വെള്ളി വിലയിൽ വൻ തിരിച്ചുവരവ് രേഖപ്പെടുത്തിക്കൊണ്ട് എംസിഎക്സ് (MCX) വെള്ളി നിരക്ക് 6 ശതമാനം അപ്പർ സർക്യൂട്ട് തൊട്ട് കിലോയ്ക്ക് 2,50,436 രൂപയിലെത്തി. വെറും മൂന്ന് സെഷനുകൾ കൊണ്ട് റെക്കോർഡ് ഉയരത്തിൽ നിന്ന് 46 ശതമാനം ഇടിവ് നേരിട്ടതിന് ശേഷമാണ് ഈ ശക്തമായ തിരിച്ചുകയറ്റം. അന്താരാഷ്ട്ര വിപണിയില് വെളളി ഇന്ന് ഔൺസിന് 7 ശതമാനത്തിലധികം ഉയര്ന്ന് 83 ഡോളറിലെത്തി. എംസിഎക്സ് സ്വർണ വില 10 ഗ്രാമിന് 3 ശതമാനം ഉയർന്ന് 1,48,310 രൂപ എന്ന നിലയിലെത്തി.
അമേരിക്കൻ പ്രസിഡന്റ് ഡൊണാൾഡ് ട്രംപ് ഇന്ത്യയുമായി പ്രഖ്യാപിച്ച വ്യാപാര കരാറാണ് വിപണിയിലെ പ്രധാന ചാലകശക്തി. ഇന്ത്യൻ ഉൽപ്പന്നങ്ങളുടെ ഇറക്കുമതി തീരുവ 50 ശതമാനത്തിൽ നിന്ന് 18 ശതമാനമായി കുറയ്ക്കുന്നതാണ് കരാർ. കൂടാതെ, ചൈനീസ് പുതുവർഷത്തിന് മുന്നോടിയായി ചൈനയിൽ നിന്നുള്ള ഡിമാൻഡ് വർദ്ധിച്ചതും സ്വർണത്തിന്റെയും വെള്ളിയുടെയും വീണ്ടെടുപ്പിന് സഹായിച്ചു.
വെള്ളിയുടെ വീണ്ടെടുക്കൽ നടപടി സ്വർണത്തിലും പ്രതിഫലിപ്പിച്ചു. അന്താരാഷ്ട്ര വിപണികളിൽ കഴിഞ്ഞ സെഷനിൽ 4.8 ശതമാനം ഇടിഞ്ഞതിന് ശേഷം സ്പോട്ട് ഗോൾഡ് ഔൺസിന് 4.2 ശതമാനം വരെ ഉയർന്ന് 4,855 ഡോളറിനു മുകളിലെത്തി. സ്പോട്ട് പ്ലാറ്റിനവും ഔൺസിന് 3 ശതമാനവും ഉയർന്ന് 2,183.64 ഡോളറിലെത്തി.
നേരത്തെയുണ്ടായ വൻ ഇടിവ് കേവലം സാങ്കേതിക തിരുത്തൽ (Technical Correction) മാത്രമാണെന്നാണ് വിലയിരുത്തല്. ഭൗമരാഷ്ട്രീയ സംഘർഷങ്ങൾ, കേന്ദ്ര ബാങ്കുകൾ സ്വർണം വാങ്ങുന്നത്, ആഗോള സാമ്പത്തിക അനിശ്ചിതത്വം എന്നിവ ദീർഘകാലാടിസ്ഥാനത്തിൽ വിലയെ പിന്തുണയ്ക്കുമെന്നാണ് കരുതുന്നത്. ട്രംപ് അടുത്ത ഫെഡറൽ റിസർവ് ചെയർമാനായി പലിശ നിരക്കുകളില് കൂടുതല് കര്ക്കശ നിലപാടുളള കെവിൻ വാർഷിനെ നാമനിർദേശം ചെയ്തതിനെ തുടർന്നാണ് വിലയേറിയ ലോഹങ്ങളുടെ വിൽപ്പനയിൽ ഇടിവ് ഉണ്ടായത്.
ഈ പ്രഖ്യാപനം ഡോളറിനെ ശക്തിപ്പെടുത്തുകയും ബുള്ളിയൻ വിലകളിൽ സമ്മർദം ചെലുത്തുകയും ചെയ്തു. ഇതിനെത്തുടർന്ന് സിഎംഇ ഗ്രൂപ്പ് (CME Group) വിലയേറിയ ലോഹങ്ങളുടെ ഫ്യൂച്ചറുകൾക്കുള്ള മാർജിൻ ആവശ്യകതകൾ ഉയർത്തിയതും ഇടിവിന് കാരണമായി. ശക്തമായ ഡോളറിന്റെയും ഉയർന്ന വ്യാപാര ചെലവുകളുടെയും സംയോജനം കുത്തനെയുള്ള ലിക്വിഡിറ്റി സമ്മര്ദം സൃഷ്ടിച്ചു. ഒരു മാസത്തിനുള്ളിൽ വെള്ളി 60 ശതമാനത്തിലധികവും സ്വർണം 20 ശതമാനത്തിലധികവും വില ഉയർന്നതോടെ നിക്ഷേപകര് ലാഭമെടുപ്പിലേക്ക് നീങ്ങിയതും ഇടിവിനെ ത്വരിതപ്പെടുത്തി.
ദീർഘകാലാടിസ്ഥാനത്തിൽ വിപണി ശക്തമായ നിലയിൽ തന്നെ തുടരാനാണ് സാധ്യതയെന്നാണ് (Constructive long-term trend) വിദഗ്ധര് അഭിപ്രായപ്പെടുന്നു. 70–72 ഡോളർ നിലവാരത്തിനടുത്ത് വെളളി സ്ഥിരത കൈവരിക്കുമെന്നും 80–82 ഡോളർ മേഖലയില് തുടരുമെന്നുമാണ് പ്രതീക്ഷ. അതിനാൽ, വിപണിയിലുണ്ടാകുന്ന ഇത്തരം ഇടിവുകൾ ദീർഘകാല നിക്ഷേപം ലക്ഷ്യമിടുന്നവർക്ക് വാങ്ങാനുള്ള മികച്ച അവസരമാക്കാനുളള (Buying opportunity) സാധ്യതകളും ഉപയോഗപ്പെടുത്താം.
Silver price rallies over 6% on MCX driven by global cues, trade deals, and renewed demand.
Read DhanamOnline in English
Subscribe to Dhanam Magazine
