ഓഹരി വിറ്റാല് ഇനി പണമിടപാട് തത്ക്ഷണം നടപ്പാകുന്ന ടി+0 സൗകര്യം ഈമാസം 28 മുതല് നടക്കാന് സെബി (SEBI) ഒരുങ്ങുന്നു. ഇതോടെ വ്യാപാരങ്ങളുടെ സെറ്റില്മെന്റ് അതേ ദിവസം തല്ക്ഷണമായി നടക്കുമെന്ന് സെബി ചെയര്പേഴ്സണ് മാധബി പുരി ബുച്ച് അറിയിച്ചു. ഈ നീക്കം നിക്ഷേപകര്ക്ക് സെക്യൂരിറ്റികളുടെയും ഫണ്ടുകളുടെയും സെറ്റില്മെന്റുകള് വേഗത്തിലാക്കുകയും മൊത്തത്തിലുള്ള വിപണി കാര്യക്ഷമത മെച്ചപ്പെടുത്തുകയും ചെയ്യുമെന്ന് സെബി പറയുന്നു.
ഘട്ടംഘട്ടമായി നടപ്പാക്കും
പുത്തന് രീതി ഘട്ടംഘട്ടമായാണ് നടപ്പാക്കുക. ആദ്യഘട്ടത്തില് ഉച്ചയ്ക്ക് 1.30 വരെയുള്ള ട്രേഡുകള്ക്കായി ഒരു ഓപ്ഷണല് ടി+0 സെറ്റില്മെന്റ് സൈക്കിള് അവതരിപ്പിക്കും, ഫണ്ടുകളുടെയും സെക്യൂരിറ്റികളുടെയും സെറ്റില്മെന്റ് അതേ ദിവസം 4.30ന് പൂര്ത്തിയാക്കും. രണ്ടാം ഘട്ടത്തില്, വൈകിട്ട് 3.30 വരെ ട്രേഡുകള്ക്കായി ഓപ്ഷണല് ഇമ്മീഡിയേറ്റ് ട്രേഡ്-ബൈ-ട്രേഡ് സെറ്റില്മെന്റ് നടത്തും. നേരത്തെയുള്ള പണമിടപാടുകള് സംബന്ധിച്ച തത്സമയ അറിയിപ്പിനായി ഡിപ്പോസിറ്ററികള്ക്കും ക്ലിയറിംഗ് കോര്പ്പറേഷനുകള്ക്കുമിടയില് API (application programming interface) അടിസ്ഥാനമാക്കിയുള്ള ഇന്റര്ഫേസ് നിര്മ്മിക്കും. ഒന്നാം ഘട്ടത്തിന് കീഴിലുള്ള എല്ലാ സെക്യൂരിറ്റികളും രണ്ടാം ഘട്ടത്തിന് കീഴില് ലഭ്യമാകും.
നിലവില് ടി+1
നിലവില് ടി+1 അടിസ്ഥാനത്തിലാണ് വ്യാപാരം നടക്കുന്നത്. 2023 ജനുവരിയിലാണ് സ്റ്റോക്ക് മാര്ക്കറ്റുകള് ടി+1 സെറ്റില്മെന്റിലേക്ക് മാറിയത്. വ്യാപാരം നടത്തി അടുത്ത പ്രവൃത്തി ദിവസം തന്നെ അവ തീര്പ്പാക്കുന്ന സംവിധാനമാണിത്. നേരത്തെ ഇത് ടി+2 (രണ്ട് ദിവസത്തിനുള്ളില്) സംവിധാനമായിരുന്നു. വിപണിയില് ഇനി മാര്ച്ച് 28 മുതല് ടി+1 സെറ്റില്മെന്റ് സൈക്കിളിനൊപ്പം ടി+0 സെറ്റില്മെന്റും നിലവിലുണ്ടാകും. ഇതോടെ ചൈനയ്ക്ക് ശേഷം ഒരു ദിവസത്തെ ചെറിയ സെറ്റില്മെന്റ് സൈക്കിളില് പ്രവര്ത്തിക്കുന്ന രണ്ടാമത്തെ രാജ്യമായി ഇന്ത്യ മാറും. മറ്റ് മിക്ക പ്രധാന സമ്പദ്വ്യവസ്ഥകളിലും, വ്യാപാര സെറ്റില്മെന്റ് സാധാരണയായി രണ്ട് ദിവസത്തിനുള്ളിലാണ് പൂര്ത്തിയാക്കുന്നത്.
Read DhanamOnline in English
Subscribe to Dhanam Magazine
