Begin typing your search above and press return to search.
നാലു ദിവസത്തെ കുതിപ്പിന് വിരാമം, ഓഹരി വിപണി താഴേക്ക്
കേരള കമ്പനികളില്‍ ഭൂരിഭാഗവും ഇന്ന് നേട്ടമുണ്ടാക്കി
ആഗോള വിപണി ദുര്‍ബലമായതോടെ നാലു ദിവസത്തെ തുടര്‍ച്ചയായുള്ള നേട്ടം അവസാനിപ്പിച്ച് ഇന്ത്യന്‍ ഓഹരി സൂചികകള്‍ താഴേക്ക് പോയി. സെന്‍സെക്‌സ് 340.60 പോയ്ന്റ് ഇടിഞ്ഞ് 49161.81 പോയ്ന്റിലും നിഫ്റ്റി 91.60 പോയ്ന്റ് ഇടിഞ്ഞ് 14850.80 പോയ്ന്റിലുമാണ് ഇന്ന് ക്ലോസ് ചെയ്തത്. 1845 ഓഹരികള്‍ ഇന്ന് നേട്ടമുണ്ടാക്കിയപ്പോള്‍ 1204 ഓഹരികള്‍ക്ക് തിരിച്ചടിയേറ്റു. 190 ഓഹരികളുടെ വിലയില്‍ മാറ്റമുണ്ടായില്ല.
എന്‍ടിപിസി, അള്‍ട്രാടെക് സിമന്റ്, സണ്‍ഫാര്‍മ, എസ്ബിഐ, റിലയന്‍സ്, നെസ്ലെ തുടങ്ങിയവ നേട്ടമുണ്ടാക്കിയപ്പോള്‍ ഇന്‍ഡസ് ഇന്‍ഡ് ബാങ്ക്, ബജാജ് ഓട്ടോ, പവര്‍ഗ്രിഡ്, ടൈറ്റന്‍, ഒഎന്‍ജിസി, ഭാരതി എയര്‍ടെല്‍, ഏഷ്യന്‍ പെയ്ന്റ്‌സ് തുടങ്ങിയവയ്ക്ക് നേട്ടമുണ്ടാക്കാനാകാതെ പോയി.
ബാങ്കിംഗ്, ഫിനാന്‍ഷ്യല്‍സ്, ഐറ്റി, മെറ്റല്‍സ്, ഫാര്‍മ സൂചികകള്‍ നിരാശപ്പെടുത്തിയപ്പോള്‍ പിഎസ്‌യു ബാങ്ക് ഓഹരികള്‍ ഭേദപ്പെട്ട പ്രകടനം കാഴ്ചവെച്ചു.
കേരള കമ്പനികളുടെ പ്രകടനം
കേരള കമ്പനികളില്‍ ഭൂരിഭാഗവും ഇന്ന് നേട്ടമുണ്ടാക്കി. 19 കേരള ഓഹരികള്‍ക്കാണ് ഇന്ന് നേട്ടമുണ്ടാക്കാനായത്. 10 ശതമാനം നേട്ടവുമായി പാറ്റ്‌സ്പിന്‍ ഇന്ത്യ ഇതില്‍ മുന്നിലാണ്. കല്യാണ്‍ ജൂവലേഴ്‌സ് 3.50 ശതമാനം നേട്ടമുണ്ടാക്കിയപ്പോള്‍ സൗത്ത് ഇന്ത്യന്‍ ബാങ്ക് 3.02 ശതമാനം നേട്ടവുമായി മുന്നേറ്റം തുടരുകയാണ്. ഫെഡറല്‍ ബാങ്ക് (2.77 ശതമാനം), ജിയോജിത് ഫിനാന്‍ഷ്യല്‍ സര്‍വീസസ് (1.90 ശതമാനം), എവിറ്റി (1.83 ശതമാനം), കിറ്റെക്‌സ് (1.77 ശതമാനം), ആസ്റ്റര്‍ ഡിഎം (1.73 ശതമാനം) തുടങ്ങിയവ നേട്ടമുണ്ടാക്കിയ കേരള ഓഹരികളാണ്. അതേസമയം
വിക്ടറി പേപ്പര്‍ ആന്‍ഡ് ബോര്‍ഡ്‌സ്, കൊച്ചിന്‍ മിനറല്‍സ് & റുട്ടൈല്‍, മുത്തൂറ്റ് ഫിനാന്‍സ്, റബ്ഫില ഇന്റര്‍നാഷണല്‍, ഇന്‍ഡിട്രേഡ് (ജെആര്‍ജി), ധനലക്ഷ്മി ബാങ്ക്, നിറ്റ ജലാറ്റിന്‍ തുടങ്ങി 10 കേരള ഓഹരികള്‍ക്ക് നേട്ടമുണ്ടാക്കാനായില്ല.
Next Story