ഓഹരിയൊന്നിന് ₹506 വരെ കിട്ടും: വരുന്ന ആഴ്ചയിൽ വമ്പൻ ഡിവിഡന്റ് നൽകുന്ന 25 ഓഹരികൾ; നിങ്ങളുടെ കൈവശമുണ്ടോ?

ഇന്ത്യൻ ഓഹരി വിപണിയിൽ നിക്ഷേപകർക്ക് വമ്പൻ ഡിവിഡന്റ് (Dividend) ലഭിക്കുന്ന ഒരു വ്യാപാര ആഴ്ചയാണ് ഇനി കടന്നുവരുന്നത്. 2026 ജൂലൈ 13 മുതൽ 17 വരെയുള്ള അടുത്ത വ്യാപാര ആഴ്ചയിൽ തൊണ്ണൂറോളം ലി​സ്റ്റഡ് കമ്പനികളാണ് നിക്ഷേപകർക്ക് ഡിവിഡന്റ് നൽകുമെന്ന് അറിയിച്ചിട്ടുള്ളത്. സെപ്ഷ്യൽ ഡിവി‍ഡന്റും ഫൈനൽ ഡിവിഡന്റും ചേർത്ത് ആകെ 506 രൂപ വീതം പ്രതിയോഹരി ഡിവിഡന്റ് നൽകുന്ന 3-എം ഇന്ത്യയുടെ റെക്കോഡ് പേഔട്ട് മുതൽ നിരവധി സ്മോൾ ക്യാപ് കമ്പനികളുടെ ഡിവിഡന്റ് വരെ ഇത്തവണത്തെ പട്ടികയിലുണ്ട്.

ഇതിൽ 100-ലധികം തുക പ്രതിയോഹരി ഡിവിഡന്റ് ആയി നൽകുന്ന 3 കമ്പനികൾ ഉൾപ്പെടുന്നു. മൊത്തം 25 കമ്പനികൾ പ്രതിയോഹരി 10 രൂപയിലധികം ഡിവിഡന്റ് ഇനത്തിൽ നിക്ഷേപകർക്കുള്ള പാരിതോഷികമായി നൽകുന്നുണ്ട്. കൂടുതൽ വിശദാംശം നോക്കാം.

₹100-ന് മുകളിൽ ഡിവിഡന്റ്

വരുന്ന ആഴ്ചയിൽ മൂന്ന് ലി​സ്റ്റഡ് കമ്പനികളാണ് ഓഹരിയൊന്നിന് നൂറു രൂപയ്ക്ക് മുകളിലുള്ള ഡിവിഡന്റ് തുക നിക്ഷേപകർക്ക് നൽകുന്നത്.

• 3-എം ഇന്ത്യ ലിമിറ്റഡ് (BSE: 523395, NSE: 3MINDIA): തങ്ങളുടെ ഓഹരി ഉടമകൾക്ക് ഇരട്ട നേട്ടമാണ് കമ്പനി നൽകുന്നത്. പ്രതിയോഹരി 346 രൂപ വീതം സ്പെഷ്യൽ ഡിവിഡന്റും ഓഹരിയൊന്നിന് 160 രൂപ വീതം ഫൈനൽ ഡിവിഡന്റും ചേർത്ത് ആകെ 506 രൂപയാണ് 3-എം ഇന്ത്യ ഡിവിഡന്റ് ഇനത്തിൽ നൽകാൻ പോകുന്നത്. ഇതിന്റെ റെക്കോർഡ് തീയതി 2026 ജൂലൈ 17 ആകുന്നു. വരുന്ന ആഴ്ചയിലെ ഏറ്റവും വലിയ പ്രതിയോഹരി ഡിവിഡന്റ് പേ-ഔട്ട് കൂടിയാണിത്.

• എം.ആർ.എഫ് ലിമിറ്റഡ് (BSE: 500290, NSE: MRF): ഓഹരിയൊന്നിന് 229 രൂപ വീതമാണ് ഈ ടയർ കമ്പനി ഫൈനൽ ഡിവിഡന്റ് പ്രഖ്യാപിച്ചിരിക്കുന്നത്. ഇതിന്റെ റെക്കോഡ് തീയതി 2026 ജൂലൈ 17 ആണ്.

• ഹണിവെൽ ഓട്ടോമേഷൻ (BSE: 517174, NSE: HONAUT): ഓട്ടോമേഷൻ രംഗത്തെ ഈ ബഹുരാഷ്ട്ര കമ്പനി ഓഹരിയൊന്നിന് 110 രൂപ വീതം ഫൈനൽ ഡിവിഡന്റ് ആയി നൽകും. റെക്കോർഡ് തീയതി ജൂലൈ 17 ആകുന്നു.

₹50 മുതൽ ₹100 വരെ ഡിവിഡന്റ്

രണ്ട് വൻകിട കമ്പനികളാണ് ഈ വിഭാഗത്തിൽ വരുന്നത്. ഇവയുടെയും റെക്കോർഡ് തീയതി ജൂലൈ 17 ആണ്:

• ഫൈസർ ലിമിറ്റഡ് (BSE: 500680, NSE: PFIZER): ഫാർമ മേഖലയിൽ നിന്നുള്ള ഈ ബഹുരാഷ്ട്ര കമ്പനി ഓഹരിയൊന്നിന് 75 രൂപ വീതം നിക്ഷേപകർക്ക് ഫൈനൽ ഡിവിഡന്റ് നൽകും.

• ശ്രീ സിമന്റ് (BSE: 500387, NSE: SHREECEM): പ്രമുഖ സിമന്റ് നിർമ്മാതാക്കളായ ഇവർ ഓഹരിയൊന്നിന് 70 രൂപ വീതമാണ് ഫൈനൽ ഡിവിഡന്റ് പ്രഖ്യാപിച്ചിട്ടുള്ളത്.

₹10 മുതൽ ₹50 വരെ ഡിവിഡന്റ്

അസറ്റ് മാനേജ്‌മെന്റ്, എഞ്ചിനീയറിംഗ്, ഓട്ടോമൊബീൽ, ഷു​ഗർ, ഹോസ്പിറ്റാലിറ്റി തുടങ്ങിയ വിവിധ മേഖലകളിൽ നിന്നുള്ള വലിയൊരു കൂട്ടം കമ്പനികൾ 10 മുതൽ 50 രൂപ വരെയുള്ള പരിധിയിൽ നിക്ഷേപകർക്ക് ഡിവിഡന്റ് നൽകുന്നുണ്ട്.

കമ്മിൻസ് ഇന്ത്യ (46 രൂപ), യുടിഐ അസറ്റ് മാനേജ്‌മെന്റ് കമ്പനി (40 രൂപ), എൽ.എം.ഡബ്ല്യു ലിമിറ്റഡ് (35 രൂപ), ഭാരത് ബിജ്‍ലീ (35 രൂപ), അതുൽ ലിമിറ്റഡ് (30 രൂപ), ബനാറസ് ഹോട്ടൽസ് (25 രൂപ), അഡോർ വെൽഡിംഗ്, ഫീഡോൾ കോർപ്പറേഷൻ, ഇൻഗെർസോൾ-റാൻഡ്, സെൻസാർ ടെക്നോളജീസ്, മഗധ് ഷുഗർ, കെഫിൻ ടെക്നോളജീസ് (KFin Tech), ക്രാഫ്റ്റ്‌സ്മാൻ ഓട്ടോമേഷൻ, ഹെസ്റ്റർ ബയോസയൻസസ്, ടി.ടി.കെ ഹെൽത്ത്കെയർ എന്നീ ഓഹരികൾ 10 രൂപയിലധികം ലാഭവിഹിതമായി നൽകുന്നു.

നിക്ഷേപകർ ശ്രദ്ധിക്കേണ്ട കാര്യങ്ങൾ

ഉയർന്ന ഡിവിഡന്റ് തുകയോ ആകർഷകമായ ശതമാനമോ കണ്ട് മാത്രം ഒരു ഓഹരിയിൽ നിക്ഷേപം നടത്തരുത്. നിക്ഷേപിക്കുന്നതിന് മുൻപ് താഴെ പറയുന്ന കാര്യങ്ങൾ ഓർമ്മിക്കുക:

• എക്സ്-ഡിവിഡന്റ് വില വ്യത്യാസം: എക്സ്-ഡിവിഡന്റ് തീയതിക്ക് ശേഷം ഓഹരി വിലയിൽ ഡിവിഡന്റ് തുകയ്ക്ക് തുല്യമായ കുറവ് വരാറുണ്ട്. അതിനാൽ ഡിവിഡന്റിനായി മാത്രം ഉയർന്ന വിലയിൽ ഓഹരികൾ വാങ്ങുന്നത് പലപ്പോഴും ലാഭകരമാകണമെന്നില്ല.

• സുസ്ഥിരത: കമ്പനികൾ വല്ലപ്പോഴും നൽകുന്ന 'സ്പെഷ്യൽ ഡിവിഡന്റുകളെക്കാൾ' പ്രധാനം അവ കൃത്യമായ ഇടവേളകളിൽ സ്ഥിരമായി ലാഭവിഹിതം നൽകുന്നുണ്ടോ എന്നതാണ്.

• അടിസ്ഥാനപരമായ കരുത്ത്: ഡിവിഡന്റ് വരുമാനത്തോടൊപ്പം കമ്പനിയുടെ ബിസിനസ്സ് അടിത്തറ, സാമ്പത്തിക ഭദ്രത, ഭാവി വളർച്ചാ സാധ്യതകൾ എന്നിവ കൂടി വിലയിരുത്തി വേണം നിക്ഷേപ തീരുമാനം എടുക്കാൻ.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)