വിപണി മികച്ച മുന്നേറ്റത്തിൽ; പെർസിസ്റ്റൻ്റ് സിസ്റ്റംസ്, ഐസിഐസിഐ ലൊംബാർഡ് നേട്ടത്തില്‍, ടെക് മഹീന്ദ്ര ഇടിവില്‍

ഇന്ത്യൻ വിപണി രാവിലെ നേട്ടത്തോടെ വ്യാപാരം തുടങ്ങിയിട്ടു കൂടുതൽ ഉയർന്നു. വ്യാപാരം ഒരു മണിക്കൂർ എത്തും മുൻപ് നിഫ്റ്റി 25,250 നും സെൻസെക്സ് 82,400 നും മുകളിൽ കയറി. പിന്നീട് അൽപം താഴ്ന്നു.

മിഡ് ക്യാപ്, സ്മോൾ ക്യാപ് ഓഹരികളും മുന്നേറ്റത്തിലാണ്.

മീഡിയ ഒഴികെ എല്ലാ മേഖലകളും രാവിലെ ഉയർന്നു നീങ്ങി. റിയൽറ്റിയും മെറ്റലും മുന്നേറ്റത്തിനു മുന്നിൽ നിന്നു. ഓട്ടോയും ഐടിയും എഫ്എംസിജിയും മികച്ച കയറ്റത്തിലായി.

മികച്ച മുന്നേറ്റം കാണിച്ച രണ്ടാം പാദ റിസൽട്ട് പെർസിസ്റ്റൻ്റ് സിസ്റ്റംസിനെ ആറു ശതമാനം ഉയർത്തി.

തിളക്കം കുറഞ്ഞ റിസൽട്ടിനെ തുടർന്ന് ടെക് മഹീന്ദ്ര ഒന്നര ശതമാനം താഴ്ന്നു. എന്നാൽ നൊമുറ 1670 രൂപയും സിഎൽഎസ്എ 1695 രൂപയും ലക്ഷ്യവില പ്രഖ്യാപിച്ച് ഓഹരിക്കു വാങ്ങൽ ശിപാർശ നൽകി. ജെഫറീസ് 1270 രൂപയേ ലക്ഷ്യവില കണ്ടുള്ളൂ.

മികച്ച നേട്ടം ഉണ്ടാക്കിയ രണ്ടാം പാദ റിസൽട്ടിൽ ഐസിഐസിഐ ലൊംബാർഡ് ആറു ശതമാനം കുതിച്ചു. അതേ സമയം ഐസിഐസിഐ പ്രൂഡൻഷ്യൽ റിസൽട്ടിനെ തുടർന്നു നാലു ശതമാനം ഇടിഞ്ഞു.

22 ശതമാനം വരുമാന വർധനയിൽ 82 ശതമാനം അറ്റാദായ വർധന കാണിച്ച രണ്ടാം പാദ റിസൽട്ടിനെ ഉടർന്നു തൈറോകെയർ ടെക്നോളജീസ് 10 ശതമാനം വരെ ഉയർന്നു. പിന്നീടു നേട്ടം കുറച്ചു.

രൂപ ഇന്നു വലിയ കുതിപ്പോടെ വ്യാപാരം തുടങ്ങി. ഓപ്പണിംഗിൽ 0.61 ശതമാനം ഉയർന്നു. ഡോളർ 54 പൈസ ഇടിഞ്ഞ് 88.26 രൂപയിൽ ഓപ്പൺ ചെയ്തു. പിന്നീട് 88.09 രൂപയിലേക്കു ഡോളർ താഴ്ന്നു. മൊത്തം 0.88 ശതമാനം കയറ്റം. പിന്നീട് 88.31 രൂപയായി ഡോളർ ഉയർന്നു. റിസർവ് ബാങ്ക് വിപണിയിൽ സജീവമായി ഇടപ്പെടുന്നുണ്ട്.

ഡോളർ സൂചിക 98.84 വരെ താഴ്ന്ന സാഹചര്യത്തിലാണ് രൂപയുടെ ശക്തമായ കുതിപ്പ്.

സ്വർണം ലോകവിപണിയിൽ ഉയർന്നു നീങ്ങുന്നു. ഇന്നു രാവിലെ 1.15 ശതമാനം കുതിപ്പോടെ സ്വർണം ഔൺസിന് 4191.50 ഡോളറിൽ എത്തി. കേരളത്തിൽ 22 കാരറ്റ് സ്വർണം പവന് 400 രൂപ കൂടി 94,520 രൂപ എന്ന റെക്കോർഡ് കുറിച്ചു.

വിവിധ രാജ്യങ്ങളുടെ കേന്ദ്ര ബാങ്കുകൾ സ്വർണം വാങ്ങിക്കൂട്ടുന്നതും സ്വർണ ഇടിഎഫുകളിലേക്കു പതിവിലേറെ നിക്ഷേപം എത്തുന്നതും ആണ് വില കൂട്ടുന്ന പ്രധാനഘടകങ്ങൾ. ഈ മാസവും ഡിസംബറിലും അമേരിക്കൻ ഫെഡറൽ റിസർവ് പലിശ കുറയ്ക്കും എന്ന നിഗമനവും വില കൂട്ടാൻ സഹായിക്കുന്നു. അടുത്ത വർഷം ആദ്യവും പലിശ കുറയ്ക്കാൻ സാധ്യത ഉണ്ട്.

വെള്ളിവില ഔൺസിന് 52.11 ഡോളറിൽ എത്തി. ഇന്ത്യയിൽ എംസിഎക്സിൽ വെള്ളി കിലോഗ്രാമിന് 1,60,000 രൂപ കടന്നു.

ക്രൂഡ് ഓയിൽ താഴ്ന്ന നിലയിൽ ചാഞ്ചാടുകയാണ്. ബ്രെൻ്റ് ഇനം വീപ്പയ്ക്ക് 62.11 ഡോളർ വരെ താഴ്ന്നിട്ട് 62.28 വരെ കയറി.

_{Stock market midday update on 15 october 2025.}