താഴ്ച കഴിഞ്ഞു ചാഞ്ചാട്ടം! പ്രതിരോധ ഓഹരികള്‍ നേട്ടത്തില്‍, സണ്‍ ടിവിക്ക് ഇടിവ്; വിപണിയില്‍ രാവിലെ സംഭവിക്കുന്നതെന്ത്?

വിപണി ഇന്നു നഷ്ടത്തോടെ വ്യാപാരം തുടങ്ങി സാവധാനം നേട്ടത്തിലേക്കു നീങ്ങി. പിന്നീടു ചാഞ്ചാട്ടമായി. ആദ്യ മണിക്കൂറില്‍ വിപണി ചെറിയ പരിധിയില്‍ കയറിയിറങ്ങി. നിഫ്റ്റി 24,747നും 24,855നുമിടയില്‍ നീങ്ങി. സെന്‍സെക്‌സ് 80,649 വരെ താണിട്ട് 81,018 വരെ കയറി.

സമ്മാന്‍ കാപ്പിറ്റലിനെ അബുദാബി ഭരണകൂടത്തിന്റെ ഐഎച്ച്‌സി ഏറ്റെടുക്കുന്നു. നിക്ഷേപ കമ്പനിയായ ഐഎച്ച്‌സി ഇതിനായി 8,850 കോടി രൂപ മുടക്കി ഓഹരി വാങ്ങും. സമ്മാന്‍ കാപ്പിറ്റല്‍ ഓഹരി പ്രീ ഓപ്പണില്‍ 10 ശതമാനം ഉയര്‍ന്നിട്ട് നഷ്ടത്തിലേക്ക് മാറി. ബുധനാഴ്ചത്തെ ക്ലോസിംഗ് വിലയില്‍ നിന്നു 17 ശതമാനം കുറച്ചാണ് ഐഎച്ച്‌സി ഓഹരി വാങ്ങുന്നത്.

ഐപിഎല്‍ ഫ്രാഞ്ചൈസി റോയല്‍ ചലഞ്ചേഴ്‌സ് ബാംഗ്ലൂരിനെ വാങ്ങും എന്ന ശ്രുതിയെ തുടര്‍ന്നു കഴിഞ്ഞ ദിവസം 16 ശതമാനം കുതിച്ച സണ്‍ ടിവി ഇന്നു രാവിലെ നാലു ശതമാനം ഇടിഞ്ഞു. ലാഭമെടുക്കലാണു കാരണം.

രണ്ടാം പാദത്തില്‍ വായ്പാവിതരണം ഗണ്യമായി വര്‍ധിപ്പിച്ച സിഎസ്ബി ബാങ്ക് ഓഹരി രാവിലെ രണ്ടു ശതമാനത്തിലധികം ഉയര്‍ന്നു. ബാങ്കിന്റെ വായ്പകള്‍ 29 ശതമാനം വര്‍ധിച്ചു.

സൗത്ത് ഇന്ത്യന്‍ ബാങ്ക് ഓഹരി ഒരു ശതമാനത്തിലധികം ഉയര്‍ന്നു. ബാങ്കിലെ നിക്ഷേപങ്ങള്‍ 9.7 ശതമാനം വര്‍ധിച്ചപ്പോള്‍ വായ്പ 8.9 ശതമാനം മാത്രമാണു കൂടിയത്. രണ്ടാം പാദത്തിലെ വിറ്റുവരവ് ഗണ്യമായി വര്‍ധിപ്പിച്ച വി മാര്‍ട്ട് റീട്ടെയില്‍ രാവിലെ എട്ടു ശതമാനം കുതിച്ചു.

പ്രതിരോധ ഓഹരികള്‍ ഇന്നു മികച്ച നേട്ടത്തിലായി. നിഫ്റ്റി ഡിഫന്‍സ് സൂചിക 1.45 ശതമാനം വരെ ഉയര്‍ന്നു. ഡാറ്റാ പാറ്റേണ്‍സ് 4.62ഉം സോളര്‍ ഇന്‍ഡസ്ട്രീസ് 3.56ഉം അസ്ട്ര മൈക്രോ 2.8ഉം പരസ് 2.5ഉം ശതമാനം കയറി.

പ്രതിരോധ ഓഹരിയായ പിടിസി ഇന്‍ഡസ്ട്രീസിന്റെ റിട്ടേണ്‍ ഓണ്‍ ഇക്വിറ്റി 2028-ഓടെ 30 ശതമാനം ആയി വര്‍ധിക്കുമെന്നു ഗോള്‍ഡ്മാന്‍ സാക്‌സ് വിലയിരുത്തി. 58 ശതമാനം വര്‍ധനയോടെ 24,725 രൂപയാണ് ഓഹരിക്കു നിര്‍ണയിച്ച ലക്ഷ്യവില. മൂലധന നിക്ഷേപം കുറയുന്നതോടെ അസ്ട്ര മൈക്രോവേവ് ഓഹരിക്കു ലാഭമാര്‍ജിന്‍ വര്‍ധിക്കും. 45 ശതമാനം നേട്ടത്തോടെ ഓഹരി 1455 രൂപയില്‍ എത്തുമെന്നു ഗോള്‍ഡ്മാന്‍ സാക്‌സ് വിലയിരുത്തി.

മറ്റു പ്രതിരോധ കമ്പനികള്‍ക്കു ഗോള്‍ഡ്മാന്‍ സാക്‌സ് നല്‍കുന്ന ലക്ഷ്യവില ഇങ്ങനെ: സോളര്‍ ഇന്‍ഡസ്ട്രീസ് 18,215 രൂപ (+36%). ഡാറ്റാ പാറ്റേണ്‍സ് 3,640 രൂപ (+38%). ആസാദ് എന്‍ജിനിയറിംഗ് 2,055 രൂപ (+28%). ഭാരത് ഇലക്ട്രോണിക്‌സ് 455 രൂപ (+12%). എച്ച്എഎല്‍ 5,255 രൂപ (+9%). ഭാരത് ഡൈനാമിക്‌സ് 1,375 രൂപ (+11%).

രൂപ ഇന്നു നാമമാത്ര നേട്ടത്തോടെ വ്യാപാരം തുടങ്ങി. ഡോളര്‍ ഒരു പൈസ താഴ്ന്ന് 88.68 രൂപയില്‍ ഓപ്പണ്‍ ചെയ്തു. പിന്നീട് 88.76 രൂപയായി.

സ്വര്‍ണം ലോകവിപണിയില്‍ ഇടിവ് തുടരുകയാണ്. രാവിലെ 0.35 ശതമാനം താഴ്ന്ന് ഔണ്‍സിന് 3,831 ഡോളറില്‍ എത്തി. കേരളത്തില്‍ 22 കാരറ്റ് സ്വര്‍ണം പവന് 480 രൂപ കുറഞ്ഞ് 86,560 രൂപയായി.

ക്രൂഡ് ഓയില്‍ താഴ്ന്ന നിലയില്‍ നിന്ന് അല്‍പം കയറി. ബ്രെന്റ് ഇനം ക്രൂഡ് ഓയില്‍ വീപ്പയ്ക്ക് 64.11 ഡോളറില്‍ നിന്ന് 64.43 ഡോളറിലേക്ക് ഉയര്‍ന്നു.