കണ്സ്യൂമര് ഇലക്ട്രിക് ഉത്പന്ന നിര്മാതാക്കളായ (fast moving electrical goods/FMEG) ആര്.ആര് കേബലിന്റെ (RR Kabel) ഐ.പി.ഒ സെപ്റ്റംബര് 13ന് ആരംഭിക്കും. സെപ്റ്റംബര് 15 വരെയാണ് സബ്സ്ക്രിപ്ഷന് അവസരം. ഓഹരിയൊന്നിന് 983 രൂപ മുതല് 1,035 രൂപ വരെയാണ് വില നിശ്ചയിച്ചിരിക്കുന്നത്. കുറഞ്ഞത് 14 ഓഹരികളും തുടര്ന്ന് അതിന്റെ ഗുണിതങ്ങളും ആയാണ് ഓഹരി വാങ്ങാനാകുക.
ഐ.പി.ഒ വഴി 1,964 കോടി രൂപയാണ് കമ്പനി സമാഹരിക്കാൻ ഉദ്ദേശിക്കുന്നത്. പുതിയ ഓഹരികളുടെ വില്പ്പന വഴി 180 കോടി രൂപയും ഓഫര് ഫോര് സെയ്ല് (OFS) വഴി 1,784 കോടി രൂപയുമാണ് സമാഹരിക്കുക. പ്രമോട്ടര്മാരുടെയും നിലവിലുള്ള ഓഹരി ഉടമകളുടെയും കൈവശമുള്ള ഓഹരികളാണ് ഒ.എഫ്.എസ് വഴി വില്ക്കുക.
കമ്പനിയില് ഏറ്റവും കൂടുതല് ഓഹരികളുള്ള ആഗോള പ്രൈവറ്റ് ഇക്വിറ്റി സ്ഥാപനമായ ടി.പി.ജി ഏഷ്യയുടെ ഓഹരികളാണ് കൂടുതല് വില്പ്പന നടത്തുന്നത്. 1.29 കോടി ഓഹരികള് ടി.പി.ജി വില്ക്കും. പൊതു ഓഹരി ഉടമകളായ രാം രത്ന വയേഴ്സിന്റെ കൈവശമുള്ള 13.64 ലക്ഷം ഓഹരികളും ഐ.പി.ഒയില് വിറ്റഴിക്കും.
പ്രമോട്ടര്മാരായ മഹേന്ദ്രകുമാര് രമേശ്വര്ലാല്, ഹേമന്ദ് മഹേന്ദ്രകുമാര് കബ്ര, സുമീത് മഹേന്ദ്രകുമാര് കബ്ര എന്നിവരുടേയും പ്രമോട്ടര് ഗ്രൂപ്പായ കേബല് ബില്ഡ്കോണ് സൊല്യൂഷന്സിന്റെയും ഓഹരികളും വിറ്റഴിക്കുന്നുണ്ട്.
Read DhanamOnline in English
Subscribe to Dhanam Magazine
