നിഫ്റ്റി റിപ്പോർട്ട്: അടുത്തയാഴ്ച ഇന്ത്യൻ വിപണിയിൽ എന്ത് പ്രതീക്ഷിക്കാം? ട്രംപ് ഇനിയും പാലംവലിക്കുമോ?

ഇക്കഴിഞ്ഞ വ്യാപാര ആഴ്ചയിൽ (ജൂലൈ 6-10) ആഭ്യന്തര ഓഹരി വിപണിയിൽ നേരിയ മുന്നേറ്റമുണ്ടാകുമെന്ന് പ്രതീക്ഷിച്ചിരുന്നെങ്കിലും, ജൂലൈ 7 ചൊവ്വാഴ്ച ഉച്ചയ്ക്ക് 3 മണിയോടെ സംഭവിച്ച അപ്രതീക്ഷിത തകർച്ച വിപണിയുടെ ഗതി മാറ്റിക്കളഞ്ഞു. ഇറാനെതിരേയുള്ള വെടിനിർത്തൽ കരാർ അവസാനിച്ചുവെന്ന യു.എസ് പ്രസിഡന്റ് ഡൊണാൾഡ് ട്രംപിന്റെ സോഷ്യൽ മീഡിയ പോസ്റ്റാണ് ആഗോള വിപണികളെ ഉലച്ചതിനു പിന്നിലുള്ള യഥാർത്ഥ കാരണം. ഇതിനെ തുടർന്നുള്ള രണ്ട് ദിവസത്തിനിടെ എൻ.എസ്.ഇയുടെ മുഖ്യ ഓഹരി സൂചികയായ നിഫ്റ്റി 728 പോയിന്റ് (-2.97%) ഇടിഞ്ഞു.

എന്നാൽ വ്യാഴം, വെള്ളി ദിവസങ്ങളിൽ വെടിനിർത്തൽ ചർച്ചകൾ തുടരുകയാണെന്ന ട്രംപിന്റെ പുതിയ പ്രസ്താവന വന്നതോടെ ഇന്ത്യൻ വിപണി 400-ലധികം പോയിന്റ് തിരികെപ്പിടിച്ചു. വെള്ളിയാഴ്ചത്തെ വ്യാപാരത്തിനൊടുവിൽ ആഴ്ചക്കാലയളവിൽ 64 പോയിന്റിന്റെ (-0.26%) നേരിയ നഷ്ടത്തോടെ 24,207-ലാണ് നിഫ്റ്റി സൂചികയുടെ വ്യാപാരം അവസാനിപ്പിച്ചത്.

വിപണിയിൽ ഇനിയെന്ത്?

നിഫ്റ്റിയുടെ ടെക്നിക്കൽ ചാർട്ട് വിശകലനം ചെയ്യുമ്പോൾ, ഒരു ഇ.എം.എ ക്രോസ്ഓവർ (EMA Crossover) ദൃശ്യമാകുന്നുണ്ടെങ്കിലും (താഴെയുള്ള ചിത്രത്തിൽ ചുവന്ന മഷിയിൽ അടയാളപ്പെടുത്തിയത്), വിപണിയിൽ പൂർണമായൊരു തകർച്ച (Bearish View) ഇപ്പോൾ പ്രവചിക്കാനാവില്ല. ഈ കടന്നുപോയ ആഴ്ചയിലുണ്ടായത് വാർത്തകൾ അടിസ്ഥാനമാക്കിയുള്ള ഒരു താല്ക്കാലിക പ്രതികരണം മാത്രമാണ്.

നിലവിൽ നിഫ്റ്റി സൂചികയിൽ പ്രത്യേകിച്ചൊരു ട്രെൻഡും പ്രതീക്ഷിക്കാത്ത ന്യൂട്രൽ (Neutral) കാഴ്ചപ്പാടാണ് സ്വീകരിക്കുന്നത്. ഇ.എം.എ താഴെ നിന്നും മുകളിലേക്ക് ക്രോസ്ഓവർ ചെയ്താൽ മാത്രം വീണ്ടും ബുള്ളിഷ് നിലപാടിലേക്ക് മാറാം. അതേസമയം, യു.എസും ഇറാനും തമ്മിലുള്ള വെടിനിർത്തൽ ചർച്ചകൾ പൂർണമായി പരാജയപ്പെട്ടാൽ ഓഹരി വിപണിയിൽ കൂടുതൽ ഇടിവുകൾ പ്രതീക്ഷിക്കേണ്ടി വരും.

ശ്രദ്ധിക്കേണ്ട നിഫ്റ്റി ലെവലുകൾ

നിഫ്റ്റി ഇപ്പോഴുള്ളത് 24,207 നിലവാരത്തിലാണ്. ഇവിടെ നിന്നും സൂചിക മുന്നേറാനുള്ള ശ്രമമാണ് നടത്തുന്നതെങ്കിൽ 24,335—24,425—24,613 തുടങ്ങിയ നിലവാരങ്ങളിൽ നിന്നും പ്രതിരോധം (Resistance levels) നേരിടേണ്ടി വന്നേക്കാം. മറിച്ച് വിപണിയിൽ വിൽപ്പന സമ്മർദം തുടരുകയും നിഫ്റ്റി സൂചിക താഴേക്ക് വീഴുകയുമാണെങ്കിൽ 24,192—23,925—23,793 തുടങ്ങിയ നിലവാരങ്ങളിൽ നിന്നും പിന്തുണ (Support levels) ലഭിക്കുമെന്നും പ്രതീക്ഷിക്കാം.

വരുന്ന ആഴ്ചയിൽ ശ്രദ്ധിക്കേണ്ട 5 പ്രധാന ഘടകങ്ങൾ

• ഒന്നാം പാദഫലങ്ങൾ (FY27 Q1 Results): എച്ച്‌.സി.എൽ ടെക്നോളജീസ്, ഐ.സി.ഐ.സി.ഐ പ്രൂഡൻഷ്യൽ എ.എം.സി, എൽ ആൻഡ് ടി ടെക്, ടാറ്റാ എലെക്സി, ഗ്രോ (Groww), എച്ച്.ഡിഎഫ്.സി ലൈഫ്, എച്ച്.ഡി.എഫ്.സി എ.എം.സി, ഐ.സി.ഐ.സി.ഐ ലൊംബാർഡ്, വിപ്രോ ലിമിറ്റഡ്, ടെക് മഹീന്ദ്ര, പോളികാബ്, ജെ.എസ്.ഡബ്ല്യു സ്റ്റീൽ, ഹാവെൽസ്, എച്ച്.ഡി.എഫ്.സി ബാങ്ക്, ഐ.സി.ഐ.സി.ഐ ബാങ്ക്, ആക്സിസ് ബാങ്ക്, കൊട്ടക് ബാങ്ക്, യെസ് ബാങ്ക് എന്നീ കോർപ്പറേറ്റ് കമ്പനികളുടെ നടപ്പ് സാമ്പത്തിക വർഷത്തിലെ (2026-27) ഒന്നാം പാദഫലങ്ങൾ പുറത്തുവരും. അതനുസരിച്ചുള്ള നീക്കങ്ങൾ ഓഹരികൾ കേന്ദ്രീകരിച്ചു പ്രതീക്ഷിക്കാം.

• ആഭ്യന്തര സാമ്പത്തിക ഡാറ്റകൾ: സി.പി.ഐ സൂചികയും & ഡബ്ല്യു.പി.ഐ സൂചികയും അടിസ്ഥാനമാക്കിയുള്ള പണപ്പെരുപ്പ നിരക്കുകൾ, കയറ്റുമതി-ഇറക്കുമതി വിവരങ്ങൾ, ട്രേഡ് ബാലൻസ് ഡാറ്റ, സമ്പദ്‌ഘടനയിലെ മൊത്ത പണലഭ്യത (M3 Money Supply), വിദേശനാണ്യ കരുതൽ ശേഖരം (FX Reserves).

• ആഗോള സാമ്പത്തിക ഡാറ്റകൾ: യു.എസ് സി.പി.ഐ സൂചിക അടിസ്ഥാനമാക്കിയുള്ള പണപ്പെരുപ്പ നിരക്ക്, യു.എസിലെ റീറ്റെയ്ൽ വിൽപന കണക്കുകൾ, യു.എസിലെ തൊഴിലില്ലായ്മ നിരക്കുകൾ, ചൈന, യു.കെ, യൂറോസോൺ എന്നിവിടങ്ങളിൽ നിന്നുള്ള ജി.ഡി.പി വിവരങ്ങൾ.

• ഐ.പി.ഒ ഓഹരികളുടെ ലിസ്റ്റിംഗുകൾ: കുസുംഗർ ഓഹരി ജൂലൈ 15-ന്; ലേസർ പവർ & ഇൻഫ്രാ ഓഹരി ജൂലൈ 16-നും എൻ.എസ്.ഇ/ബി.എസ്.ഇ എന്നിവയിലെ മെയിൻബോർഡ് വിഭാ​ഗത്തിൽ അരങ്ങേറ്റം കുറിക്കും. അതുപോലെ ദേവ്‌സൺ കാറ്റലിസ്റ്റ് (ബി.എസ്.ഇ എസ്.എം.ഇ), ഹാപ്പി സ്റ്റീൽസ് (എൻ.എസ്.ഇ എസ്.എം.ഇ) വിഭാ​ഗത്തിലും ലി​സ്റ്റ് ചെയ്യും.

• പുതിയ ഐ.പി.ഒ സബ്‌സ്‌ക്രിപ്ഷൻ: ഇന്ത്യയിലെ ഏറ്റവും വലിയ അസറ്റ് മാനേജ്മെന്റ് കമ്പനിയായ എസ്‌.ബി.ഐ ഫണ്ട്സ് മാനേജ്‌മെന്റിന്റെ ഐ.പി.ഒയുടെ സബ്സ്ക്രിപ്ഷൻ ജൂലൈ 14 മുതൽ 16 വരെയുണ്ടായിരിക്കും. ആൽപൈൻ ടെക്സ്‍വേൾഡ് ഐ.പി.ഒ ജൂലൈ 14 മുതൽ 16 വരെ നടക്കുന്നതായിരിക്കും.

(Disclaimer: വിപണിയുടെ ഭാവി​ഗതിയെ സംബന്ധിച്ച കാഴ്ചപ്പാട് വിശദമാക്കുന്ന ടെക്നിക്കൽ അനാലിസിസ് പഠനാവശ്യാർത്ഥം പങ്കുവെച്ചതാണ്. ഇവിടെ നൽകിയ ടെക്നിക്കൽ അനാലിസിസ് ഇൻഡിക്കേറ്റർ ഉപയോ​ഗപ്പെടുത്തിയുള്ള ട്രേഡിൽ നിന്നും ഉറപ്പായും ലാഭം കിട്ടുമെന്ന പ്രതീക്ഷവെക്കരുത്. ഓഹരി വിപണിയിലെ നിക്ഷേപം ലാഭനഷ്ട സാധ്യതകൾക്ക് വിധേയമാണ്. പൂർവകാല പ്രകടനം ഭാവിയിൽ ലാഭം നേടിത്തരുമെന്നതിന് ഉറപ്പൊന്നുമല്ല. കൂടാതെ, സെബി അം​ഗീകൃത അനലി​സ്റ്റ് എന്ന പദവി, വിപണിയിൽ നിന്നും ലാഭം നേടിത്തരും എന്നതിനുളള ​ഗ്യാരണ്ടിയല്ലെന്നും നിക്ഷേപകർ ഓർക്കുക. ഓഹരിയിലോ ഡെറിവേറ്റീവ് കോൺട്രാക്ടുകളിലോ വ്യാപാരം ആരംഭിക്കുന്നതിന് മുമ്പേ, അതുമായി ബന്ധപ്പെട്ട റിസ്ക് ഘടകങ്ങൾ മനസ്സിലാക്കുക. നിക്ഷേപവുമായി ബന്ധപ്പെട്ട തീരുമാനം എടുക്കുന്നതിന് മുൻപ് സ്വന്തം നിലയിൽ കൂടുതൽ പഠനം നടത്തുകയോ സെബി അം​ഗീകൃത സാമ്പത്തിക വിദ​ഗ്ധരുടെ മാർ​ഗനിർദേശം തേടുകയോ നിങ്ങൾക്ക് ചെയ്യാവുന്നതാണ്. ബാലചന്ദ്രൻ ആർ.വി.യുടെ സെബി ആർ.ഐ.എ ലൈസൻസ് INA000021757 എന്നാകുന്നു.)