രാവിലെ അൽപം താഴ്ന്നു വ്യാപാരം തുടങ്ങിയ വിപണി പിന്നീടു മികച്ച നേട്ടത്തിലേക്കു മാറി. റിയൽറ്റി ഒഴികെ എല്ലാ മേഖലകളും കയറ്റത്തിലാണ്. നിഫ്റ്റി 24,700 നു മുകളിൽ കടന്നു. സെൻസെക്സ് 81,000 നു തൊട്ടടുത്ത് എത്തിയിട്ടു താഴ്ന്നു.
ഐടി, ഓട്ടോ, ഓയിൽ -ഗ്യാസ് മേഖലകൾ മുന്നേറ്റത്തിനു നേതൃത്വം നൽകി.
മിഡ് ക്യാപ്, സ്മോൾ ക്യാപ് സൂചികകൾ മുഖ്യ സൂചികകളെ അപേക്ഷിച്ചു സാവധാനമാണു കയറുന്നത്.
ഹിൻഡാൽകോ ഓഹരിയെ കൊട്ടക് ഇൻസ്റ്റിറ്റ്യൂഷണൽ സെക്യൂരിറ്റീസ് വാങ്ങൽ റേറ്റിംഗിൽ നിന്ന് കുറയ്ക്കൽ റേറ്റിംഗിലേക്കു മാറ്റി ലക്ഷ്യവില 735 രൂപയിൽ നിന്ന് 705 രൂപയായി താഴ്ത്തി. ഓഹരി രണ്ടു ശതമാനം താഴ്ന്നിട്ടു നഷ്ടം കുറച്ചു. അമേരിക്കൻ തീരുവയുടെ പേരിലാണ് ഓഹരിയുടെ റേറ്റിംഗ് താഴ്ത്തിയത്.
ലാഭവും ലാഭമാർജിനും ഗണ്യമായി വർധിപ്പിച്ച തിലക് നഗർ ഇൻഡസ്ട്രീസ് രാവിലെ എട്ടു ശതമാനം ഉയർന്നു.
മികച്ച റിസൽട്ട് അപെക്സ് ഫ്രോസൺ ഫുഡ്സ് ഓഹരിയെ 12 ശതമാനം ഉയർത്തി.
ലാഭവും മാർജിനും കുറഞ്ഞതു പ്രാജ് ഇൻഡസ്ട്രീസിനെ ഒൻപതു ശതമാനം താഴ്ത്തി. വരുമാനം എട്ടു ശതമാനം കുറഞ്ഞപ്പോൾ പ്രാജിന് ഒന്നാം പാദ അറ്റാദായം 94 ശതമാനം ഇടിഞ്ഞു.
ഇന്നലെയും മുൻ ദിവസവും താഴ്ചയിലായ പിജി ഇലക്ട്രോപ്ലാസ്റ്റ് ഓഹരി ഇന്ന് ഉയർന്നു. ഇന്നലെ എട്ടു ശതമാനം ഇടിഞ്ഞ വോൾട്ടാസ് ഇന്നു രാവിലെയും ആഴ്ചയിലാണ്.
പ്രതിരോധ ഓഹരികൾ ഇന്നു താഴ്ചയിലായി. ബെൽ, എച്ച്എഎൽ, ബിഡിഎൽ, മസഗോൺ ഡോക്ക്, ഗാർഡൻ റീച്ച്, പരസ് ഡിഫൻസ്, ഡാറ്റാ പാറ്റേൺസ് തുടങ്ങിയവ താഴ്ന്നു. കൊച്ചിൻ ഷിപ്പ് യാർഡ് നേരിയ കയറ്റത്തിലാണ്.
ദുർബലമായ ഒന്നാം പാദ റിസൽട്ട് അസ്ട്രാൽ പോളി ഓഹരിയെ ഏഴു ശതമാനം താഴ്ത്തി. കമ്പനിയുടെ ലാഭവും ലാഭമാർജിനും ഗണ്യമായി താഴ്ന്നു.
രൂപ ഇന്നു കൂടുതൽ ദുർബലമായി. ഡോളർ നാലു പൈസ കൂടി 87.70 രൂപയിൽ ഓപ്പൺ ചെയ്തു. പിന്നീട് 87.65 രൂപയിലേക്കു താഴ്ന്നു.. ഇന്നലെ വ്യാപാരത്തിനിടെ ഡോളർ 87.75 രൂപ വരെ കയറിയിരുന്നു.
സ്വർണം ലോകവിപണിയിൽ ഔൺസിന് 3350 ഡോളറിലാണ്. കേരളത്തിൽ 22 കാരറ്റ് സ്വർണം പവന് 640 രൂപ ഇടിഞ്ഞ് 74,360 രൂപയിൽ എത്തി.
ക്രൂഡ് ഓയിൽ വില അൽപാൽപം കയറുകയാണ്. ബ്രെൻ്റ് ഇനം വീപ്പയ്ക്ക് 66.86 ഡോളറിൽ എത്തി.
Stock market midday update on 12 august 2025.
Read DhanamOnline in English
Subscribe to Dhanam Magazine
