജിയോ പ്ലാറ്റ്ഫോംസിന്റെ 37,000 കോടി രൂപയുടെ ഐ.പി.ഒയ്ക്ക് പ്രൊമോട്ടര്മാരും റെഗുലേറ്ററായ സെബിയും (SEBI) തത്വത്തില് അനുമതി നല്കി. ഓഹരി വിപണി ചരിത്രത്തിലെ തന്നെ ഏറ്റവും വലിയ ഐ.പി.ഒകളില് ഒന്നായിരിക്കും ഇത്.
നിലവിലെ വിവരമനുസരിച്ച്, റിലയന്സ് ഇന്ഡസ്ട്രീസ് 10 ശതമാനത്തോളം ഓഹരികളാണ് വിപണിയില് വിറ്റഴിക്കുക. പ്രൊമോട്ടര്മാരുടെ ഓഫര് ഫോര് സെയില് (OFS), പുതിയ ഓഹരികളുടെ ഇഷ്യൂ എന്നിവ ഉള്പ്പെടുന്നതായിരിക്കും പബ്ലിക് ഓഫര്.
ഐ.പി.ഒ പൂര്ത്തിയാകുന്നതോടെ ജിയോയുടെ വിപണി മൂല്യം (Valuation) 100 ബില്യണ് ഡോളര് (ഏകദേശം 8.3 ലക്ഷം കോടി രൂപ) കടക്കുമെന്നാണ് വിപണി വിദഗ്ധരുടെ വിലയിരുത്തല്. 47 കോടിയിലധികം വരിക്കാരുള്ള ജിയോ, നിലവില് ഇന്ത്യയിലെ ഏറ്റവും വലിയ ടെലികോം സേവന ദാതാക്കളാണ്.
രാജ്യവ്യാപകമായി 5ജി ശൃംഖല വേഗത്തില് വ്യാപിപ്പിച്ചതും, ആവറേജ് റെവന്യൂ പെര് യൂസറിലെ (ARPU) വര്ധനയും കമ്പനിയുടെ സാമ്പത്തിക അടിത്തറ ശക്തമാക്കിയിട്ടുണ്ട്.
വെറുമൊരു ടെലികോം കമ്പനി എന്നതിലുപരി ക്ലൗഡ്, എ.ഐ, ഡിജിറ്റല് സര്വീസസ് മേഖലകളിലേക്ക് കടന്നത് (ഇന്വെസ്റ്റര്മാരെ) ആകര്ഷിക്കുന്ന പ്രധാന ഘടകമാണ്.
2020-ല് കെ.കെ.ആര് (KKR), സില്വര് ലേക്ക്, മെറ്റ, ഗൂഗിള് തുടങ്ങിയ പ്രമുഖ ആഗോള നിക്ഷേപകര് ജിയോ പ്ലാറ്റ്ഫോംസില് നിക്ഷേപം നടത്തിയിരുന്നു. ഐ.പി.ഒ വഴി ഇവര്ക്ക് അവരുടെ നിക്ഷേപത്തിന്റെ ഒരു ഭാഗം ലാഭമെടുക്കാനും (Partial exit) സാധിക്കും.
ഇന്ത്യന് ഓഹരി വിപണിയില് വരും ആഴ്ചകളില് റിലയന്സ് ഇന്ഡസ്ട്രീസ് ഓഹരികളില് വലിയ ചലനമുണ്ടാക്കാന് ഈ വാര്ത്ത കാരണമായേക്കും. റീറ്റെയ്ല് നിക്ഷേപകര്ക്കും പ്രാഥമിക വിപണിയില് വലിയ അവസരമാണ് ഇതിലൂടെ ഒരുങ്ങുന്നത്.
Reliance Jio gets regulatory approval from SEBI to launch India's largest telecom IPO worth Rs 37,000 crore.
Read DhanamOnline in English
Subscribe to Dhanam Magazine
