യുദ്ധവ്യാപനത്തെ പറ്റിയുള്ള ആശങ്കയിൽ ഇന്ത്യൻ വിപണി ഇടിയുകയാണ്. മുഖ്യ സൂചികകൾ ഇന്നു രാവിലെ ഒരു മണിക്കൂറിനകം 1.35 ശതമാനം വരെ ഇടിഞ്ഞു. വിശാലവിപണിയിൽ രണ്ടര ശതമാനം വരെ ഇടിവുണ്ട്. പിന്നീടു നഷ്ടം അൽപം കുറച്ചു.
നിഫ്റ്റി 24,000 നും സെൻസെക്സ് 80,000 നും താഴെ എത്തി.
ബാങ്ക്, ധനകാര്യ കമ്പനികൾ ഇന്നും താഴ്ചയിലാണ്. രണ്ടു സൂചികകളും രാവിലെ ഒന്നര ശതമാനത്തോളം ഇടിഞ്ഞു. ഐസിഐസിഐ ബാങ്കും എച്ച്ഡിഎഫ്സി ബാങ്കും വീഴ്ചയ്ക്കു നേതൃത്വം നൽകി. മികച്ച റിസൽട്ടിൻ്റെ ബലത്തിൽ യൂണിയൻ ബാങ്ക് ഓഹരി മൂന്നു ശതമാനത്തിലധികം കയറി.
നാവികസേനയുടെ യാനങ്ങൾ നിർമിക്കുന്ന കൊച്ചിൻ ഷിപ്പ് യാർഡ്, മസഗോൺ ഡോക്ക്, ഗാർഡൻ റീച്ച് തുടങ്ങിയവ രണ്ടു ശതമാനം വരെ ഉയർന്നു.
റിയൽറ്റി ഇന്നും വലിയ ക്ഷീണം നേരിട്ടു. റിയൽറ്റി സൂചിക 3.9 ശതമാനം താഴ്ചയിലാണ്. ശോഭ, പ്രസ്റ്റീജ്, പുറവങ്കര, ഗോദ്റെജ്, മാക്രോടെക് തുടങ്ങിയവ നാലര ശതമാനം വരെ താഴ്ന്നു.
എഫ്എംസിജി മേഖലയുടെ ക്ഷീണം തുടരുന്നു. എച്ച് യുഎൽ, ഡാബർ, ഗോദ്റെജ് കൺസ്യൂമർ, നെസ്ലെ, കാേൾഗേറ്റ്, ഐടിസി തുടങ്ങിയവ താഴ്ചയിലായി. എന്നാൽ വിപണിയുടെ നിഗമനത്തേക്കാൾ മികച്ച റിസൽട്ട് പുറത്തുവിട്ട ബ്രിട്ടാനിയ ഉയർന്നു.
ബ്രിട്ടീഷ് മദ്യ ഇറക്കുമതി ദോഷകരമായി ബാധിക്കുമെന്ന വിലയിരുത്തലിൽ മദ്യകമ്പനികൾ - റാഡികോ ഖേയ്തൻ, യുബിഎൽ, യുഎസ്എൽ, വരുൺ ബിവറേജസ് തുടങ്ങിയവ മൂന്നര ശതമാനം വരെ താഴ്ന്നു.
മികച്ച റിസൽട്ട് എൽ ആൻഡ് ടി ഓഹരിയെ നാലു ശതമാനം ഉയർത്തി.
ലാഭം കുതിക്കുകയും ബിസിനസ് ഗണ്യമായി വളരുകയും ചെയ്തിട്ടും എംസിഎക്സ് ഓഹരി ആറു ശതമാനം ഇടിഞ്ഞു.
ഉയർന്ന ലാഭമാർജിനും ബിസിനസ് വളർച്ചയും തുടരാൻ പറ്റും എന്നു കണക്കാക്കുന്ന ടൈറ്റൻ ലിമിറ്റഡ് നാലു ശതമാനത്തിലധികം ഉയർന്നു.
രൂപ ഇന്ന് താഴ്ന്നു തുടങ്ങിയ ശേഷം കയറി. ഡോളർ 10 പൈസ കൂട്ടി 85.81 രൂപയിൽ ഓപ്പൺ ചെയ്തു. താമസിയാതെ 85.61ലേക്കു താഴ്ന്നു. എന്നാൽ പിന്നീട് 85.81 രൂപയിലേക്കു കയറി.
സ്വർണം ലോകവിപണിയിൽ ചാഞ്ചാടുകയാണ്. ഔൺസിന് 3280 ഡോളറിൽ എത്തിയിട്ട് 3305 ഡോളറിലേക്കു കയറി. കേരളത്തിൽ ആഭരണ സ്വർണം പവന് 71,880 രൂപയിൽ നിന്ന് 240 രൂപ കയറി 72,120 രൂപ ആയി. വ്യാഴാഴ്ച ഉച്ചയ്ക്കു ശേഷം പവന് 1160 രൂപ കുറഞ്ഞിരുന്നു.
ക്രൂഡ് ഓയിൽ വില കാര്യമായ മാറ്റമില്ലാതെ തുടർന്നു. ബ്രെൻ്റ് ഇനം ബാരലിന് 63 ഡോളറിലാണ്.
