വിപണി വീണ്ടും മുന്നേറ്റത്തിൽ; കൊച്ചിൻ ഷിപ്പ്‌യാർഡ്, ഓല ഇലക്ട്രിക്, ബജാജ് ഓട്ടോ നേട്ടത്തില്‍, സ്റ്റെർലൈറ്റ് ടെക്നോളജീസ് ഇടിവില്‍

ചെറിയ നേട്ടത്തോടെ വ്യാപാരം തുടങ്ങിയ വിപണി താമസിയാതെ മികച്ച മുന്നേറ്റത്തിൽ എത്തി. നിഫ്റ്റി 24,500 നും സെൻസെക്സ് 80,150 നും മുകളിൽ എത്തി.

മിഡ് ക്യാപ്, സ്മോൾ ക്യാപ് ഓഹരികൾ നല്ല കൃതിപ്പിലായി. മുഖ്യസൂചികകൾ അര ശതമാനം ഉയർന്നപ്പോൾ മിഡ് ക്യാപ് 100 ഉം സ്മോൾ ക്യാപ് 100 ഉം ഒരു ശതമാനത്തിനു മുകളിലായിരുന്നു.

ഐടി ഓഹരികൾ ഇന്നു മികച്ച മുന്നേറ്റം നടത്തി. നിഫ്റ്റി ഐടി സൂചിക 1.77 ശതമാനം ഉയർന്നു. മിഡ് ക്യാപ് ഐടി ഓഹരികളും ലാർജ് ക്യാപ് ഓഹരികളും രണ്ടു ശതമാനത്തോളം കയറി.

കൺസ്യൂമർ ഡ്യൂറബിൾസ്, മെറ്റൽ, ബാങ്ക്, ധനകാര്യ മേഖലകളും മികച്ച നേട്ടം ഉണ്ടാക്കി.

ഓല ഇലക്ട്രിക് ഓഹരി രാവിലെ ഏഴു ശതമാനം കുതിച്ചു. ഒരാഴ്ച കൊണ്ട് ഓഹരി 23 ശതമാനം ഉയർന്നു. ജിഎസ്ടി ഇളവ് പ്രതീക്ഷയാണ് പ്രധാന കാരണം.

കൊച്ചിൻ ഷിപ്പ് യാർഡ് രാവിലെ രണ്ടു ശതമാനത്തിലധികം ഉയർന്നു. ഗാർഡൻ റീച്ച് അഞ്ചു ശതമാനം കുതിച്ചു.

സെമികണ്ടക്ടർ ബിസിനസിൽ 1500 കോടി രൂപ വരുമാനം പ്രതീക്ഷിക്കുന്ന കേയ്ൻസ് ടെക്നോളജീസ് അഞ്ചു ശതമാനം ഉയർന്നു.

മധ്യപ്രദേശിൽ 12,000 കോടി രൂപയുടെ 1600 മെഗാവാട്ട് താപവൈദ്യുത നിലയം സ്ഥാപിക്കാൻ ടൊറൻ്റ് പവറിനു കാർ ലഭിച്ചു. ഓഹരി നാലു ശതമാനം വരെ ഉയർന്നു.

യുകെയിലെ കംഫർട്ട് ക്ലിക്ക് എന്ന വിറ്റാമിൻ-മിനറൽ സപ്ലിമെൻ്റ് കമ്പനിയെ സൈഡസ് വെൽനെസ് വാങ്ങി. ഓഹരി അഞ്ചു ശതമാനം കുതിച്ചു. കമ്പനിയുടെ വിദേശത്തു നടത്തുന്ന ആദ്യ വാങ്ങലാണിത്.

ട്രാക്ടർ വിൽപനയിലെ കുതിപ്പ് എസ്കോർട്സ് കുബോട്ടയെ രണ്ടു ശതമാനത്തിലധികം ഉയർത്തി.

ബജാജ് ഓട്ടോയുടെ ഓഗസ്റ്റിലെ മൊത്തം വാഹന വിൽപന അഞ്ചു ശതമാനം വർധിച്ചു. കയറ്റുമതിയിലെ 22 ശതമാനം കുതിപ്പാണു നേട്ടത്തിനു സഹായിച്ചത്. ആഭ്യന്തര വിപണിയിലെ വിൽപന അഞ്ചു ശതമാനം ഇടിഞ്ഞു. ഓഹരി രണ്ടു ശതമാനത്തോളം കയറി.

സ്റ്റെർലൈറ്റ് ടെക്നോളജീസിനെതിരേ അമേരിക്കൻ കോടതിയിൽ 9.65 കോടി ഡോളറിൻ്റെ നഷ്ടപരിഹാര കേസ് സജീവമായി. ഓഹരി ഇന്നു രാവിലെ എട്ടു ശതമാനം ഇടിഞ്ഞു. കഴിഞ്ഞ 10 ദിവസം കൊണ്ട് ഓഹരി 17 ശതമാനം താഴ്ന്നു.

രൂപ ഇന്നും ദുർബലമായി വ്യാപാരം തുടങ്ങി. ഡോളർ രണ്ടു പൈസ കയറി 88.22 രൂപയിൽ ഓപ്പൺ ചെയ്തു. 88.24 രൂപയിൽ എത്തിയ ശേഷം വില ചാഞ്ചാടി.

സ്വർണം ലോകവിപണിയിൽ 0.80 ശതമാനം ഉയർന്ന് ഔൺസിന് 3475 ഡോളറിൽ എത്തി. കേരളത്തിൽ 22 കാരറ്റ് സ്വർണം പവന് 680 രൂപ ഉയർന്ന് 77,640 രൂപ എന്ന റെക്കോർഡ് കുറിച്ചു.

വെള്ളിവില രാജ്യാന്തര വിപണിയിൽ ഔൺസിന് 40.40 ഡോളറിനു മുകളിലായി.

ക്രൂഡ് ഓയിൽ വില താഴ്ന്ന ശേഷം ചാഞ്ചാടുകയാണ്. ബ്രെൻ്റ് ഇനം ബാരലിന് 67.21 ഡോളറിലാണ്.

_{Stock market midday update on 1 September 2025.}