ആയിരം രൂപയ്ക്ക് വാങ്ങിയ ഓഹരി എഴുനൂറായി. ആദ്യമൊന്ന് പേടിച്ചു. പിന്നെ തോന്നി, നല്ല കമ്പനിയല്ലേ, കുറച്ചുകൂടി വാങ്ങാം. വാങ്ങിയതോടെ വില അറുനൂറായി. ഇനി എന്തുചെയ്യും? വീണ്ടും വാങ്ങണോ? ഉള്ളത് വിറ്റ് രക്ഷപ്പെടണോ? ഇപ്പോള്‍ പല നിക്ഷേപകരും കുടുങ്ങിനില്‍ക്കുന്നത് ഈ ചോദ്യത്തിലാണ്.
എല്ലാ ദിവസവും തകരുകയല്ല വിപണി. ചില ദിവസങ്ങളില്‍ അസാധാരണമായ ഉയര്‍ച്ച. എന്നാല്‍ കൂടുതല്‍ ദിവസങ്ങളിലും വീഴ്ച. ഈ രീതി ഒരു വര്‍ഷത്തിലേറെയായി തുടരുന്നതിനിടയില്‍ നിരവധി ബ്ലൂചിപ് ഓഹരികള്‍ പോലും ഒരു വര്‍ഷത്തെ താഴ്ന്ന നിലയില്‍. അതിനിടയിലും സ്മോള്‍, മിഡ്ക്യാപ് ഓഹരികളില്‍ പലതിനും കയറ്റം. വൈചിത്രം നിറഞ്ഞ പോക്കിനിടയില്‍ പല മാസങ്ങളായി നിക്ഷേപകര്‍ക്ക് പറയാന്‍ നഷ്ടക്കഥ മാത്രം.
ഇതിനിടയിലാണ് മറ്റൊരു വാര്‍ത്ത. ജിയോയുടെ ഐപിഒയ്ക്ക് വന്‍തിരക്ക്. ലിസ്റ്റിങ്ങില്‍ മികച്ച നേട്ടം. അപ്പോള്‍ വിപണിയില്‍ പണമില്ലാത്തതാണോ പ്രശ്‌നം? അതോ നമ്മുടെ പണം കിടക്കുന്നത് തെറ്റായ ഓഹരികളിലാണോ?
നവംബര്‍ രണ്ടിന് രാവിലെ സെന്‍സെക്‌സും നിഫ്റ്റിയും ഒന്നര ശതമാനത്തോളമാണ് ഉയര്‍ന്നത്. വലിയ ആശ്വാസം നല്‍കുന്നൊരു ദിവസം. പക്ഷേ, കഴിഞ്ഞ വെള്ളിയാഴ്ച ഒഴിച്ചാല്‍, അതിനു മുമ്പത്തെ എട്ട് വ്യാപാര ദിവസങ്ങളില്‍ ആറിലും നിഫ്റ്റി താഴ്ന്നിരുന്നു. അതുകൊണ്ട് ഒരു ദിവസത്തെ കുതിപ്പ് കണ്ടിട്ട് പ്രതിസന്ധി അവസാനിച്ചുവെന്ന് പറയാനാവില്ല എന്ന് ആരോടും പ്രത്യേകിച്ചു പറയേണ്ടതില്ല. അതുപോലെ തുടര്‍ച്ചയായ ഇടിവ് കണ്ടിട്ട് കമ്പനികളുടെ ഭാവി എഴുതി തള്ളുന്നതും ശരിയല്ല.
ഇവിടെ ശ്രദ്ധിക്കേണ്ട ഒരു കാര്യമുണ്ട്. ഒരേ വിപണിയില്‍ ചില കമ്പനികളുടെ ബിസിനസ് മെച്ചപ്പെടുന്നു. ചിലതിന്റേത് മോശമാകുന്നു. എന്നാല്‍ ഭയന്ന് ആളുകള്‍ വില്‍ക്കുമ്പോള്‍ രണ്ടിന്റെയും ഓഹരിവില താഴാം. അവിടെയാണ് അവസരവും അപകടവും ഒരുമിച്ച് വരുന്നത്.
വാങ്ങുന്നത് പരിഗണിക്കാം. പക്ഷേ അതിനു മുമ്പ് ഒരു ചെറിയ കണക്കുനോക്കണം. ഒരു കമ്പനിയുടെ ഓഹരിവില ആയിരം രൂപയാണെന്ന് കരുതുക.. ഓഹരിയൊന്നിന് വാര്‍ഷിക ലാഭം അമ്പത് രൂപയാണെന്നിരിക്കട്ടെ. അപ്പോള്‍ പി.ഇ. ഇരുപത് മടങ്ങ്. ഇപ്പോള്‍ വില 700 ആയി. 30 ശതമാനം കുറഞ്ഞു. പക്ഷേ കമ്പനിയുടെ ഓഹരിയൊന്നിനുള്ള ലാഭവും 50ല്‍ നിന്ന് 25 ആയി കുറഞ്ഞെങ്കിലോ? പി.ഇ. ഇരുപത്തിയെട്ട് മടങ്ങായി.
ഓഹരിയുടെ വില കുറഞ്ഞു. പക്ഷേ ലഭിക്കുന്ന ലാഭവുമായി താരതമ്യം ചെയ്യുമ്പോള്‍ അത് കൂടുതല്‍ ചെലവേറിയതായി! അതുകൊണ്ടാണ് 'മുമ്പ് ആയിരമായിരുന്നു, ഇപ്പോള്‍ എഴുനൂറാണ്' എന്ന കണക്കുമാത്രം പോരാത്തത്. മുമ്പത്തെ വിലയിലേക്ക് തിരിച്ചെത്തുമെന്ന വിശ്വാസവും വാങ്ങാനുള്ള മതിയായ കാരണമല്ല. മുമ്പത്തെ വിലതന്നെ അമിതമായിരുന്നിരിക്കാം.
ആ കമ്പനിയുടെ ഉല്‍പ്പന്നത്തിനോ സേവനത്തിനോ ആവശ്യക്കാര്‍ കൂടുന്നുണ്ടോ? വില്‍പ്പന കൂടുമ്പോള്‍ ലാഭവും കൂടുന്നുണ്ടോ? അതോ ചെലവുകള്‍ ലാഭം തിന്നുന്നുണ്ടോ? കണക്കിലെ ലാഭം യഥാര്‍ഥത്തില്‍ പണമായി കമ്പനിയിലെത്തുന്നുണ്ടോ? കടം തിരിച്ചടയ്ക്കാനുള്ള ശേഷിയുണ്ടോ? ഇപ്പോഴത്തെ പ്രശ്‌നം താല്‍ക്കാലികമാണോ? അതോ ബിസിനസിന്റെ ഭാവിതന്നെ മാറുകയാണോ? ഈ ചോദ്യങ്ങള്‍ക്ക് ഉത്തരം കണ്ടെത്തിയ ശേഷമാണ് വിലയിടിവിനെ അവസരമെന്നു വിളിക്കേണ്ടത്.
ചില വലിയ കമ്പനികളില്‍ വില കൂടുതല്‍ ആകര്‍ഷകമായിട്ടുണ്ട് എന്നാണ് സമീപകാല വിലയിരുത്തലുകള്‍. ഒക്ടോബറിലെ ബാര്‍ക്ലേയ്സ് പ്രൈവറ്റ് ബാങ്കിന്റെ വിലയിരുത്തല്‍ ശ്രദ്ധിക്കാം. കുറഞ്ഞ കടവും നല്ല പണപ്രവാഹവും ചെലവുകൂടുമ്പോള്‍ അതിനെ നേരിടാനുള്ള ശേഷിയുമുള്ള കമ്പനികളില്‍ ഘട്ടംഘട്ടമായി നിക്ഷേപം കൂട്ടാനുള്ള അവസരമുണ്ടെന്ന് അവര്‍ പറയുന്നു. ചെറുകിട, ഇടത്തരം കമ്പനികളില്‍ വിലയും പണപ്രവാഹവും കൂടുതല്‍ സൂക്ഷ്മമായി പരിശോധിക്കണമെന്നുമുണ്ട് നിര്‍ദേശം.
അതായത്, വലിയ കമ്പനിയാണെന്നതുകൊണ്ടുമാത്രം വാങ്ങരുത്. ചെറിയ കമ്പനിയാണെന്നതുകൊണ്ടുമാത്രം ഒഴിവാക്കുകയും വേണ്ട. കൊടുക്കുന്ന വിലയ്ക്ക് എന്ത് ബിസിനസാണ് കിട്ടുന്നത് എന്നു നോക്കണം.
അതിനും സാധ്യതയുണ്ട്. കാരണം അടുത്ത കുറച്ച് ആഴ്ചകളില്‍ വിപണിയെ ഇളക്കാന്‍ കഴിയുന്ന സംഭവങ്ങള്‍ മുന്നിലുണ്ട്. ഒന്നാമത്തേത്, പശ്ചിമേഷ്യയും എണ്ണ വിലയുമാണ്. ക്രൂഡോയില്‍ വില കൂടുന്നത് ഇന്ത്യയെ സംബന്ധിച്ച് വലിയ സമ്മര്‍ദമാണ്.
എണ്ണവില ഒരുദിവസം കൂടുന്നതിനെക്കാള്‍ പ്രധാനമാണ്, എത്രകാലം ഉയര്‍ന്നുനില്‍ക്കുന്നു എന്നത്. വിമാനക്കമ്പനികള്‍ക്ക് ഇന്ധനച്ചെലവ്. പെയിന്റ്, ടയര്‍ തുടങ്ങിയ മേഖലകള്‍ക്ക് അസംസ്‌കൃത വസ്തുക്കളുടെ ചെലവ്. ചരക്കുനീക്കത്തെ ആശ്രയിക്കുന്ന ബിസിനസുകള്‍ക്ക് ഗതാഗതച്ചെലവ്. ഇതെല്ലാം കൂടുമ്പോള്‍ എല്ലാ കമ്പനികള്‍ക്കും ഒരുപോലെ വില കൂട്ടാനാവില്ല.
അവിടെ പരിശോധിക്കേണ്ടത്, കഴിഞ്ഞ പാദത്തില്‍ എത്ര ലാഭമുണ്ടാക്കി എന്നതുമാത്രമല്ല. അടുത്ത പാദത്തില്‍ ഈ ചെലവ് എത്രത്തോളം ബാധിക്കുമെന്നാണ്. സംഘര്‍ഷം കുറയുകയും എണ്ണവിതരണത്തെക്കുറിച്ചുള്ള ഭയം ശമിക്കുകയും ചെയ്താല്‍ വിപണിക്ക് ആശ്വാസമാകാം. സംഘര്‍ഷം വ്യാപിക്കുകയും എണ്ണ ഉയര്‍ന്നുനില്‍ക്കുകയും ചെയ്താല്‍ ലാഭപ്രതീക്ഷകള്‍ വീണ്ടും കുറയ്‌ക്കേണ്ടിവരാം. ഇത് രണ്ട് സാധ്യതകളാണ്. ഏതെങ്കിലും ഒന്ന് ഉറപ്പായും സംഭവിക്കുമെന്ന പ്രവചനമല്ല.
രണ്ടാമത്തേത്, നവംബര്‍ മൂന്നിലെ അമേരിക്കന്‍ ഇടക്കാല തിരഞ്ഞെടുപ്പ്. തിരഞ്ഞെടുപ്പിന് ശേഷം ട്രംപ് എന്ത് തീരുമാനമെടുക്കും എന്നതിനെക്കുറിച്ച് ഇപ്പോള്‍ പല റിപ്പോര്‍ട്ടുകളും വരുന്നു. പക്ഷേ സൈനിക നടപടിയോ തീരുവമാറ്റമോ ഉറപ്പായി സംഭവിക്കുമെന്ന് കരുതി നിക്ഷേപതീരുമാനം എടുക്കരുത്.
നമുക്ക് ശ്രദ്ധിക്കേണ്ടത് പ്രഖ്യാപിക്കുന്ന യഥാര്‍ഥ നയമാണ്. അത് എണ്ണവിതരണത്തെയോ ഇന്ത്യന്‍ കയറ്റുമതിയെയോ എങ്ങനെ ബാധിക്കും എന്നതാണ്. തിരഞ്ഞെടുപ്പിന് ശേഷമുള്ള യുഎസ്-ഇറാന്‍ സാഹചര്യം ഇപ്പോള്‍ വിപണി ശ്രദ്ധിക്കുന്ന പ്രധാന അപകടങ്ങളിലൊന്നാണ്.
മൂന്നാമത്തേത്, കമ്പനികളുടെ ഫലങ്ങള്‍. വിപണി തിരിച്ചുവരാനുള്ള ഏറ്റവും വിശ്വസനീയമായ അടിത്തറ കമ്പനികളുടെ ലാഭവളര്‍ച്ചയാണ്. ഇപ്പോള്‍ പുറത്തുവരുന്ന ഫലങ്ങളില്‍ വില്‍പ്പനയും ലാഭവും മാത്രമല്ല, മാനേജ്മെന്റ് അടുത്ത മാസങ്ങളെക്കുറിച്ച് പറയുന്നതും ശ്രദ്ധിക്കണം. പുതിയ ഓര്‍ഡറുകള്‍ കിട്ടുന്നുണ്ടോ? ഉപഭോക്താക്കള്‍ വാങ്ങല്‍ മാറ്റിവയ്ക്കുന്നുണ്ടോ? ചെലവ് കൂടുന്നത് ലാഭത്തെ ബാധിക്കുമോ?
ലാഭം കൂടിയെന്ന തലക്കെട്ട് മാത്രം വായിക്കരുത്. ആ വര്‍ധന ബിസിനസില്‍നിന്നാണോ? ഒരുതവണ മാത്രം ലഭിച്ച വരുമാനമാണോ? കഴിഞ്ഞ വര്‍ഷത്തെ ലാഭം വളരെ കുറവായിരുന്നതിന്റെ ഫലമാണോ? ഇവിടെ ഉത്തരം മാറിയാല്‍ ഓഹരിയുടെ വിലയിരുത്തലും മാറും.
നാലാമത്തേത്, പലിശയുടെയും ഡോളറിന്റെയും കാര്യമാണ്. അമേരിക്കന്‍ ഫെഡിന്റെ ഒക്ടോബര്‍ യോഗത്തിന്റെ മിനിറ്റ്‌സ് നവംബര്‍ 18ന് വരും. അടുത്ത പലിശ യോഗം ഡിസംബര്‍ എട്ടിനും ഒമ്പതിനുമാണ്. പലിശ കുറയാനുള്ള സാധ്യതയെക്കുറിച്ച് ഇവ കൂടുതല്‍ സൂചനകള്‍ നല്‍കാം.
ഇന്ത്യയില്‍ റിസര്‍വ് ബാങ്കിന്റെ അടുത്ത നയയോഗം ഡിസംബര്‍ രണ്ട് മുതല്‍ നാലുവരെയാണ്. അതിന് മുമ്പുള്ള പണപ്പെരുപ്പ കണക്കുകളും എണ്ണവിലയും പ്രധാനമാണ്. എണ്ണ ഉയര്‍ന്നു നിന്ന് പണപ്പെരുപ്പ സമ്മര്‍ദം കൂടിയാല്‍, പലിശ കുറച്ച് വളര്‍ച്ചയെ സഹായിക്കുക ആര്‍ബിഐക്ക് കൂടുതല്‍ പ്രയാസമാകാം. ഫെബ്രുവരി ഒന്നിലെ കേന്ദ്രബജറ്റും അടുത്ത വര്‍ഷം നടക്കാനിരിക്കുന്ന യു.പി നിയമസഭ തെരഞ്ഞെടുപ്പുമൊക്കെ പിന്നീടുള്ള കാലത്ത് വിപണിയെ സ്വാധീനിക്കുന്ന ഘടകങ്ങളാണ്. അതു തല്‍ക്കാലം നില്‍ക്കട്ടെ.
അമേരിക്കന്‍ ബോണ്ടുകളില്‍ ആകര്‍ഷകമായ വരുമാനം കിട്ടുമ്പോള്‍ വിദേശ നിക്ഷേപകര്‍ ഇന്ത്യന്‍ ഓഹരികളിലേക്ക് വരാന്‍ കൂടുതല്‍ കാരണങ്ങള്‍ തേടും. അതുകൊണ്ടാണ് രൂപയുടെ ദിശയും പ്രധാനമാകുന്നത്. ഇന്ത്യന്‍ ഓഹരിയില്‍ നേട്ടമുണ്ടാക്കിയാലും രൂപ ദുര്‍ബലമായാല്‍ അവരുടെ ഡോളറിലുള്ള നേട്ടം കുറയും. വിദേശികള്‍ ഒരുദിവസം വാങ്ങിയതുകൊണ്ട് സ്ഥിരമായി തിരിച്ചെത്തിയെന്ന് പറയാനാവില്ല. ഏതാനും ആഴ്ചകളിലെ പ്രവണതയാണ് നോക്കേണ്ടത്.
ഒക്ടോബര്‍ 28ന് റോയിട്ടേഴ്സ് റിപ്പോര്‍ട്ട് ചെയ്ത ഒരു അവലോകനമുണ്ട്. ഐഐഎഫ്എല്‍ ക്യാപിറ്റല്‍ നിഫ്റ്റിക്ക് 23,300 മുതല്‍ 23,500 വരെ സാങ്കേതിക തിരിച്ചുകയറ്റത്തിനുള്ള സാധ്യതയാണ് പറയുന്നത്. പക്ഷേ അതിനപ്പുറം ശക്തമായ മുന്നേറ്റത്തിന് അനുകൂല വാര്‍ത്തകളോ വിദേശ പണത്തിന്റെ തിരിച്ചുവരവോ പോലുള്ള പിന്തുണ വേണമെന്നും അവര്‍ പറയുന്നു.
ഇവിടെ ഒരു വ്യത്യാസം മനസ്സിലാക്കണം. വീഴുമെന്ന് കരുതി നേരത്തെ വില്‍പ്പന നടത്തിയവര്‍ ആ ഇടപാട് അവസാനിപ്പിക്കുമ്പോഴും വിപണി കയറാം. അതാണ് ഷോര്‍ട്ട് കവറിങ്. അങ്ങനെ വരുന്ന കയറ്റവും കമ്പനികളുടെ ഭാവി ലാഭത്തില്‍ വിശ്വാസം കൂടിയതുകൊണ്ടുള്ള കയറ്റവും ഒരുപോലെയല്ല. അതുകൊണ്ട് രണ്ടു ദിവസത്തെ പച്ചനിറം മാത്രം കണ്ടിട്ട് മുഴുവന്‍ പണവുമായി ചാടരുത്.
വിപണി ദുര്‍ബലമായിരിക്കുമ്പോഴും ഒരു പ്രത്യേക കമ്പനിക്ക് വലിയ ഡിമാന്‍ഡ് ഉണ്ടാകാം. ആ കമ്പനിയുടെ വിപണിസ്ഥാനം, വളര്‍ച്ചാസാധ്യത, കിട്ടാനുള്ള ഓഹരികളുടെ ലഭ്യത എന്നിവയെല്ലാം അതിനെ സ്വാധീനിക്കും. ജിയോയുടെ കാര്യത്തില്‍ത്തന്നെ വിപണിയിലെ മുന്‍തൂക്കവും പുതിയ ബിസിനസുകളുടെ സാധ്യതയും അനുകൂലഘടകങ്ങളായി ബ്രോക്കറേജുകള്‍ ചൂണ്ടിക്കാട്ടിയിരുന്നു. അതേസമയം ഉയര്‍ന്ന വിലയിരുത്തല്‍ ഹ്രസ്വകാല നേട്ടത്തെ പരിമിതപ്പെടുത്താമെന്ന മുന്നറിയിപ്പുമുണ്ടായിരുന്നു. അതിനാല്‍ ഐപിഒയ്ക്ക് തിരക്കുണ്ട് എന്നത് നിങ്ങളുടെ കൈയിലുള്ള എല്ലാ ഓഹരികളും ഉടന്‍ തിരിച്ചുകയറുമെന്ന സൂചനയല്ല.
ആദ്യം, പുതുതായി വാങ്ങാന്‍ ഉദ്ദേശിക്കുന്ന ഓഹരിയും നഷ്ടത്തില്‍ കൈയിലുള്ള ഓഹരിയും ഒരേ പരിശോധനയ്ക്ക് വിധേയമാക്കണം. നിങ്ങള്‍ മുമ്പ് വാങ്ങിയ വില തല്‍ക്കാലം മറക്കുക. ഇന്ന് ഈ ഓഹരി നിങ്ങളുടെ കൈയില്‍ ഇല്ലായിരുന്നെങ്കില്‍, ഇപ്പോഴത്തെ ബിസിനസ് സ്ഥിതിയും വിലയും നോക്കി വാങ്ങുമായിരുന്നോ? സ്വയം ചോദിക്കുക. ഉത്തരം ഇല്ല എന്നാണെങ്കില്‍, കൈയിലുള്ള ഓഹരിയുടെ ശരാശരി വില കുറയ്ക്കാം എന്നു ചിന്തിച്ച് വീണ്ടും വാങ്ങരുത്.
ഉത്തരം വാങ്ങും എന്നാണെങ്കില്‍, എന്തുകൊണ്ടാണത്? കമ്പനിയുടെ വരുമാനവളര്‍ച്ചയാണോ? കടം കുറയുന്നതാണോ? പുതിയ ശേഷി പ്രവര്‍ത്തന ക്ഷമമാകുന്നതാണോ? അടുത്ത ഫലത്തില്‍ ആ കാരണം ശരിയാണോ എന്ന് പരിശോധിക്കാം. കാരണം തെറ്റിയാല്‍ തീരുമാനവും മാറ്റണം.
പുതിയ പണം നിക്ഷേപിക്കുന്നവര്‍ക്ക് ഘട്ടങ്ങളായി വാങ്ങുന്നത് പരിഗണിക്കാം. ആദ്യഭാഗം വാങ്ങിയ ശേഷം വില കുറഞ്ഞാല്‍ മാത്രം അടുത്ത ഭാഗം ഇടണമെന്നില്ല. പുതിയ ഫലം വന്നപ്പോള്‍ നിങ്ങളുടെ വിലയിരുത്തല്‍ ശരിയാണെന്ന് കണ്ടാലും നിക്ഷേപം കൂട്ടാം. വിലകുറയുന്നതിന് പിന്നാലെ പണം ഇടുന്ന ശീലത്തില്‍നിന്ന്, തെളിവ് മെച്ചപ്പെടുമ്പോള്‍ പണം കൂട്ടുന്ന രീതിയിലേക്ക് മാറണം.
ഈ ഘട്ടങ്ങളിലെല്ലാം നിങ്ങള്‍ക്ക് ആവശ്യത്തിനുള്ള പണം ഓഹരിക്ക് പുറത്തുണ്ടാകണം. കടമെടുത്ത പണമാണെങ്കില്‍, കാത്തിരിക്കാനുള്ള സ്വാതന്ത്ര്യം കുറവാണ്. വില ഇടിയുമ്പോള്‍ അധിക പണം നല്‍കേണ്ടിവന്നാല്‍, നിങ്ങള്‍ക്ക് ഇഷ്ടമില്ലാത്ത സമയത്ത് ഓഹരി വിറ്റുപോകാം.
എസ്‌ഐപി ചെയ്യുന്നവര്‍ക്കും ഒരു പരിശോധന വേണം. ലക്ഷ്യം ദീര്‍ഘകാലത്തേതാണോ? ഫണ്ട് അതിന് യോജിച്ചതാണോ? ഒരേ ഓഹരികളില്‍ നിക്ഷേപിക്കുന്ന നിരവധി ഫണ്ടുകള്‍ കൂട്ടിവച്ചിട്ടുണ്ടോ? മോശം വാര്‍ത്ത കണ്ടതുകൊണ്ടുമാത്രം എസ്‌ഐപി നിര്‍ത്തേണ്ടതില്ല. എന്നാല്‍ എസ്‌ഐപി തുടരുന്നു എന്നത് പോര്‍ട്ട്‌ഫോളിയോ പരിശോധിക്കാതിരിക്കാനുള്ള കാരണവുമല്ല.
വില ഇടിഞ്ഞ മികച്ച ബിസിനസുകളെ കണ്ടെത്താന്‍ കഴിയുന്ന, ദീര്‍ഘകാല പണവും കൂടുതല്‍ ഇടിവ് സഹിക്കാനുള്ള ശേഷിയുമുള്ള നിക്ഷേപകന് ഘട്ടംഘട്ടമായി വാങ്ങുന്നത് പരിഗണിക്കാവുന്ന സമയമാണിത്. പക്ഷേ ഒരു കമ്പനിയുടെ ഒരു വര്‍ഷത്തെ ഏറ്റവും കുറഞ്ഞ വില കണ്ടതു കൊണ്ട് വാങ്ങുന്നതു നന്നല്ല.
അടുത്ത ആഴ്ചകളില്‍ എണ്ണവില ശമിക്കുന്നുണ്ടോ, കമ്പനികളുടെ ലാഭപ്രതീക്ഷ മെച്ചപ്പെടുന്നുണ്ടോ, രൂപയുടെ സമ്മര്‍ദം കുറയുന്നുണ്ടോ, വിദേശ പണം സ്ഥിരമായി തിരിച്ചെത്തുന്നുണ്ടോ എന്ന് നോക്കണം. ഇവ മെച്ചപ്പെട്ടാല്‍ തിരിച്ചുവരവിന്റെ അടിത്തറ ശക്തമാകും. മറിച്ചായാല്‍ ഇപ്പോഴത്തെ കുറഞ്ഞ വില ഇനിയും കുറയാം. എല്ലാം വ്യക്തമായ ശേഷമേ വാങ്ങൂ എന്ന് തീരുമാനിച്ചാല്‍, അപ്പോഴേക്കും വില കയറിയിട്ടുണ്ടാകാം. അതേസമയം, വില കുറഞ്ഞതുകൊണ്ട് എല്ലാം വാങ്ങിയാല്‍ നഷ്ടവും കൂടാം.
ഓഹരി വിപണി നിക്ഷേപകര്‍ ആത്യന്തികമായി ചോദിക്കേണ്ടത്, വിപണി നാളെ എവിടെയെത്തും എന്നല്ല. അതിനു പകരം, എന്റെ പണം എത്രകാലം നിക്ഷേപിക്കാം? എത്ര നഷ്ടം സഹിക്കാം? ഏതു വിലയ്ക്കാണ് ഞാന്‍ വാങ്ങുന്നത്?
ആ മൂന്നു ചോദ്യങ്ങള്‍ക്കുള്ള ഉത്തരത്തിലാണ് നിങ്ങളുടെ അടുത്ത തീരുമാനം.
ഈ ഓഹരി എത്ര രൂപയില്‍നിന്ന് വീണു എന്നല്ല. ഇന്ന് ഞാന്‍ കൊടുക്കുന്ന പണത്തിന്, നാളെ എന്ത് ലാഭമുണ്ടാക്കാന്‍ കഴിയുന്ന ബിസിനസാണ് കിട്ടുന്നത്? ആ ചോദ്യത്തിന് ഉത്തരം കണ്ടെത്താനാകുമ്പോഴാണ് വിലയിടിവ് നിങ്ങള്‍ക്കൊരു അവസരമാകുന്നത്.
ഒന്നുകൂടി: ഇത് പൊതുവായ നിക്ഷേപവിദ്യാഭ്യാസമാണ്. ഏതെങ്കിലും ഓഹരി വാങ്ങാനോ വില്‍ക്കാനോ ഉള്ള ശിപാര്‍ശയാണ്. നിങ്ങളുടെ തീരുമാനങ്ങള്‍ക്ക് ആവശ്യമെങ്കില്‍ സെബിയില്‍ രജിസ്റ്റര്‍ ചെയ്ത നിക്ഷേപ ഉപദേശകന്റെ സഹായം തേടുക തന്നെ വേണം.
Read DhanamOnline in English
Subscribe to Dhanam Magazine