വാരാന്ത്യ വിശകലനം: പുതിയ വാരത്തില്‍ സൂചികകളുടെ പ്രകടനം എന്താകും?

നിഫ്റ്റി 17,859.40-ല്‍ ക്ലോസ് ചെയ്തു, 17,775 ലെവലില്‍ താഴെ ട്രേഡ് ചെയ്താല്‍ താഴോട്ടുള്ള ഗതി തുടരാം.

കഴിഞ്ഞ ആഴ്ച നിഫ്റ്റി 18,131.70 ല്‍ നേട്ടത്തോടെ വ്യാപാരം തുടങ്ങി.18,251-ല്‍ ഉയര്‍ന്ന നില പരീക്ഷിച്ചു. തുടര്‍ന്ന് സൂചിക ഇടിഞ്ഞ് 17,795.60 എന്ന താഴ്ന്ന നിലവാരത്തിലെത്തി. ഒടുവില്‍ 245.90 പോയിന്റ് (1.4 ശതമാനം) നഷ്ടത്തോടെ 17,859.40 ല്‍ ക്ലോസ് ചെയ്തു. ഓട്ടോ, എഫ്എംസിജി, ഫാര്‍മ മേഖലകള്‍ നല്ല നേട്ടത്തില്‍ ആഴ്ച അവസാനിപ്പിച്ചു. മറ്റെല്ലാ മേഖലകളും നഷ്ടത്തില്‍ ക്ലോസ് ചെയ്തു. ഐടി, മാധ്യമങ്ങള്‍, ബാങ്കുകള്‍, റിയല്‍ എസ്റ്റേറ്റ് എന്നിവയാണ് ഏറ്റവും കൂടുതല്‍ നഷ്ടം നേരിട്ടത്.

മൊമെന്റം സൂചകങ്ങള്‍ താഴേക്കുള്ള പ്രവണതയെ സൂചിപ്പിക്കുന്നു. സൂചിക അഞ്ച്, പതിനഞ്ച് ആഴ്ചകളിലെ സിംപിള്‍ മൂവിംഗ് ശരാശരികള്‍ക്ക് താഴെ ക്ലോസ് ചെയ്തു.

നിഫ്റ്റി പ്രതിവാര ചാര്‍ട്ടില്‍ കറുത്ത മെഴുകുതിരി രൂപപ്പെടുത്തി. ആഴ്ചയിലെ താഴ്ന്ന നിലയ്ക്കു സമീപം ക്ലോസ് ചെയ്തു. ഇവയെല്ലാം സൂചിപ്പിക്കുന്നത് കൂടുതല്‍ ഇടിവിനുള്ള സാധ്യതയാണ്. താഴെ സൂചികയ്ക്ക് 17,775-ല്‍ ചെറിയ പിന്തുണയുണ്ട്. വരുന്ന ആഴ്ചയില്‍ സൂചിക ഈ നിലവാരത്തിന് താഴെ ക്ലോസ് ചെയ്താല്‍, താഴേക്കുള്ള പ്രവണത തുടരാം. അല്ലെങ്കില്‍, പിന്തുണാ തലത്തില്‍ നിന്ന് ഒരു പുള്‍ബായ്ക്ക് റാലി പ്രതീക്ഷിക്കാം. ഏറ്റവും അടുത്തുള്ള പ്രതിരോധം 18,000 ലെവലിലാണ്.

ബാങ്ക് നിഫ്റ്റി 797.60 പോയിന്റ് നഷ്ടത്തില്‍ 42,188.80 ലെവലില്‍ ക്ലോസ് ചെയ്തു. മൊമെന്റം സൂചകങ്ങള്‍ അല്പം നെഗറ്റീവ് പ്രവണത സൂചിപ്പിക്കുന്നു. പ്രതിവാര ചാര്‍ട്ടില്‍, സൂചിക കറുത്ത മെഴുകുതിരി രൂപപ്പെടുത്തി മുന്‍ ആഴ്ചയിലെ ക്ലോസിംഗ് ലെവലിന് താഴെ ക്ലോസ് ചെയ്തു. സൂചികയ്ക്ക് 41,500-ല്‍ പിന്തുണയുണ്ട്. ഈ നിലയ്ക്ക് താഴെയായി സൂചിക ക്ലോസ് ചെയ്യുകയാണെങ്കില്‍, മധ്യകാല ട്രെന്‍ഡ് താഴേക്ക് തിരിയാം. അല്ലെങ്കില്‍, ഏതാനും ആഴ്ചകള്‍ക്കുള്ളില്‍ സൂചിക 41,500 -43,600 ലെവലുകളില്‍ സമാഹരിക്കാം. (പ്രതിവാര ചാര്‍ട്ട് അടിസ്ഥാനമാക്കിയുള്ള വിശകലനം)