ഈയാഴ്ചയും ഐപിഒ വിപണിയിൽ തിക്കിത്തിരക്ക്: 7 കമ്പനികൾ പബ്ലിക് ഇഷ്യൂവിന് എത്തുന്നു

ഇന്ത്യൻ പ്രാഥമിക വിപണി (Primary Market) ഈ വർഷത്തെ ഏറ്റവും തിരക്കേറിയ ആഴ്ചകളിലൊന്നിലേക്ക് കടക്കുകയാണ്. സെപ്റ്റംബർ 22 മുതൽ 28 വരെയുള്ള വ്യാപാര ആഴ്ചയിൽ മെയിൻബോർഡ് വിഭാ​ഗത്തിലുള്ള 7 ഐ.പി.ഒകളാണ് (Mainboard IPOs) വിപണിയിൽ അരങ്ങേറുന്നത്. ബിൽഡിംഗ് മെറ്റീരിയൽസ്, ഐ.ടി ഇൻഫ്രാസ്ട്രക്ചർ, പവർ ഇ.പി.സി, എഡ്യൂക്കേഷൻ റിയൽ എസ്റ്റേറ്റ്, ഓട്ടോ ഘടകങ്ങൾ, സ്റ്റീൽ, ഫിൻടെക് എന്നീ പ്രമുഖ മേഖലകളിൽ നിന്നുള്ള കമ്പനികളാണ് വിപണിയിലെത്തുന്നത്.

മൊത്തത്തിൽ 5,600 കോടി രൂപയിലധികം സമാഹരിക്കാനാണ് ഈ കമ്പനികൾ ലക്ഷ്യമിടുന്നത്. ലിസ്റ്റിംഗുകൾ സെപ്റ്റംബർ 29 മുതൽ ഒക്ടോബർ 1 വരെയുള്ള തീയതികളിൽ നടക്കും. കമ്പനികളുടെ വിശദാംശങ്ങൾ താഴെ നൽകുന്നു:

1. വർമോറ ഗ്രാനൈറ്റോ — ₹708 കോടി

ഗുജറാത്തിലെ മോർബി ആസ്ഥാനമായി പ്രവർത്തിക്കുന്ന പ്രമുഖ സെറാമിക്, വിട്രിഫൈഡ് ടൈൽ നിർമ്മാതാക്കളായ വർമോറ ഗ്രാനൈറ്റോയുടെ (Varmora Granito) ഐ.പി.ഒ സെപ്റ്റംബർ 22 മുതൽ 24 വരെയാണ്. സെപ്റ്റംബർ 29-ന് എൻ.എസ്.ഇ, ബി.എസ്.ഇ എക്സ്ചേഞ്ചുകളിൽ ലിസ്റ്റ് ചെയ്യും.

• പ്രൈസ് ബാൻഡ്: 140 – 148 രൂപ

• ഇഷ്യൂ ഘടന: 320 കോടി രൂപയുടെ പുതിയ ഓഹരികളും (Fresh Issue) 388 കോടി രൂപയുടെ ഓഫർ ഫോർ സെയിലും (OFS).

• ലക്ഷ്യം: സമാഹരിക്കുന്ന തുകയിൽ 245 കോടി രൂപ കമ്പനിയുടെയും ഉപകമ്പനികളുടെയും കടബാധ്യതകൾ തീർക്കാൻ ഉപയോഗിക്കും. ഇറ്റാലിയൻ സാക്മി (SACMI) കമ്പനിയുമായി സാങ്കേതിക പങ്കാളിത്തമുണ്ട്.

2. അർമീ ഇൻഫോടെക് — ₹300 കോടി

അഹമ്മദാബാദ് ആസ്ഥാനമായുള്ള ഈ ഐ.ടി ഇൻഫ്രാസ്ട്രക്ചർ കമ്പനിയായ അർമീ ഇൻഫോടെക്കിന്റെ (ArMee Infotech) ഐ.പി.ഒ സെപ്റ്റംബർ 23 മുതൽ 25 വരെ നടക്കും. സെപ്റ്റംബർ 30-നാണ് ഓഹരിയുടെ ലിസ്റ്റിംഗ്.

• പ്രൈസ് ബാൻഡ്: 350 – 375 രൂപ

• ഇഷ്യൂ ഘടന: 300 കോടി രൂപയുടെ പുതിയ ഓഹരികൾ മാത്രം.

• ലക്ഷ്യം: പൊതുമേഖലാ സ്ഥാപനങ്ങളുടെയും സർക്കാരിന്റെയും പ്രോജക്ടുകൾ വിപുലീകരിക്കാൻ 155 കോടിയും പ്രവർത്തന മൂലധനത്തിനായി 60 കോടി രൂപയും വിനിയോഗിക്കും. 2026 ജൂൺ വരെയുള്ള രേഖകളുടെ അടിസ്ഥാനത്തിൽ കമ്പനിക്ക് 99 സജീവ പ്രോജക്ടുകൾ ഉണ്ട്.

3. സ്വസ്തിക ഇൻഫ്ര — ₹161 കോടി

വൈദ്യുതി പ്രസരണ വിതരണ (Power Transmission EPC) മേഖലയിലെ കരാർ കമ്പനിയായ സ്വസ്തിക ഇൻഫ്രയുടെ (Swastika Infra) ഐ.പി.ഒ സെപ്റ്റംബർ 23 മുതൽ 25 വരെയായിരിക്കും.

• പ്രൈസ് ബാൻഡ്: 175 – 185 രൂപ

• ഇഷ്യൂ ഘടന: 129 കോടി രൂപയുടെ പുതിയ ഓഹരികളും 32 കോടി രൂപയുടെ ഒ.എഫ്.എസും.

• ലക്ഷ്യം: സമാഹരിക്കുന്ന 90 കോടി രൂപ പൂർണ്ണമായും കമ്പനിയുടെ പ്രവർത്തന മൂലധന ആവശ്യങ്ങൾക്കായി മാറ്റിവെക്കും. വിവിധ സംസ്ഥാനങ്ങളിലായി 2,036 കോടി രൂപയുടെ ഓർഡർ ബുക്ക് കമ്പനിക്കുണ്ട്.

4. എലിവേറ്റ് ക്യാമ്പസസ് — ₹2,100 കോടി

ഈ വ്യാപാര ആഴ്ചയിലെ ഏറ്റവും വലിയ ഐ.പി.ഒ ആണ് എഡ്യൂക്കേഷൻ ഇൻഫ്രാസ്ട്രക്ചർ കമ്പനിയായ എലിവേറ്റ് ക്യാമ്പസസിന്റേത് (Elevate Campuses). സെപ്റ്റംബർ 23 മുതൽ 25 വരെയാണ് ഐ.പി.ഒയിലേക്ക് അപേക്ഷിക്കാവുന്ന തീയതികൾ.

• പ്രൈസ് ബാൻഡ്: 343 – 362 രൂപ

• ഇഷ്യൂ ഘടന: 2,100 കോടി രൂപയുടെ പുതിയ ഓഹരികൾ (fresh issue).

• ലക്ഷ്യം: ഇന്ത്യയിലെയും യു.എ.ഇയിലെയും 15 നഗരങ്ങളിലായി 80,000-ത്തിലധികം വിദ്യാർത്ഥികൾക്ക് താമസസൗകര്യമൊരുക്കുന്ന കമ്പനി, സമാഹരിക്കുന്ന തുകയിൽ 1,100 കോടി രൂപ പുതിയ വിദ്യാഭ്യാസ സ്ഥാപനങ്ങൾ ഏറ്റെടുക്കാനും 750 കോടി രൂപ കടം വീട്ടാനും ഉപയോഗിക്കും.

5. അഡ്രോയിറ്റ് ഇൻഡസ്ട്രീസ് — ₹151 കോടി

വാഹന ഘടക നിർമ്മാണ മേഖലയിൽ പ്രവർത്തിക്കുന്ന അഡ്രോയിറ്റ് ഇൻഡസ്ട്രീസിന്റെ (Adroit Industries) പ്രാരംഭ പൊതു ഓഹരി വിൽപ്പന സെപ്റ്റംബർ 23 മുതൽ 25 വരെയാണ്.

• പ്രൈസ് ബാൻഡ്: 126 – 134 രൂപ

• ഇഷ്യൂ ഘടന: 133 കോടി രൂപയുടെ പുതിയ ഓഹരികളും 18 കോടി രൂപയുടെ ഒ.എഫ്.എസും.

• ലക്ഷ്യം: ദേവാസ്, പീതാംപൂർ പ്ലാന്റുകളിലെ വികസന പ്രവർത്തനങ്ങൾക്ക് (Capex) 64 കോടി രൂപയും ബാക്കി തുക കടം കുറയ്ക്കുന്നതിനായും വിനിയോഗിക്കും. 32-ലധികം രാജ്യങ്ങളിലേക്ക് കമ്പനി ഉൽപ്പന്നങ്ങൾ കയറ്റുമതി ചെയ്യുന്നുണ്ട്.

6. എ-വൺ സ്റ്റീൽസ് ഇന്ത്യ — ₹405 കോടി

കർണാടകയിലും ആന്ധ്രാപ്രദേശിലുമായി ആറ് പ്ലാന്റുകളുള്ള സ്റ്റീൽ നിർമ്മാണ കമ്പനിയായ എ-വൺ സ്റ്റീൽസിന്റെ (A-One Steels India) ഐ.പി.ഒ സെപ്റ്റംബർ 24 മുതൽ 28 വരെ നടക്കും.

• പ്രൈസ് ബാൻഡ്: 385 – 405 രൂപ

• ഇഷ്യൂ ഘടന: 355 കോടി രൂപയുടെ പുതിയ ഓഹരികളും 50 കോടി രൂപയുടെ ഒ.എഫ്.എസും.

• ലക്ഷ്യം: സമാഹരിക്കുന്ന 250 കോടി രൂപ കമ്പനിയുടെ നിലവിലുള്ള വായ്പകൾ മുൻകൂട്ടി തിരിച്ചടയ്ക്കാൻ ഉപയോഗിക്കും.

7. മണി വ്യൂ — ₹1,092 കോടി

ഈ വാരത്തിലെ പ്രമുഖ ഫിൻടെക് ഐ.പി.ഒ ആയ മണി വ്യൂവിന്റെ (Moneyview) പ്രാരംഭ പൊതുഓഹരി വിൽപ്പന സെപ്റ്റംബർ 24 മുതൽ 28 വരെ നടക്കും. ഓഹരിയുടെ ലിസ്റ്റിംഗ് ഒക്ടോബർ 1-നാണ്.

• പ്രൈസ് ബാൻഡ്: 32 – 34 രൂപ

• ഇഷ്യൂ ഘടന: 750 കോടി രൂപയുടെ പുതിയ ഓഹരികളും 342 കോടി രൂപയുടെ ഒ.എഫ്.എസും.

• ലക്ഷ്യം: 14 കോടിയിലധികം രജിസ്റ്റർ ചെയ്ത ഉപയോക്താക്കളുള്ള ഫിൻടെക് പ്ലാറ്റ്‌ഫോം, ലഭിക്കുന്ന തുകയിൽ 325 കോടി രൂപ വായ്പാ വിതരണ ശൃംഖല ശക്തമാക്കാനും 250 കോടി രൂപ ഉപകമ്പനിയായ ഡബ്ല്യു.എഫ്.പി.എല്ലിൽ (WFPL) നിക്ഷേപിക്കാനും ഉപയോഗിക്കും.

വ്യത്യസ്ത മേഖലകളിൽ നിന്നുള്ള വൈവിധ്യമാർന്ന കമ്പനികൾ ഒരുമിച്ച് എത്തുന്നതിനാൽ, ഓരോ മേഖലയുടെയും പ്രകടനവും ഗ്രേ മാർക്കറ്റ് പ്രീമിയവും (GMP) വിലയിരുത്തിയാകും നിക്ഷേപകരുടെ പങ്കാളിത്തം തീരുമാനിക്കപ്പെടുക.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)