അടുത്തയാഴ്ച ഓഹരിയെണ്ണം അഞ്ചിരട്ടിയാകും; സ്പ്ലിറ്റ് ചെയ്യാൻ പോകുന്ന ഈ ഓഹരികളും ഇ.ടി.എഫുകളും കൈവശമുണ്ടോ?

ഓഹരി വിപണിയിൽ ലിക്വിഡിറ്റി വർധിപ്പിക്കുന്നതിനും ചെറുകിട നിക്ഷേപകരെ ആകർഷിക്കുന്നതിനുമായി ലി​സ്റ്റഡ് കമ്പനികൾ സ്വീകരിക്കുന്ന പ്രധാന മാർഗങ്ങളിലൊന്നാണ് സ്റ്റോക്ക് സ്പ്ലിറ്റ് അഥവാ ഓഹരി വിഭജനം. വരുന്ന വ്യാപാര ആഴ്ചയിൽ (2026 ജൂൺ 29 - ജൂലൈ 3) ​രണ്ട് സ്മോൾ ക്യാപ് ഓഹരികളും രണ്ട് എക്സ്ചേഞ്ച് ട്രേഡഡ് ഫണ്ടുകളും (ഇ.ടി.എഫ്) സ്റ്റോക്ക് സ്പ്ലിറ്റ് നടപ്പാക്കാൻ പോകുകയാണ്. ഇതിന്റെ വിശദാംശങ്ങൾ താഴെ നൽകുന്നു.

മധ്യ ഭാരത് അഗ്രോ പ്രോ‍ഡക്റ്റ്സ്

ഓസ്വാൾ ഗ്രൂപ്പിന്റെ ഭാഗമായ ഈ സ്മോൾ ക്യാപ് കമ്പനി പ്രധാനമായും വളങ്ങളും കെമിക്കൽ ഉത്പന്നങ്ങളുമാണ് നിർമിക്കുന്നത്. ഏകദേശം 5,100 കോടി രൂപയാണ് കമ്പനിയുടെ നിലവിലെ വിപണി മൂല്യം. കഴിഞ്ഞ ദിവസം മധ്യ ഭാരത് അഗ്രോ (NSE: MBAPL) ഓഹരികൾ 577 രൂപയിലാണ് ക്ലോസിം​ഗ് രേഖപ്പെടുത്തിയത്. കഴിഞ്ഞ ഒരു വർഷത്തിനിടെ 30 ശതമാനത്തിലേറെ നേട്ടം കരസ്ഥമാക്കിയ ഈ ഓഹരി, അടുത്തയാഴ്ച 10:2 അനുപാതത്തിൽ സ്പ്ലിറ്റ് ചെയ്യും.

അതായത് ഇപ്പോൾ 10 രൂപ മുഖവിലയുള്ള ഒരു മധ്യ ഭാരത് അഗ്രോ ഓഹരി, 2 രൂപ മുഖവിലയുള്ള 5 ഓഹരികളായി മാറ്റപ്പെടും. ഇതിനായുള്ള എക്സ്-സ്പ്ലിറ്റ് തീയതിയും റെക്കോഡ് തീയതിയും 2026 ജൂലൈ 03 ആണ്. ചെറിയ തോതിലാണെങ്കിലും നിക്ഷേപകർക്ക് മുടക്കമില്ലാതെ ഡിവി‍ഡന്റ് നൽകുന്ന പതിവുള്ള മധ്യ ഭാരത് അഗ്രോ ഓഹരി ‌2022-ലും 2023-ലും നിക്ഷേപകർക്ക് 1:1 അനുപാതത്തിൽ ബോണസ് ഷെയർ നൽകിയിട്ടുണ്ട്.

കൃഷ്ണ ഫോസ്കെം

2004-ൽ സ്ഥാപിതമായ ഈ സ്മോൾ ക്യാപ് കമ്പനി 'അന്നദാത', 'ഭാരത്' എന്നീ ബ്രാൻഡുകളിൽ രാസവളങ്ങൾ വിപണിയിലെത്തിക്കുന്നു. ഏകദേശം 4,400 കോടി രൂപയാണ് കമ്പനിയുടെ നിലവിലെ വിപണി മൂല്യം. കഴിഞ്ഞ ദിവസം കൃഷ്ണ ഫോസ്കെം (NSE: KRISHANA) ഓഹരികൾ 725 രൂപയിലാണ് ക്ലോസിം​ഗ് കുറിച്ചത്. കഴിഞ്ഞ ഒരു വർഷത്തിനിടെ 40 ശതമാനത്തിലേറെ നേട്ടം കരസ്ഥമാക്കിയ ഈ ഓഹരി അടുത്തയാഴ്ചയിൽ 10:2 അനുപാതത്തിൽ സ്പ്ലിറ്റ് ചെയ്യുന്നതായിരിക്കും.

അതായത് നിലവിൽ 10 രൂപ മുഖവിലയുള്ള ഒരു കൃഷ്ണ ഫോസ്കെം ഓഹരി, 2 രൂപ മുഖവിലയുള്ള 5 ഓഹരികളായി വിഭജിക്കപ്പെടും. ഇതിനായുള്ള എക്സ്-സ്പ്ലിറ്റ് തീയതിയും റെക്കോഡ് തീയതിയുമായി ജൂലൈ 03 നിശ്ചയിച്ചു. നേരിയ തോതിലാണെങ്കിൽപോലും നിക്ഷേപകർക്ക് മുടങ്ങാതെ ഡിവി‍ഡന്റ് നൽകുന്ന പതിവുള്ള കൃഷ്ണ ഫോസ്കെം ഓഹരി ‌2023 ഒക്ടോബറിൽ 1:1 അനുപാതത്തിൽ ബോണസ് ഷെയർ കൈമാറിയിരുന്നു.

ഇ.ടി.എഫ് സ്പ്ലിറ്റുകൾ

ഓഹരികൾക്ക് പുറമെ ഡി.എസ്.പി മ്യൂച്വൽ ഫണ്ടിന്റെ രണ്ട് ഇ.ടി.എഫ് (ETF) യൂണിറ്റുകളും അടുത്തയാഴ്ച സ്പ്ലിറ്റിന് വിധേയമാകുന്നുണ്ട്.

• ഡി.എസ്.പി നിഫ്റ്റി ഹെൽത്ത്കെയർ ഇ.ടി.എഫ് — നിലവിൽ 160.91 രൂപ നെറ്റ് അസറ്റ് വാല്യു (NAV) ഉള്ള ഈ ഫണ്ടിന്റെ യൂണിറ്റുകൾ 10:1 എന്ന അനുപാതത്തിലാണ് സ്പ്ലിറ്റ് ചെയ്യുന്നത്. ഇതോടെ 10 രൂപ മുഖവിലയുള്ള ഒരു യൂണിറ്റ് 1 രൂപ മുഖവിലയുള്ള 10 യൂണിറ്റുകളായി മാറും.

• ഡി.എസ്.പി നിഫ്റ്റി മിഡ്ക്യാപ്-150 ക്വാളിറ്റി 50 ഇ.ടി.എഫ് — നിലവിലെ എൻ.എ.വി 248.41 രൂപയാണ്. ഇതും 10:1 എന്ന അനുപാതത്തിൽ വിഭജിച്ച് മുഖവില 10 രൂപയിൽ നിന്ന് 1 രൂപയായി താഴ്ത്തും. ചെറുകിട നിക്ഷേപകർക്ക് കുറഞ്ഞ തുകയ്ക്ക് കൂടുതൽ എണ്ണം ഇ.ടി.എഫ് യൂണിറ്റുകൾ വാങ്ങാൻ ഇത് സഹായിക്കും.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)