എൻ.എസ്.ഇ ഐ.പി.ഒ: ഓഹരികൾ വിറ്റു പണം പിൻവലിക്കാതെ ആദ്യകാല വൻകിട നിക്ഷേപകർ; സൂചനയെന്ത്?

രാജ്യത്തെ ഏറ്റവും വലിയ സ്റ്റോക്ക് എക്സ്ചേഞ്ചായ നാഷണൽ സ്റ്റോക്ക് എക്സ്ചേഞ്ച് (NSE) സെപ്റ്റംബർ 24-ന് ഓഹരി വിപണിയിൽ ലിസ്റ്റ് ചെയ്യാനിരിക്കവേ, നിലവിലുള്ള വൻകിട വ്യക്തി​ഗത നിക്ഷേപകരുടെ സമീപനം ശ്രദ്ധേയമാകുന്നു. 22,561 കോടി രൂപയുടെ പ്രാരംഭ പൊതു ഓഹരി വിൽപ്പന (IPO) പൂർണമായും ഓഫർ ഫോർ സെയിൽ (OFS) മാതൃകയിലാണ് ക്രമീകരിച്ചിരിക്കുന്നത്. 12.64 കോടി ഓഹരികൾ വിറ്റഴിക്കുന്ന ഇഷ്യൂവിലൂടെ ലഭിക്കുന്ന തുക മുഴുവൻ ആദ്യകാല നിക്ഷേപ പങ്കാളികൾക്കാണ് ലഭിക്കുക. പ്രതിയോഹരി 1,785 രൂപ എന്ന ഉയർന്ന പ്രൈസ് ബാന്റിൽ കമ്പനിയുടെ മൊത്തം മൂല്യം 4.42 ലക്ഷം കോടി രൂപയായി കണക്കാക്കപ്പെടുന്നു.

29,400 കോടിയുടെ ഓഹരികൾ മാറ്റിവച്ചു

ഇഷ്യൂ വഴി ഓഹരികൾ വിറ്റഴിച്ച് ലാഭമെടുക്കാൻ അവസരമുണ്ടായിട്ടും, എൻ.എസ്.ഇയിലുള്ള തങ്ങളുടെ പങ്കാളിത്തം പൂർണമായും നിലനിർത്താനാണ് ഒരു വിഭാഗം പ്രമുഖ വ്യക്തി​ഗത നിക്ഷേപകരും വൻകിട ഫാമിലി ഓഫീസുകളും തീരുമാനിച്ചിട്ടുള്ളത്. ഉയർന്ന പ്രൈസ് ബാൻഡ് അടിസ്ഥാനമാക്കി 29,400 കോടി രൂപ മൂല്യമുള്ള ഓഹരികളാണ് ഇത്തരത്തിൽ വിറ്റഴിക്കാതെ മാറ്റിവെച്ചിരിക്കുന്നത്.

• പ്രേംജി ഇൻവെസ്റ്റ് (PI Opportunities Fund I): 10,231.6 കോടി രൂപ മൂല്യമുള്ള 5.82 കോടി ഓഹരികൾ പൂർണമായും നിലനിർത്തുന്നു.

• 360 വൺ (360 ONE): 7,139 കോടി രൂപ മൂല്യമുള്ള 4 കോടി ഓഹരികൾ.

• രാധാകിഷൻ ദമാനി: 6,856 കോടി രൂപ മൂല്യമുള്ള 3.9 കോടി ഓഹരികൾ.

• കാറ്റമറാൻ (നാരായണ മൂർത്തി): 687 കോടി രൂപ മൂല്യമുള്ള 38.5 ലക്ഷം ഓഹരികൾ.

സുനിൽ കാന്ത് മുഞ്ചാൾ (1,821 കോടി രൂപ), ക്രിസ് ഗോപാലകൃഷ്ണൻ (1,683 കോടി രൂപ), ഡോളി ഖന്ന, റാംദിയോ അഗർവാൾ, മോത്തിലാൽ ഓസ്വാൾ തുടങ്ങിയവരും എൻ.എസ്.ഇയിലുള്ള നിക്ഷേപം പൂർണമായി നിലനിർത്തിയിട്ടുണ്ട്. അതേസമയം, ടെമാസെക് ഗ്രൂപ്പിന്റെ അരാൻഡ ഇൻവെസ്റ്റ്മെന്റ്സ് കൈവശമുള്ള 11.25 കോടി ഓഹരികളിൽ 1.12 കോടിയെണ്ണം മാത്രമാണ് വിറ്റഴിക്കുന്നത്. ബാക്കി 18,064 കോടി രൂപയുടെ ഓഹരി പങ്കാളിത്തം ഇവർ തുടരുന്നു.

വിപണി നൽകുന്ന സൂചനയെന്ത്?

ദീർഘകാലമായി അൺലിസ്റ്റഡ് വിപണിയിൽ കിടന്നിരുന്ന എൻ.എസ്.ഇ ഓഹരികൾക്ക് കൃത്യമായ ലിക്വിഡിറ്റി (Liquidity - പെട്ടെന്ന് പണമാക്കി മാറ്റാനുള്ള സൗകര്യം) ഉറപ്പാക്കാൻ ഈ ലിസ്റ്റിംഗിലൂടെ സാധിക്കും. മുമ്പ് റെഗുലേറ്ററി തടസ്സങ്ങൾ നേരിട്ടപ്പോഴും സ്ഥാപനത്തിൽ വിശ്വസ്തതയോടെ ഉറച്ചുനിന്ന നിക്ഷേപകർക്ക് യഥാർത്ഥ വിപണി മൂല്യം (Market value) നേടാനാകുമ്പോൾ, ചെറിയൊരു വിഭാഗം മാത്രമാണ് നിലവിൽ ഐ.പി.ഒ വഴി ഭാഗികമായി ലാഭമെടുക്കാൻ മുതിരുന്നത്. എൻ.എസ്.ഇയുടെ ദീർഘകാല വളർച്ചയിലും ഇന്ത്യൻ മൂലധന വിപണിയിലെ മേധാവിത്വത്തിലും നിക്ഷേപകർക്ക് ഇപ്പോഴുമുള്ള ഉറച്ച വിശ്വാസത്തിലേക്കാണ് ഈ നിലപാട് വിരൽചൂണ്ടുന്നത്.

ഓഹരി അലോട്ട്മെന്റ് പരിശോധിക്കാം

സെപ്റ്റംബർ 17 മുതൽ 21 വരെ ഐ.പിഒയുടെ ഭാ​ഗമായി നടന്ന പൊതു ഓഹരി വിൽപ്പനയിൽ ആകെ 5.71 ഇരട്ടി സബ്‌സ്‌ക്രിപ്ഷനാണ് രേഖപ്പെടുത്തിയത്. യോ​ഗ്യരായ സ്ഥാപന നിക്ഷേപകരുടെ (QIB) വിഭാഗത്തിൽ 12.68 ഇരട്ടിയും, എച്ച്.എൻ.ഐ വിഭാഗം 6.55 ഇരട്ടിയും, റീട്ടെയിൽ വിഭാഗം 1.39 ഇരട്ടിയും അപേക്ഷകൾ നേടി. അലോട്ട്മെന്റ് സെപ്റ്റംബർ 22-ന് പൂർത്തിയാകും. തെരഞ്ഞെടുത്ത അർഹരായ അപേക്ഷകരുടെ ഡിമാറ്റ് അക്കൗണ്ടുകളിൽ സെപ്റ്റംബർ 23-ഓടെ എൻ.എസ്.ഇ ഓഹരികൾ ക്രെഡിറ്റ് ചെയ്യപ്പെടും. അലോട്ട്മെന്റിൽ ഓഹരി ലഭിക്കാത്തവർക്ക് സെപ്റ്റംബർ 23-ന് നിക്ഷേപിച്ച തുക തിരികെ ലഭിക്കുന്നതായിരിക്കും (Refund).

അതേസമയം എൻ.എസ്.ഇ ഐ.പി.ഒയിൽ അപേക്ഷിച്ചിട്ടുള്ളവർക്ക് എൻ.എസ്.ഇ, ബി.എസ്.ഇ പ്രൊഫൈലുകൾ വഴിയോ രജിസ്ട്രാറായ എം.യു.എഫ്.ജി (MUFG) ഇൻടൈം പോർട്ടൽ വഴിയോ പാൻ നമ്പർ നൽകി അലോട്ട്മെന്റ് പരിശോധിക്കാവുന്നതാണ്.

അലോട്ട്മെന്റ് സ്റ്റാറ്റസ് എങ്ങനെ അറിയാം?

നിങ്ങളുടെ പാൻ (PAN), അപ്ലിക്കേഷൻ നമ്പർ അല്ലെങ്കിൽ ഡി.പി/ക്ലയന്റ് ഐ.ഡി (DP/Client ID) എന്നിവ ഉപയോഗിച്ച് പ്രധാനപ്പെട്ട 3 വഴികളിലൂടെ എൻ.എസ്.ഇ ഓഹരികളുടെ അലോട്ട്മെന്റ് പരിശോധിക്കാം:

1. രജിസ്ട്രാറുടെ വെബ്‌സൈറ്റ്: രജിസ്ട്രാറായ എം.യു.എഫ്.ജി ഇൻടൈം ഇന്ത്യയുടെ ഔദ്യോഗിക പേജ് സന്ദർശിച്ച്, ഡ്രോപ്പ് ഡൗൺ മെനുവിൽ നിന്ന് നാഷണൽ സ്റ്റോക്ക് എക്സ്ചേഞ്ച് തിരഞ്ഞെടുക്കുക. ശേഷം പാൻ, അപ്ലിക്കേഷൻ നമ്പർ അല്ലെങ്കിൽ ഡി.പി ഐ.ഡി വിവരങ്ങൾ നൽകി സെർച്ച് ചെയ്യുക. ലിങ്ക് — (https://in.mpms.mufg.com/Initial_Offer/public-issues.html)

2. എൻ.എസ്.ഇ വെബ്‌സൈറ്റ്: എൻ.എസ്.ഇയുടെ വെബ്‌സൈറ്റിലെ ബിഡ്ഡിംഗ് വിവരങ്ങൾ പരിശോധിക്കാനുള്ള പേജിൽ 'Equity' തിരഞ്ഞെടുത്ത ശേഷം നാഷണൽ ​സ്റ്റോക്ക് എക്സ്ചേഞ്ച് സെലക്ട് ചെയ്യുക. അപ്ലിക്കേഷൻ നമ്പറും പാനും നൽകി സ്റ്റാറ്റസ് ഉറപ്പാക്കാം. ലിങ്ക് — (https://www.nseindia.com/invest/check-trades-bids-verify-ipo-bids)

3. ബി.എസ്.ഇ വെബ്‌സൈറ്റ്: ബി.എസ്.ഇയുടെ ഇൻവെസ്റ്റർ അപ്ലിക്കേഷൻ പേജിൽ 'Equity' ടൈപ്പ് തിരഞ്ഞെടുത്ത്, കമ്പനികളുടെ പട്ടികയിൽ നിന്ന് നാഷണൽ സ്റ്റോക്ക് എക്സ്ചേഞ്ച് സെലക്ട് ചെയ്ത്, വിശദാംശങ്ങൾ നൽകി റിസൾട്ട് കാണാം. ലിങ്ക് —(https://www.bseindia.com/investors/appli_check)

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)