വിപണിക്ക് സൂക്ഷ്മതയോടെയുള്ള തുടക്കത്തിന് സാധ്യത, ഹ്രസ്വകാല മൂവിംഗ് ആവറേജുകള്‍ നെഗറ്റീവ് പ്രവണതയില്‍; ക്രൂഡ് കയറുന്നു

ഇന്ത്യന്‍ ഓഹരി വിപണി ഇന്ന് സൂക്ഷ്മതയോടെയുള്ള തുടക്കത്തിനാണ് സാധ്യത കാണിക്കുന്നത്. സാങ്കേതികമായി നിഫ്റ്റി ഹ്രസ്വകാല കറക്ഷന്‍ ഘട്ടത്തിലാണ്. 25,900 എന്ന നിലയാണ് തല്‍ക്ഷണ പിന്തുണ. ഈ നില നിലനിര്‍ത്താന്‍ കഴിഞ്ഞാല്‍ ചെറിയ പുൾബാക്ക് ഉണ്ടാകാം. എന്നാല്‍ ഈ പിന്തുണ വ്യക്തമായി തകര്‍ന്നാല്‍ കൂടുതല്‍ കൂടുതൽ വിൽപന സമ്മർദത്തിന് സാധ്യതയുണ്ട്.

വിപണി അവലോകനം

ഉയര്‍ന്ന നിലകളില്‍ ലാഭമെടുത്തതിനെ തുടര്‍ന്ന് കഴിഞ്ഞ സെഷനില്‍ ഇന്ത്യന്‍ ഓഹരി വിപണി മിതമായ നഷ്ടത്തോടെയാണ് ക്ലോസ് ചെയ്തത്. ബിഎസ്ഇ സെന്‍സെക്‌സ് 345.91 പോയിന്റ് (0.41%) ഇടിഞ്ഞ് 84,695.54ലും, നിഫ്റ്റി 50 പോയിന്റ് (0.38%) താഴ്ന്ന് 25,942.10ലും അവസാനിച്ചു.

നിഫ്റ്റി 26,063.35ല്‍ പോസിറ്റീവ് തുടക്കമെടുത്ത് പ്രാരംഭ വ്യാപാരത്തില്‍ 26,106.80 എന്ന ഇന്‍ട്രാഡേ ഉയരം പരീക്ഷിച്ചു. എന്നാല്‍ ഉയര്‍ന്ന നിലകളില്‍ വില്‍പ്പന സമ്മര്‍ദ്ദം ശക്തമായതോടെ സൂചിക 25,920.30 വരെ താഴ്ന്നു. തുടര്‍ന്ന് ദിവസത്തെ താഴ്ന്ന പരിധിക്കടുത്ത് ക്ലോസ് ചെയ്തു. മീഡിയ, എഫ്എംസിജി, പിഎസ്യു ബാങ്കുകള്‍ നേട്ടത്തില്‍ അവസാനിച്ചപ്പോള്‍ ഐടി, റിയല്‍റ്റി, ഓട്ടോ ഓഹരികളില്‍ ശ്രദ്ധേയമായ വില്‍പ്പന ഉണ്ടായി.

സാങ്കേതിക കാഴ്ചപ്പാട്

മൊമെന്റം സൂചികകളും ഹ്രസ്വകാല മൂവിംഗ് ആവറേജും നെഗറ്റീവ് പ്രവണതയാണ് സൂചിപ്പിക്കുന്നത്. 25,900 എന്ന നില ഇന്‍ട്രാഡേ പിന്തുണയായി പ്രവര്‍ത്തിക്കുന്നു. ഇത് വ്യക്തമായി തകര്‍ന്നാല്‍ കൂടുതല്‍ ഇടിവിന് വഴിയൊരുക്കാം. മറുവശത്ത്, 25,980 ആണ് തല്‍ക്ഷണ പ്രതിരോധം. ഈ നിലയ്ക്കുമുകളില്‍ സ്ഥിരതയുള്ള നീക്കം ഉണ്ടായാല്‍ മാത്രമേ പുള്‍ബാക്ക് റാലിക്ക് സാധ്യതയുള്ളൂ.

എഫ്എംസിജി, മെറ്റല്‍, റിയല്‍റ്റി സൂചികകള്‍ ദിനചാര്‍ട്ടുകളില്‍ ശക്തമായ ഘടന നിലനിര്‍ത്തുന്നു. ബാങ്കിംഗ്, ഫിനാന്‍ഷ്യല്‍ സര്‍വീസസ്, ഫാര്‍മ, ഐടി മേഖലകള്‍ ഇപ്പോഴും കറക്ഷന്‍ ഘട്ടത്തിലാണ്; ഓഹരി കേന്ദ്രീകൃതവുമായ സമീപനം ആവശ്യമാണ്.

ബാങ്ക് നിഫ്റ്റി 89.00 പോയിന്റ് (0.13%) നഷ്ടത്തോടെ 58,932.35ലാണ് ക്ലോസ് ചെയ്തത്. ബാങ്കിംഗ് മേഖലയിലെ ദൗര്‍ബല്യം തുടരുമെന്ന സൂചനയാണിത്.

സാങ്കേതികമായി മൊമെന്റം സൂചികകളും ഹ്രസ്വകാല മൂവിങ് അവറേജുകളും നെഗറ്റീവ് പ്രവണത കാണിക്കുന്നു. 58,800 ആണ് തല്‍ക്ഷണ പിന്തുണ; 59,000 പ്രതിരോധം. 58,800ന് താഴേക്ക് തകര്‍ച്ച വന്നാല്‍ ഇടിവ് നീളാന്‍ സാധ്യതയുണ്ട്.

സ്ഥാപന നിക്ഷേപ പ്രവണത

കഴിഞ്ഞ സെഷനില്‍ സ്ഥാപനങ്ങളില്‍ നിന്നുള്ള നിക്ഷേപ പ്രവാഹം സമ്മിശ്രമായിരുന്നു. വിദേശ നിക്ഷേപകര്‍ 2,759.89 കോടി മൂല്യമുള്ള ഓഹരികള്‍ വിറ്റപ്പോള്‍, ആഭ്യന്തര നിക്ഷേപകര്‍ 2,643.85 കോടി മൂല്യമുള്ള വാങ്ങലുകള്‍ നടത്തി. ആഭ്യന്തര നിക്ഷേപങ്ങളുടെ തുടര്‍ച്ച വിപണിയിലെ താഴോട്ടുള്ള അപകടസാധ്യതകള്‍ കുറയ്ക്കാന്‍ സഹായിക്കുന്നു.

യു.എസ് വിപണി

ഡൗ ജോണ്‍സ് ഇന്‍ഡസ്ട്രിയല്‍ അവറേജ് 249.04 പോയിന്റ് താഴ്ന്ന് 48,461.93ലും, നാസ്ഡാക്ക് കോംപോസിറ്റ് 118.75 പോയിന്റ് ഇടിഞ്ഞ് 23,474.35ലും ക്ലോസ് ചെയ്തു.

ഏഷ്യന്‍ വിപണികള്‍

ഇന്ന് രാവിലെ ഏഷ്യന്‍ വിപണികള്‍ പോസിറ്റീവ് തുടക്കമെടുത്തു. ജപ്പാന്റെ നിക്കെയ് 225 62.50 പോയിന്റ് ഉയര്‍ന്ന് 50,420.00നടുത്തും, ഹോങ്കോംഗ് ഹാങ്‌സെങ് സൂചിക 99.50 പോയിന്റ് ഉയര്‍ന്ന് 25,724.50നടുത്തും വ്യാപാരം നടത്തി.

ക്രൂഡ് ഓയില്‍ 61.32 ഡോളറിനരികെ പോസിറ്റീവ് പ്രവണതയോടെ വ്യാപാരം നടത്തി. സ്വര്‍ണത്തിന്റെ ഡോളര്‍വില 4,370ന് സമീപം ഉയര്‍ന്നപ്പോള്‍, വെള്ളിയും നേട്ടം രേഖപ്പെടുത്തി.

യു.എസ് ഡോളര്‍ ഇന്‍ഡക്‌സ് 98.00ന് സമീപം നേരിയ ദൗര്‍ബല്യത്തോടെ വ്യാപാരം നടത്തി. ഇന്ത്യന്‍ രൂപ ഡോളറിനെതിരെ ചെറിയ ശക്തി കാണിച്ച് 89.76ന് സമീപമാണ് വ്യാപാരം നടന്നത്.