വിപണി ഉയർന്നിട്ടു ചാഞ്ചാട്ടം; സി.എസ്.ബി ബാങ്ക്, എച്ച്.പി.സി.എല്‍, വേദാന്ത നഷ്ടത്തില്‍, മുന്നേറ്റവുമായി മുത്തൂറ്റ് ഫിനാൻസ്

ഇന്നു രാവിലെ ചെറിയ നേട്ടത്തിൽ വ്യാപാരം തുടങ്ങിയ വിപണി പിന്നീടു നേട്ടം വർധിപ്പിച്ച ശേഷം താഴ്ന്നു ചാഞ്ചാട്ടത്തിലായി.

ഐടി, ബാങ്ക്, ധനകാര്യ, കൺസ്യൂമർ ഡ്യൂറബിൾസ്, ഫാര്‍മ ഓഹരികള്‍ ഉയര്‍ന്നു. മെറ്റൽ, റിയൽറ്റി, എഫ്എംസിജി, ഹെൽത്ത്കെയർ, ഓയിൽ - ഗ്യാസ്, ഓട്ടോ തുടങ്ങിയവ താഴ്ചയിലാണ്. മിഡ് ക്യാപ്, സ്മോൾ ക്യാപ് സൂചികകൾ താഴ്ന്നു.

പ്രതീക്ഷയേക്കാൾ വളരെ മികച്ച ഒന്നാം പാദ റിസൽട്ടിനെ തുടർന്നു മുത്തൂറ്റ് ഫിനാൻസ് ഓഹരി 11 ശതമാനം ഉയർന്നു. കമ്പനിയുടെ അറ്റാദായ മാർജിൻ 12.15 ശതമാനമായി ഉയർത്തിയപ്പോൾ അറ്റ പലിശ വരുമാനം 50.6 ശതമാനം വർധിച്ചു. അറ്റാദായം 89.6 ശതമാനം കുതിച്ച് 2046 കോടി രൂപ എന്ന റെക്കോർഡ് കുറിച്ചു. ബിസിനസ്സിൽ 20 ശതമാനം വളർച്ചയ്ക്ക് അനുകൂലമായ സമയമാണിതെന്നു മാനേജ്മെൻ്റ് കരുതുന്നു. എങ്കിലും 15 ശതമാനം വളർച്ച എന്ന മാർഗനിർദ്ദേശം മാറ്റിയില്ല. സ്വർണപ്പണയ വായ്പയ്ക്കു ഡിമാൻഡ് വർധിക്കുകയാണ്. മണപ്പുറം ഫിനാൻസ് 3.85 ശതമാനം ഉയർന്നു.

ബിസിനസ് വളർച്ച മികച്ചതായെങ്കിലും ആസ്തി നിലവാരവും പലിശ മാർജിനും കുറവായ സിഎസ്ബി ബാങ്ക് ഓഹരി ഇന്നു രാവിലെ ഒൻപതു ശതമാനം വരെ ഇടിഞ്ഞു. ഇന്നലെയും ഓഹരി താഴ്ചയിലായിരുന്നു.

റിലയൻസ് ഇൻഡസ്ടീസും എച്ച്പിസിഎലും ഇന്ന് എക്സ് ഡിവിഡൻഡ് ആയതോടെ ഓഹരിവില താഴ്ന്നു. റിലയൻസ് ഒരു ശതമാനത്തിൽ താഴെ മാത്രം താഴ്ന്നപ്പോൾ എച്ച്പിസിഎൽ നാലു ശതമാനത്തോളം താഴ്ന്നു.

മികച്ച റിസൽട്ടിനെ തുടർന്നു ഫൈസർ ലിമിറ്റഡ് ഓഹരി 6.5 ശതമാനം കുതിച്ചു.

കൊച്ചിൻ ഷിപ്പ് യാർഡ് നേട്ടത്തിൽ വ്യാപാരം തുടങ്ങിയിട്ട് അര ശതമാനം നഷ്ടത്തിലേക്കു മാറി. ഗാർഡൻ റീച്ച് ഷിപ്പ് ബിൽഡേഴ്സ് 3.2ഉം മസഗോൺ ഡോക്ക് 0.60 ഉം ശതമാനം താഴ്ന്നു. ഭാരത് ഇലക്ട്രോണിക്സും ഹിന്ദുസ്ഥാൻ ഏറോനാേട്ടിക്സും ഇന്നു താഴ്ചയിലാണ്. ഭാരത് ഡൈനാമിക്സ് കയറ്റം തുടർന്നു.

മികച്ച റിസൽട്ടിനെ തുടർന്ന് ഇന്നലെ നല്ല നേട്ടം ഉണ്ടാക്കിയ എഫ്എസിടി ഇന്നു രാവിലെ 1.3 ശതമാനം താഴ്ന്നു.

147 രൂപയ്ക്ക് ഐപിഒ നടത്തിയ ജെഎസ്ഡബ്ല്യു സിമൻ്റ് മൂന്നു ശതമാനം ഉയർന്നു 153 രൂപയിൽ ലിസ്റ്റ് ചെയ്തു.

മെറ്റൽ ഓഹരികൾ ഇന്നു നഷ്ടത്തിലാണ്. വേദാന്ത, ഹിൻഡാൽകോ, ടാറ്റാ സ്റ്റീൽ, സെയിൽ, ജെഎസ്ഡബ്ല്യു സ്റ്റീൽ തുടങ്ങിയവ ഗണ്യമായി താഴ്ന്നു.

രൂപ ഇന്നു ചെറിയ നഷ്ടത്തിൽ വ്യാപാരം തുടങ്ങി. ഇന്നലെ 87.44 രൂപയിൽ ക്ലോസ് ചെയ്ത ഡോളർ 87.47 രൂപയിൽ ഓപ്പൺ ചെയ്തു. പിന്നീടു രൂപ കരുത്താർജിക്കുകയും ഡോളർ 87.37 രൂപയിലേക്കു താഴുകയും ചെയ്തു.

സ്വർണം ലോകവിപണിയിൽ ചാഞ്ചാട്ടമാണ്. രാവിലെ ഔൺസിന് 3359 ഡോളറിലേക്കു സ്വർണം താഴ്ന്നു. കേരളത്തിൽ 22 കാരറ്റ് സ്വർണം വിലമാറ്റമില്ലാതെ പവന് 74,320 രൂപയിൽ തുടർന്നു.

ക്രൂഡ് ഓയിൽ വില കയറിയിട്ടു സാവധാനം കുറയുകയാണ്. ബ്രെൻ്റ് ഇനം 65.92 ഡോളറിലേക്ക് ഉയർന്ന ശേഷം 65.86 ഡോളർ ആയി.

_{Stock market midday update on 14 august 2025.}