ചെറിയ നഷ്ടത്തില് വ്യാപാരമാരംഭിച്ച വിപണി പിന്നീടു ചെറിയ നേട്ടത്തിലേക്കു കയറി. അതിനു ശേഷം മുഖ്യ സൂചികകള് ചാഞ്ചാട്ടത്തിലായി. വീണ്ടും താഴ്ന്നു. എഫ്എംസിജി, ഐടി, റിയല്റ്റി മേഖലകള് മാത്രമാണ് ഇന്നു രാവിലെ ഉയര്ന്നത്.
തേജസ് വിമാനങ്ങള്ക്ക് ഓര്ഡര് ലഭിച്ചത് ഹിന്ദുസ്ഥാന് എയറോനോട്ടിക്സിനെ രാവിലെ നാലു ശതമാനം ഉയര്ത്തി. യു.ബി.എസ് ഓഹരിയുടെ ലക്ഷ്യവില 4,900 രൂപ ആയി വര്ധിപ്പിച്ചു. കൊച്ചിന് ഷിപ്പ്യാര്ഡ് അല്പം ഉയര്ന്നിട്ടു താഴ്ചയിലായി. മറ്റു പ്രതിരോധ ഓഹരികള് ഇന്നു രാവിലെ താഴ്ന്നു.
ഓണ്ലൈന് മണിഗെയിമുകള് പാടേ വിലക്കുന്നതാണ് പാര്ലമെന്റില് അവതരിപ്പിച്ച ബില് എന്ന് അറിവായതോടെ ഡെല്റ്റാ കോര്പറേഷനും നാസറാ ടെക്നോളജീസും ഓണ് മൊബൈലും ഏഴു ശതമാനം വരെ ഇടിഞ്ഞു.
ഒന്നര ലക്ഷം രൂപയുടെ പുതിയ സ്കൂട്ടര് (എസ് വണ് പ്രോ സ്പോര്ട്ട്) ലോഞ്ച് ചെയ്തതിനെ തുടര്ന്ന് ഒല ഇലക്ട്രിക് മൊബിലിറ്റി ഓഹരി രാവിലെ ഒന്പതു ശതമാനം വരെ കുതിച്ചു.
കിറ്റെക്സ് ഗാര്മെന്റ്സ് ഓഹരി ഇന്നും അഞ്ചു ശതമാനം ഉയര്ന്നു. മറ്റു ടെക്സ്റ്റൈല് കയറ്റുമതി കമ്പനികള് താഴ്ചയിലാണ്.
പ്രതിദിനം ഒരു ജിബി ഡാറ്റാ 28 ദിവസം നല്കുന്ന 249 രൂപയുടെ സ്കീം നിര്ത്തലാക്കിയതും ഡാറ്റാ നിരക്കുകള് ഉയര്ത്തിയതും എയര്ടെല് ഓഹരിയെ രണ്ടു ശതമാനം കയറ്റി.
ബജാജ് ഫിനാന്സ് അടക്കം എന്ബിഎഫ്സികള് ഇന്നു രാവിലെ താഴ്ചയിലായി.
രൂപ ഇന്നു ദുര്ബലമായാണ് വ്യാപാരം തുടങ്ങിയത്. ഡോളര് 20 പൈസ കയറി 87.15 രൂപയില് ഓപ്പണ് ചെയ്തു. ഡോളര് സൂചിക 98.37 ലേക്ക് ഉയര്ന്നതാണു രൂപയെ വീഴ്ത്തിയത്.
സ്വര്ണം ലോകവിപണിയില് ഔണ്സിന് 3319 ഡോളറിലാണ്. കേരളത്തില് 22 കാരറ്റ് സ്വര്ണം പവന് 440 രൂപ കുറഞ്ഞ് 73,440 രൂപ ആയി.
ക്രൂഡ് വില താഴ്ന്നിട്ട് അല്പം ഉയര്ന്നു. ബ്രെന്റ് ഇനം ബാരലിന് 65.85 ഡോളറിലേക്കു കയറി.
Read DhanamOnline in English
Subscribe to Dhanam Magazine
