എഐ നിക്ഷേപ ആശങ്കയിൽ വിപണികൾ; ക്രൂഡ് ഓയിൽ 118 ഡോളറിലേക്ക്; യു.എസ് ഫ്യൂച്ചേഴ്സ് ഇടിയുന്നു; ഏഷ്യൻ വിപണികൾ താഴ്ചയിൽ

നിർമിതബുദ്ധി (എഐ) നിക്ഷേപത്തെപ്പറ്റിയുള്ള ആശങ്കകളെ ബലപ്പെടുത്തുന്ന റിസൽട്ടുകൾ ലോക വിപണികളെ ഉലയ്ക്കുകയാണ്. ഗൂഗിളിനു (ആൽഫബെറ്റ് ) പിന്നാലെ ആമസോണും ഇൻ്റെലും പുറത്തുവിട്ട റിസൽട്ടുകൾ ഇന്നു (ഒക്ടോബർ 30) യു.എസ് നാസ്ഡാക് ഫ്യൂച്ചേഴ്സിനെ രണ്ടു ശതമാനത്തിലധികം നഷ്ടത്തിലാക്കി. ഇന്നലെയും യു.എസ് വിപണി ഇടിവിലായിരുന്നു. ഇന്നു രാവിലെ ഏഷ്യൻ വിപണികളും ഇടിഞ്ഞു.

ക്രൂഡ് ഓയിൽ വില 118 ഡോളറിലേക്കു കയറിയത് വിലക്കയറ്റത്തെയും പലിശയെയും സംബന്ധിച്ച ആശങ്കകൾ വളർത്തി. ഗിഫ്റ്റ് സിറ്റിയിലെ ഡെറിവേറ്റീവ് വ്യാപാരത്തിൽ ഗിഫ്റ്റ് നിഫ്റ്റി വ്യാഴാഴ്ച രാത്രി 23,060-ൽ ക്ലോസ് ചെയ്തു. ഇന്നു രാവിലെ 22,982 വരെ താഴ്ന്നു. ഇന്ത്യൻ വിപണി ഇന്നു ഗണ്യമായ നഷ്‌ടത്തോടെ വ്യാപാരം തുടങ്ങും എന്നാണ് സൂചന.

ടാറ്റ ഗ്രൂപ്പിൽ സങ്കീർണത കൂടുന്നു

ടാറ്റ ഗ്രൂപ്പിലെ കാര്യങ്ങൾ കൂടുതൽ സങ്കീർണമാകുകയാണ്. ടാറ്റ ട്രസ്റ്റുകളുടെ ചെയർമാൻ നോയൽ ടാറ്റ, റീട്ടെയിൽ കമ്പനിയായ ട്രെൻ്റ് ലിമിറ്റഡിൻ്റെ ചെയർമാൻ സ്ഥാനം ഒഴിഞ്ഞു. ടാറ്റ ഗ്രൂപ്പിലെ നയമനുസരിച്ച് 70 വയസ് തികഞ്ഞതിനെ തുടർന്നാണിത്. പകരം പ്രമുഖ അഭിഭാഷകൻ ബഹ്‌റാം വക്കീൽ ചെയർമാനായി. ഈ നിയമനം ടാറ്റ സൺസ് ചെയർമാൻ എൻ. ചന്ദ്രശേഖരനെ അറിയിച്ചല്ല നടത്തിയത് എന്നു റിപ്പോർട്ടുണ്ട്.

നവംബർ 12നു നോയൽ ടാറ്റ അഞ്ചു ടാറ്റ കമ്പനികളിലെ പദവികൾ ഒഴിയും. വോൾട്ടാസ്, ടാറ്റ ഇൻവെസ്റ്റ്മെൻ്റ് കോർപറേഷൻ, ടാറ്റ ഇൻ്റർനാഷണൽ എന്നിവയുടെ ചെയർമാൻ പദവും ടാറ്റ സ്റ്റീലിലെയും ടൈറ്റനിലെയും വൈസ് ചെയർമാൻ സ്ഥാനവും ആണ് ഒഴിയുന്നത്. ടാറ്റ സൺസിൽ ഡയറക്ടറായി തുടരും.

ഇതിനിടെ ടാറ്റ സൺസ് ലിസ്റ്റ് ചെയ്യന്നമെന്ന നിലപാടിൽ മാറ്റം വരുത്താൻ റിസർവ് ബാങ്ക് തയാറായിട്ടില്ല. ടാറ്റ സൺസ് ചെയർമാൻ ചന്ദ്രശേഖരൻ്റെ കാലാവധി നീട്ടാനുള്ള ബോർഡ് തീരുമാനത്തെ നിയമപരമായി തടയാൻ നോയൽ ശ്രമിക്കും എന്നു സൂചനയുണ്ട്. ബോർഡ് തീരുമാനത്തിൻ്റെ രേഖകൾ നോയൽ കമ്പനി സെക്രട്ടറിയോട് ആവശ്യപ്പെട്ടു. ചന്ദ്രശേഖരൻ്റെ മകൻ്റെ കമ്പനിയുമായി ടിവിഎസ് ഗ്രൂപ്പിനു വലിയ ബിസിനസ് ഇടപാട് ഉള്ളതു പരസ്യപ്പെടുത്തിയിട്ടില്ല എന്നു നോയൽ ആരോപിച്ചു. ടാറ്റ ട്രസ്റ്റുകളുടെ പ്രതിനിധിയായി ടാറ്റ സൺസ് ബോർഡിൽ വന്ന വേണു ശ്രീനിവാസൻ ചന്ദ്രശേഖരനെ പിന്തുണച്ചത് ഈ ബന്ധത്തിൻ്റെ പേരിലാണെന്നു നോയൽ സൂചിപ്പിക്കുന്നു.

കേന്ദ്രസർക്കാർ ഗൗതം അദാനിക്കു വേണ്ടി ടാറ്റാ ഗ്രൂപ്പിനെ തകർക്കാൻ ശ്രമിക്കുന്നു എന്നു പ്രതിപക്ഷ നേതാവ് രാഹുൽ ഗാന്ധി ആരോപിച്ചത് വിഷയത്തിനു പുതിയ മാനം പകർന്നു.

ആമസോണും ഇൻ്റെലും ഇടിവിൽ; ടെക് ആശങ്ക വളരുന്നു

ആൽഫബെറ്റിനു (ഗൂഗിൾ) പിന്നാലെ ആമസോണും ഇൻ്റലും പ്രതീക്ഷകൾ തകിടം മറിച്ച റിസൽട്ടു പുറത്തുവിട്ടു. ഇതോടെ ടെക്നോളജി, എഐ മേഖലകളെ കുറിച്ചുള്ള ആശങ്ക വർധിച്ചു. ടെക് ഓഹരികൾ ഫ്യൂച്ചേഴ്സിൽ താഴ്ന്നു.

ആമസോണിൻ്റെ മൂലധനച്ചെലവ് ഈ വർഷം 22,000 കോടി ഡോളർ ആകും മൂന്നാം പാദത്തിൽ കമ്പനിയുടെ ഫ്രീ ക്യാഷ് ഫ്ലോ മൈനസ് 4240 കോടി ഡോളർ ആയി ഇടിഞ്ഞു. ഇതു വിപണി കണക്കാക്കിയതിലും വളരെ കൂടുതലാണ്. ഓഹരി ഫ്യൂച്ചേഴ്‌സിൽ 7.4 ശതമാനം ഇടിഞ്ഞു. ഇൻ്റെലിൻ്റെ മൂന്നാം പാദ വരുമാനം അഞ്ചു ശതമാനം കുറഞ്ഞു. നാലാം പാദ വരുമാന പ്രതീക്ഷ ഗണ്യമായി കുറച്ചു. ഓഹരി ഫ്യൂച്ചേഴ്സിൽ 23 ശതമാനം ഇടിഞ്ഞു. വ്യാഴാഴ്ച 3.62 ശതമാനം താഴ്ന്നു ക്ലോസ് ചെയ്തതിനു പിന്നാലെയാണിത്.

ഇന്നു യുഎസ് ഫ്യച്ചേഴ്സിൽ ആപ്പിൾ ഒഴികെ എല്ലാ ടെക് ഭീമന്മാരും ഗണ്യമായ നഷ്‌ടത്തിലാണ്. നാസ്ഡാക് സൂചിക ഫ്യൂച്ചേഴ്സിൽ ഒന്നര ശതമാനത്തിലധികം താഴ്ചയിലായി. ഇന്നലെ വ്യാപാര സമയത്തു നാസ്ഡാക് 1.38 ശതമാനം താഴ്ന്നതാണ്.

യു.എസ് വിപണി നഷ്ടത്തിൽ

ആൽഫബെറ്റ് (ഗൂഗിൾ) റിസൽട്ട് നിരാശപ്പെടുത്തിയത് ഇന്നലെ യു.എസ് വിപണികളെ ഉലച്ചു. ആൽഫബെറ്റ് ഓഹരി 12.3 ശതമാനം ഇടിഞ്ഞു. വിപണി മൂല്യത്തിലെ നഷ്‌ടം 50,000 കോടി ഡോളർ. ഫ്യൂച്ചേഴ്‌സിൽ ഓഹരി 1.2 ശതമാനം കൂടി താഴ്ന്നു. എഐക്കു വേണ്ടി കമ്പനികൾ നടത്തുന്ന ഭീമമായ നിക്ഷേപത്തിനു തക്ക ആദായം കിട്ടുമോ എന്ന ആശങ്ക വീണ്ടും ബലപ്പെട്ടു. സോഫ്‌റ്റ്‌‍വേർ സർവീസുകൾ നൽകുന്ന സർവീസ്നൗ ഓഹരി 27 ശതമാനം ഇടിഞ്ഞു.

യു.എസ് മൂന്നാം പാദ ജിഡിപി വളർച്ച 3.4 ശതമാനം എന്ന മികച്ച നിലയിലേക്കു കയറിയത് ഈ ടെക് ദൗർബല്യത്തിൽ വേണ്ടത്ര ശ്രദ്ധിക്കപ്പെട്ടില്ല. മൂലധന നിക്ഷേപത്തിലെ 12.7 ശതമാനം കുതിപ്പും ജനങ്ങളുടെ ഉപഭോഗത്തിലെ 3.8% വളർച്ചയുമാണു ജിഡിപിയെ കയറ്റിയത്. രണ്ടാം പാദ വളർച്ച 2.2 ശതമാനമായിരുന്നു.

വ്യാഴാഴ്ച ഡൗ ജോൺസ് സൂചിക 132.54 പോയിൻ്റ് (0.25 ശതമാനം) താഴ്ന്ന് 52,342.56ൽ ക്ലോസ് ചെയ്തു. എസ് ആൻഡ് പി 23.59 പോയിൻ്റ് (0.30%) നഷ്ടത്തോടെ 7720.39ൽ അവസാനിച്ചു. നാസ്ഡാക് കോംപസിറ്റ് 365.13 പോയിൻ്റ് (1.38%) ഇടിഞ്ഞ് 26,184.72ൽ ക്ലോസ് ചെയ്തു.

ഫ്യൂച്ചേഴ്സ് താഴോട്ട്

യു.എസ് ഫ്യൂച്ചേഴ്‌സ് ഇന്നു താഴുകയാണ്. ഡൗ ജോൺസ് 122 പോയിൻ്റും (0.23 ശതമാനം) എസ് ആൻഡ് പി 81 പോയിൻ്റും (1.04%) നാസ്ഡാക് 692 പോയിൻ്റും (2.34%) താഴ്ന്നു നീങ്ങുന്നു.

എഡിആർ വിപണി

ന്യൂയോർക്കിലെ എഡിആർ (അമേരിക്കൻ ഡെപ്പോസിറ്ററി റെസീറ്റ്) വിപണിയിൽ വ്യാഴാഴ്ച എച്ച്ഡിഎഫ്സി ബാങ്ക് വ്യാപാരസമയത്ത് 1.16 ശതമാനം ഉയർന്നിട്ടു തുടർ വ്യാപാരത്തിൽ മാറ്റമില്ലാതെ 21.80 ഡോളറിൽ ക്ലോസ് ചെയ്തു. ഐസിഐസിഐ ബാങ്ക് നിശ്ചിത സമയത്ത് 1.50% ഉയർന്നിട്ടു തുടർ വ്യാപാരത്തിൽ മാറ്റമില്ലാതെ 29.13 ഡോളറിൽ അവസാനിച്ചു. ഇൻഫോസിസ് നിശ്ചിതസമയത്ത് 0.91% കയറിയ ശേഷം തുടർ വ്യാപാരത്തിൽ 0.82% താഴ്ന്നു 12.10 ഡോളറിൽ ക്ലോസ് ചെയ്തു. വിപ്രോ വിപണിസമയത്ത് 2.43% കയറിയ ശേഷം തുടർവ്യാപാരത്തിൽ 0.47% താഴ്ന്നു 2.10 ഡോളറിൽ അവസാനിച്ചു.

യൂറോപ്പ് മുന്നേറി

യൂറോപ്യൻ ഓഹരിവിപണികൾ വ്യാഴാഴ്ച മികച്ച നേട്ടത്തിൽ അവസാനിച്ചു. യൂറോപ്യൻ കേന്ദ്രബാങ്ക് (ഇസിബി) പലിശനിരക്ക് മാറ്റാതെ പണനയം പ്രഖ്യാപിച്ചു. വിപണി മുൻപേ കണക്കാക്കിയതാണ്. ഇസിബി പ്രസിഡൻ്റ് ക്രിസ്‌റ്റീൻ ലഗാർഡീ കാലാവധിക്കു മുൻപേ ഫെബ്രുവരിയിൽ സ്ഥാനമൊഴിയും എന്നു പ്രഖ്യാപിച്ചു.

ഏഷ്യൻ വിപണികൾ നഷ്ടത്തിൽ

ഏഷ്യൻ വിപണികൾ ഇന്നു നഷ്‌ടത്തിലാണ്. ദക്ഷിണ കൊറിയയിലെ കോസ്‌പി സൂചിക അഞ്ചു ശതമാനം ഇടിഞ്ഞു. കൊറിയയിലെ പ്രമുഖ സെമികണ്ടക്ടർ കമ്പനി എസ്കെ ഹൈനിക്സും സാംസംഗും എട്ടു ശതമാനം വരെ താഴ്ന്നു. ജപ്പാനിലെ നിക്കൈ സൂചിക 2.8 ശതമാനം താണു. തായ്‌‍വാൻ സൂചിക 2.75 ശതമാനം താഴ്ന്നു. ഷാങ്ഹായ് സൂചിക 1.2 ശതമാനം നഷ്ടത്തിലായി. ഹോങ്കോങ്ങിലെ ഹാങ് സെങ് 0.50 ശതമാനം നേട്ടത്തിലാണ്.

കുതിച്ച് ഇന്ത്യൻ വിപണി

വിദേശനിക്ഷേപകരെ തിരികെ വരുത്താൻ ഓഹരികളിലെ മൂലധനാദായ നികുതി (കാപ്പിറ്റൽ ഗെയിൻസ് ടാക്സ്) കുറയ്ക്കും എന്ന അഭ്യൂഹം വിപണിയിൽ വീണ്ടും ശക്തിപ്പെട്ടു. ക്രൂഡ് ഓയിൽ വില കുറയുന്നതിൻ്റെ സൂചന കണ്ടതും യുഎസ് ഫെഡ് പലിശ കൂട്ടാത്തതും വിപണിക്ക് ആവേശമായി. എല്ലാം ചേർന്നപ്പോൾ മൂന്നു ദിവസത്തെ ഇടിവിലെ നഷ്ടം നികത്തിയ മുന്നേറ്റത്തിലായി ഇന്ത്യൻ വിപണി ഇന്നലെ.

വാഹനങ്ങൾ ഒഴികെ എല്ലാ മേഖലകളും ഇന്നലെ നേട്ടത്തിലായി. ഹീറോ മോട്ടോകോയും മാരുതിയും ബജാജ് ഓട്ടോയുമാണ് ഓട്ടോ സൂചികയെ താഴ്‌ത്തിയത്. എഫ്എംസിജിയും റിയൽറ്റിയും പൊതുമേഖലാ ബാങ്കുകളും മികച്ച മുന്നേറ്റം നടത്തി.വിശാലവിപണിയിൽ കൂടുതൽ ഓഹരികൾ കയറി. ബിഎസ്ഇയിൽ 2600 ഓഹരികൾ ഉയർന്നു. 1,787 ഓഹരികൾ നഷ്‌ടത്തിലായി. എൻഎസ്ഇയിൽ 2,182 ഓഹരികൾ കയറിയപ്പോൾ 1,372 എണ്ണം ഇടിഞ്ഞു.

രണ്ടു ദിവസത്തെ വാങ്ങലിനു ശേഷം വിദേശനിക്ഷേപകർ വ്യാഴാഴ്ച അറ്റ വിൽപനക്കാരായി. അവർ ക്യാഷ് വിപണിയിൽ 943.60 കോടി രൂപയുടെ അറ്റ വിൽപന നടത്തി. സ്വദേശി ഫണ്ടുകളും സ്ഥാപനങ്ങളും കൂടി 1924.41 കോടി രൂപയുടെ അറ്റ വാങ്ങലും നടത്തി.

ബുധനാഴ്ച സെൻസെക്‌സ് 905.01 പോയിൻ്റ് (1.24%) കുതിച്ച് 74,151.04 ൽ ക്ലോസ് ചെയ്തു. നിഫ്റ്റി 237.90 പോയിൻ്റ് (1.05%) ഉയർന്ന് 22,936.75 ൽ അവസാനിച്ചു. ബാങ്ക് നിഫ്റ്റി 642.25 പോയിൻ്റ് (1.18%) നേട്ടത്തോടെ 54,909.65 ൽ ക്ലോസ് ചെയ്തു. മിഡ് ക്യാപ് 100 സൂചിക 566.95 പോയിൻ്റ് (0.99%) നേട്ടത്തോടെ 57,841.65 ൽ അവസാനിച്ചു. സ്മോൾ ക്യാപ് 100 സൂചിക 176.45 പോയിൻ്റ് (0.95%) കയറി 18,811.35 ൽ ക്ലോസ് ചെയ്തു.

സ്വർണം വീണ്ടും 4000-നു താഴെ

പലിശ വർധനയെപ്പറ്റിയുള്ള ഭീതി സ്വർണ വിപണിയെ വേട്ടയാടുകയാണ്. വില വീണ്ടും ഔൺസിനു 4,000 ഡോളറിനു താഴെ എത്തി. കഴിഞ്ഞ ആഴ്ച 3,994 ഡോളറും ജൂലൈയിൽ 3,975 ഡോളറും വരെ സ്വർണം താഴ്ന്നതാണ്. ഇത്തവണ ആ നിലവാരങ്ങളിൽ പിന്തുണ കിട്ടുമോ എന്നു പലരും സംശയിക്കുന്നു.

ഡിസംബറിൽ യു.എസ് ഫെഡ് ഒരു തവണ കൂടി നിരക്കു കൂട്ടും എന്നു വിപണി കരുതുന്നു. പിന്നീടു വർധന വേണ്ടി വരില്ലെന്ന പ്രതീക്ഷ തകർക്കുന്ന വിധമാണു യുഎസ് ജിഡിപി വളർച്ച വന്നത്. 3.4 ശതമാനം വളർച്ച നിഗമനങ്ങളേക്കാൾ കൂടുതലായി. നിരക്കുവർധന തുടർന്നാൽ നിക്ഷേപകർ സ്വർണം വിട്ടു കടപ്പത്രങ്ങളിലേക്കു മാറും. അതാണു സ്വർണവിലയെ താഴ്ത്തുന്ന ഘടകം.

ഇന്നലെ സ്വർണം 46.10 ഡോളർ (1.13%) ഇടിഞ്ഞ സ്വർണം ഔൺസിന് 4022.50 ഡോളറിൽ ക്ലോസ് ചെയ്തു. ഇന്നു രാവിലെ 0.50 ശതമാനം കുറഞ്ഞ് 3095.90 ഡോളർ വരെ വില താഴ്ന്നു. പിന്നീടു 4006 വരെ കയറി. കേരളത്തിൽ 22 കാരറ്റ് സ്വർണം പവന് വ്യാഴാഴ്ച വിലമാറ്റം ഇല്ലാതെ 1,05,560 രൂപയിൽ തുടർന്നു. ഇന്നു വില ഗണ്യമായി കുറയും.

വെള്ളി വില ഇന്നലെ 3.35 ശതമാനം ഇടിഞ്ഞ് ഔൺസിന് 52.29 ഡോളറിൽ ക്ലോസ് ചെയ്തു. ഇന്നു രാവിലെ 1.33 ശതമാനം താഴ്ന്ന് 51.62 ഡോളറിൽ എത്തി. പ്ലാറ്റിനം 1464 ഡോളർ, പല്ലാഡിയം 972 ഡോളർ, റോഡിയം 8550 ഡോളർ എന്നിങ്ങനെ നിൽക്കുന്നു.

ലോഹങ്ങൾ ഇടിവിൽ

സിങ്ക് ഒഴികെ വ്യാവസായിക ലോഹങ്ങൾ വ്യാഴാഴ്ച ഇടിഞ്ഞു. ചെമ്പ് 0.59 ശതമാനം താഴ്ന്നു ടണ്ണിന് 14,557.69 ഡോളർ ആയി. അലൂമിനിയം 0.67 ശതമാനം കുറഞ്ഞത് 3063.20 ഡോളറിൽ എത്തി. നിക്കലും ടിന്നും ലെഡും താഴ്ന്നു. സിങ്ക് ഉയർന്നു.

റബർ: വിദേശത്തു താഴ്ച, ഇന്ത്യയിൽ കയറ്റം

റബർ വില വിദേശത്തു താഴ്ന്നപ്പോൾ കേരളത്തിൽ കയറ്റം തുടർന്നു. ബാങ്കോക്കിൽ ആർഎസ്എസ്-1 ക്വിൻ്റലിന് 285.50ഉം ആർഎസ്എസ്-3 ക്വിന്റലിന് 282.10ഉം ഡോളറിലേക്കു താഴ്ന്നു. കേരളത്തിൽ ആർഎസ്എസ്-4 ഇനം കയറി ക്വിൻ്റലിന് 29,700 രൂപയിൽ എത്തി.

കൊക്കോ കയറി

കൊക്കോ വില നാമമാത്രമായി കയറി ടണ്ണിന് 5459.4 ഡോളറിൽ ക്ലോസ് ചെയ്തു. അറബിക്ക കാപ്പി പൗണ്ടിന് 0.45 ശതമാനം കുറഞ്ഞ് 2.85 ഡോളർ ആയി. പാം ഓയിൽ 0.80 ശതമാനം താഴ്‌ന്നു ടണ്ണിന് 4627 മലേഷ്യൻ റിംഗിറ്റ് ആയി.

ഡോളർ സൂചിക ഇടിയുന്നു

യു.എസ് ഡോളർ സൂചിക വ്യാഴാഴ്ച അൽപം താഴ്ന്നു 102.04 ൽ ക്ലോസ് ചെയ്തു. ഇന്നു രാവിലെ കുത്തനേ താഴ്ന്ന് 101.59 ലേക്ക് താണു. യൂറോ ഇന്ന് 1.1195 ഡോളറിലും പൗണ്ട് 1.3389 ഡോളറിലും എത്തി. ജാപ്പനീസ് യെൻ ഒരു ഡോളറിന് 157.47 യെൻ ആയി. ചൈനീസ് യുവാൻ ഡോളറിന് 6.66 യുവാനിലേക്കു കയറി. അമേരിക്കയിൽ 10 വർഷ കടപ്പത്രങ്ങളുടെ നിക്ഷേപനേട്ടം (yield) ഇന്നു രാവിലെ 4.914 ശതമാനമായി താഴ്ന്നു.

രൂപ താഴ്ന്നു

രൂപ ഇന്നലെയും താഴ്ന്നു. വ്യാഴാഴ്ച ഡോളർ നാലു പൈസ കൂടി 95.26 രൂപയിൽ ക്ലോസ് ചെയ്തു. ഇന്നു രാവിലെ വിദേശത്തെ ഫോർവേഡ് വിപണിയിൽ ഡോളർ 95.10 രൂപയിലാണ്. ഡോളർ സൂചികയിലെ ഇടിവ് രൂപയ്ക്കു സഹായമാകും. ചൈനീസ് യുവാൻ 14.29 രൂപയിൽ തുടർന്നു. യൂറോ 106.70 രൂപയായി ഉയർന്നു.

ക്രൂഡ് ഓയിൽ കയറുന്നു

ക്രൂഡ് ഓയിൽ വ്യാഴാഴ്ച 0.62 ശതമാനം താഴ്ന്നു. ഇന്ന് വീണ്ടും കയറി. ബ്രെൻ്റ് ഇനം ഇന്നലെ 0.54 ഡോളർ കുറഞ്ഞ് 114.89 ഡോളറിൽ ക്ലോസ് ചെയ്തു. ഇന്നു രാവിലെ വില ഉയർന്നു 117.80 ഡോളറിൽ എത്തി. ഡബ്ള്യുടിഐ ഇനം 104.84 ഡോളറിലാണ്.

ക്രിപ്റ്റോകൾ ഇടിയുന്നു

ക്രിപ്റ്റോ കറൻസി എക്സ്ചേഞ്ച് ആയ ബിനാൻസിൽ ഡിജിറ്റൽ നുഴഞ്ഞുകയറ്റം നടന്നതായ റിപ്പോർട്ട് ക്രിപ്റ്റോ കറൻസികളെ തകർച്ചയിലാക്കി. പല ക്രിപ്റ്റോ സ്ഥാപനങ്ങളും ഇടപാടുകൾ മരവിപ്പിച്ചു. ബിറ്റ്കോയിൻ ഇന്നു രാവിലെ ആറു ശതമാനം ഇടിഞ്ഞ് 77,000 ഡോളറിനു താഴെ വന്നു. ഈഥർ 2200 ഡോളറിനും സൊലാന 94 ഡോളറിനും താഴെയാണ്.

വിപണി സൂചനകൾ

(2026 ഒക്‌ടോബർ 29, വ്യാഴം)

• സെൻസെക്സ്: 74,151.04 +1.24%

• നിഫ്റ്റി-50: 22,936.75 +1.05%

• ബാങ്ക് നിഫ്റ്റി: 54,909.65 +1.18%

• മിഡ് ക്യാപ്-100: 57,841.65 +0.99%

• സ്മോൾ ക്യാപ്-100: 18,811.35 +0.95%

• ഡൗജോൺസ്: 52,342.56 -0.25%

• എസ്ആൻഡ്പി: 7720.39 -0.30%

• നാസ്ഡാക്: 26,184.72 -1.38%

• ഡോളർ: ₹95.26 +₹0.04

• സ്വർണം (ഔൺസ്): $4022.50 -$46.10

• സ്വർണം (പവൻ): ₹1,05,560 +₹00

• ക്രൂഡ് ഓയിൽ ബ്രെൻ്റ്: $114.89 -$0.54