മിന്നുന്നതെല്ലാം പൊന്നല്ല! കമ്പനികളില്‍ ഒളിഞ്ഞിരുപ്പുണ്ട് ചുവപ്പ് അടയാളങ്ങള്‍, ഓഹരി നിക്ഷേപകര്‍ ശ്രദ്ധിക്കേണ്ട പ്രധാന അപായ സൂചനകള്‍

ഇന്ത്യയുടെ ഓഹരി വിപണി വലിയ മുന്നേറ്റമാണ് നടത്തുന്നത്. ബിഎസ്ഇയുടെ വിപണി മൂല്യം 5 ലക്ഷം കോടി ഡോളർ എന്ന നാഴികക്കല്ല് പിന്നിട്ടത് കഴിഞ്ഞ മാസങ്ങളിലാണ്. വിപണിയില്‍ അവസരങ്ങൾ വളരെ വലുതായതിനാല്‍ ലക്ഷക്കണക്കിന് പുതിയ നിക്ഷേപകരാണ് ഈ രംഗത്തേക്ക് കടന്നുവരുന്നത്. എന്നാൽ അപകടസാധ്യതകളും ഈ മേഖലയില്‍ ഉണ്ട്. വിപണിയില്‍ പ്രവേശിക്കുമ്പോള്‍ നിക്ഷേപകര്‍ ശ്രദ്ധിക്കേണ്ട പ്രധാന കാര്യങ്ങള്‍ പരിശോധിക്കുകയാണ് ഇവിടെ.

പണം നഷ്ടപ്പെടുന്ന കമ്പനികൾ

ഒരു വ്യവസായ മേഖല വളരുന്നു എന്നതുകൊണ്ട് അതിലെ എല്ലാ കമ്പനികളും അതിജീവിക്കുമെന്ന് അർത്ഥമാക്കുന്നില്ല. തുടർച്ചയായി നഷ്ടം വരുത്തുന്ന കമ്പനികളെ ഒഴിവാക്കുന്നതാണ് നല്ലത്. ഉദാഹരണമായി, ഇന്ത്യയിൽ ടെലികോം സേവനങ്ങൾക്ക് വൻതോതിലുള്ള ഡിമാൻഡ് ഉണ്ടായിരുന്നിട്ടും വൻ കടബാധ്യത കാരണം വോഡഫോൺ ഐഡിയ തുടർച്ചയായ നഷ്ടങ്ങൾ നേരിടുന്നു.

കുറഞ്ഞ ആര്‍.ഒ.ഐ

ഒരു കമ്പനി ലാഭമുണ്ടാക്കാൻ ഓഹരി ഉടമകളുടെ പണം എത്രത്തോളം നന്നായി ഉപയോഗിക്കുന്നു എന്നതാണ് ROE(Return on Equity) സൂചിപ്പിക്കുന്നത്. നിരവധി വർഷങ്ങളായി 10-12 ശതമാനത്തിൽ താഴെയുള്ള ROE മോശം മൂലധന കാര്യക്ഷമതയാണ് വ്യക്തമാക്കുന്നത്. ഉദാഹരണമായി, പൊതുമേഖലാ ബാങ്കുകള്‍ കുറഞ്ഞ ROE കാരണം സ്വകാര്യ മേഖലയിലെ മറ്റു ബാങ്കുകളുമായി താരതമ്യപ്പെടുത്തുമ്പോൾ വർഷങ്ങളായി മോശം പ്രകടനം കാഴ്ചവെക്കുന്നു.

അമിത വിലയുള്ള ഓഹരികൾ

ഒരു കമ്പനിയുടെ വരുമാനം വേഗത്തിൽ വളരുമെന്ന് പ്രതീക്ഷയുണ്ടെങ്കിൽ മാത്രമേ ഉയർന്ന മൂല്യനിർണ്ണയത്തിന് അർത്ഥമുളളൂ. വളർച്ച മന്ദഗതിയിലായാൽ, അറിയപ്പെടുന്ന കമ്പനികളുടെ പോലും ഓഹരി വില കുത്തനെ ഇടിയാൻ സാധ്യതയുണ്ട്. നെറോലാക് പെയിന്റ്സ്, ബാറ്റ ഇന്ത്യ , വേൾപൂൾ തുടങ്ങിയ കമ്പനികൾ വിപണിയില്‍ പ്രിയങ്കരമായിരുന്നു. എന്നാൽ വളർച്ച മന്ദഗതിയിലായപ്പോൾ അവയുടെ ഉയർന്ന വിലകൾ നിക്ഷേപകരെ നഷ്ടത്തിലാക്കി.

ആവേശഭരിതമായ ഓഹരികൾ

ഡ്രോണുകൾ, ഹരിത ഊര്‍ജം പോലുള്ള വിഷയങ്ങള്‍ പെട്ടെന്ന് ശ്രദ്ധ ആകര്‍ഷിക്കുന്നതാണ്. പക്ഷേ ഈ കമ്പനികള്‍ എല്ലായ്പ്പോഴും ലാഭം നേടുന്നില്ല. ആദ്യത്തെ അമിതാവേശം മങ്ങുമ്പോൾ ഓഹരി വിലകൾ കുത്തനെ ഇടിയാൻ സാധ്യതയുണ്ട്. ഉദാഹരണമായി പുനരുപയോഗ ഊർജ മേഖലയില്‍ വലിയ പ്രതീക്ഷകള്‍ ഉണ്ടായിരുന്നിട്ടും അദാനി ഗ്രീൻ എനർജി വിപണിയില്‍ വൻ തിരുത്തലിന് വിധേയമായി. ഓഹരിയുടെ മൂല്യനിർണയം വരുമാനത്തേക്കാൾ കൂടുതലായതാണ് തിരിച്ചടിയായത്.

സ്ഥിരീകരിക്കാത്ത ഫിൻഫ്ലുവൻസർ

സമൂഹ മാധ്യമങ്ങളില്‍ വരുന്ന പല സ്റ്റോക്ക് ടിപ്പുകള്‍ക്കും ഗവേഷണമോ ഉത്തരവാദിത്തമോ ഇല്ല. ഇത്തരം സ്ഥിരീകരണമില്ലാത്ത ഉപദേശങ്ങൾക്കെതിരെ സെബി (SEBI) കർശന നടപടി സ്വീകരിക്കാൻ ആരംഭിച്ചിട്ടുണ്ട്.

ദുർബലമായ മാനേജ്മെന്റ്

നേതൃത്വം മികച്ചതായാല്‍ മാത്രമേ ഒരു കമ്പനിക്ക് വലിയ പ്രവര്‍ത്തനങ്ങള്‍ കാഴ്ചവെക്കാനാകുക. തന്ത്രങ്ങളില്‍ അടിക്കടി മാറ്റം, നിയമപരമായ പ്രശ്നങ്ങൾ, മുതിർന്ന ഉദ്യോഗസ്ഥരുടെ രാജി എന്നിവ ആ കമ്പനി നേരിടുന്ന കൂടുതൽ ആഴത്തിലുള്ള പ്രശ്നങ്ങളുടെ ലക്ഷണങ്ങളാണ്.

ഉയർന്ന കടം

കടം എടുക്കുന്നത് എപ്പോഴും ഒരു മോശം കാര്യമല്ല. പക്ഷേ പലിശ അടയ്ക്കാൻ ഒരു കമ്പനിക്ക് കഴിയുന്നില്ലെങ്കിൽ അത് ഒരു മുന്നറിയിപ്പായി എടുക്കേണ്ടതുണ്ട്. പലിശ കവറേജ് അനുപാതം (Interest Coverage Ratio, ICR) 1 ൽ താഴെയാണെങ്കിൽ, വായ്പകൾ തിരിച്ചടയ്ക്കാൻ ആവശ്യമായ വരുമാനം കമ്പനിക്ക് ലഭിക്കുന്നില്ല എന്നാണ് അർത്ഥമാക്കുന്നത്.

_{Key red flags in stock investing and common mistakes investors must avoid for better financial outcomes.}