വിപണി ആവേശത്തോടെ വ്യാപാരം തുടങ്ങി, ഗണ്യമായി ഉയർന്നു, പിന്നീട് നേട്ടം കുറച്ചു.
നിഫ്റ്റി 26,038 ഉം സെൻസെക്സ് 85,282 ഉം എത്തിയ ശേഷം താഴ്ന്നു. 0.65 ശതമാനത്തിനടുത്തു കയറിയ ശേഷം മിഡ് ക്യാപ്, സ്മോൾ ക്യാപ് സൂചികകളും ഗണ്യമായി താഴ്ന്നു.
അമേരിക്കൻ വിപണിയിൽ ടെക്നോളജി ഓഹരികൾ ഇന്നലെ താഴ്ന്നതും ഇന്നു ഫ്യൂച്ചേഴ്സിൽ താഴുന്നതും ഐടി ഓഹരികളെ താഴ്ത്തി. ഐടി സൂചിക രാവിലെ 0.40 ശതമാനം താഴെയായി.
എഫ്എംസിജി കമ്പനികളും ഇടിഞ്ഞു. എന്നാൽ മെറ്റൽ, ഓട്ടോ, കൺസ്യൂമർ ഡ്യൂറബിൾസ് മേഖലകൾ മികച്ച നേട്ടം ഉണ്ടാക്കി.
വെള്ളിവില ദിവസേന റെക്കോർഡ് കുറിച്ചു മുന്നേറുന്ന സാഹചര്യത്തിൽ ഹിന്ദുസ്ഥാൻ സിങ്ക് ഓഹരിയും ഉയരുകയാണ്. ഇന്ന് ആ ഓഹരി നാലു ശതമാനം കയറി. വെള്ളിവില ഈ വർഷം ഇതുവരെ 122 ശതമാനം വർധിച്ചിട്ടുണ്ട്.
രാജ്യാന്തര വിപണിയിൽ ചെമ്പുവിലയും റെക്കോർഡ് കുറിച്ചു. ടണ്ണിന് 11,800 ഡോളർ ആയി വില. വേദാന്ത, ഹിൻഡാൽകോ, ഹിന്ദുസ്ഥാൻ കോപ്പർ തുടങ്ങിയവ നാലു ശതമാനം വരെ ഉയർന്നു.
സ്റ്റീൽ കമ്പനികളും കയറ്റത്തിലാണ്. ടാറ്റാ സ്റ്റീൽ, ജെഎസ്ഡബ്ല്യു സ്റ്റീൽ, ജിൻഡൽ സ്റ്റീൽ, ജിൻഡൽ സ്റ്റെയിൻലെസ്, സെയിൽ തുടങ്ങിയവ രണ്ടു ശതമാനത്തോളം നേട്ടത്തിലായി.
എൽ ആൻഡ് ടി യുടെ റേറ്റിംഗ് കൂട്ടിയ ഗോൾഡ്മാൻ സാക്സ് അതിനെ വാങ്ങൽ പട്ടികയിൽ പെടുത്തി. ലക്ഷ്യവില 5000 രൂപയാക്കി. ഓഹരി മൂന്നു ശതമാനത്തോളം കയറി.
ബ്രോക്കറേജുകൾ നല്ല ശിപാർശ നൽകിയ തെർമാക്സ് ഓഹരി അഞ്ചു ശതമാനത്തോളം ഉയർന്നു.
രൂപ ഇന്നും ദുർബലമായി. രാവിലെ അഞ്ചു പൈസ കയറി 90.42 രൂപയിൽ ഡോളർ ഓപ്പൺ ചെയ്തു. പിന്നീട് 90.56 രൂപയിലേക്കു കയറി റെക്കോർഡ് കുറിച്ചു. റിസർവ് ബാങ്ക് ഇടപെട്ട ശേഷം ഡോളർ താഴ്ന്നു 90.35 രൂപ വരെ എത്തി.
സ്വർണം ലോക വിപണിയിൽ അൽപം താഴ്ന്നു. രാവിലെ 0.30 ശതമാനം കുറഞ്ഞ് 4270 ഡോളറിൽ എത്തി. കേരളത്തിൽ 22 കാരറ്റ് സ്വർണം പവന് 1400 രൂപ വർധിച്ച് 97,280 രൂപ ആയി. ഒക്ടോബർ 17, 20 തീയതികളിൽ എത്തിയ 97,360 രൂപയാണു പവൻ്റെ റെക്കോർഡ് വില.
ക്രൂഡ് ഓയിൽ വില അൽപം ഉയർന്നു. ബ്രെൻ്റ് ഇനം വീപ്പയ്ക്ക് 44 സെൻ്റ് വർധിച്ച് 61.72 ഡോളറിൽ എത്തി.
Stock market midday update on 12 december 2025.
Read DhanamOnline in English
Subscribe to Dhanam Magazine
