അനന്യ ബിർള നേതൃത്വം നൽകുന്ന മൈക്രോഫിനാൻസ് സ്ഥാപനമായ സ്വതന്ത്ര മൈക്രോഫിൻ (Svatantra Microfin), 3,000 കോടി രൂപ സമാഹരിക്കാനായി ഓഹരി വിപണിയിലേക്ക് (IPO) പ്രവേശിക്കുന്നു. ഇതിനായുള്ള പ്രാഥമിക വിൽപന രേഖകൾ (DRHP) കമ്പനി സെബിക്ക് (SEBI) സമർപ്പിച്ചു. ആദിത്യ ബിർള ഗ്രൂപ്പ് ചെയർമാൻ കുമാർ മംഗലം ബിർളയുടെ മൂത്ത മകളാണ് അനന്യ.
ഈ ഐപിഒയിലൂടെ 1,500 കോടി രൂപയുടെ പുതിയ ഓഹരികളും (Fresh Issue), നിലവിലുള്ള നിക്ഷേപകരായ മൾട്ടിപ്പിൾസ് പ്രൈവറ്റ് ഇക്വിറ്റി ഫണ്ട്, വയോളിസിന ലിമിറ്റഡ് എന്നിവരുടെ 1,500 കോടി രൂപയുടെ ഓഫർ ഫോർ സെയിലും (OFS) ആണ് ലക്ഷ്യമിടുന്നത്. കൂടാതെ, 300 കോടി രൂപ വരെയുള്ള പ്രീ-ഐപിഒ പ്ലേസ്മെന്റിനും കമ്പനി ശ്രമിച്ചേക്കാം. അങ്ങനെയുണ്ടായാൽ പുതിയ ഓഹരികളുടെ അളവിൽ അതിനനുസരിച്ചുള്ള കുറവുണ്ടാകും. ലഭിക്കുന്ന തുക കമ്പനിയുടെ ടയർ-1 മൂലധന അടിത്തറ ശക്തിപ്പെടുത്തുന്നതിനും ബിസിനസ് വിപുലീകരണത്തിനും വായ്പകൾ നൽകുന്നതിനുമായി വിനിയോഗിക്കും.
2011-ൽ ആർബിഐ എൻബിഎഫ്സി-എംഎഫ്ഐ (NBFC-MFI) ലൈസൻസ് അവതരിപ്പിച്ച ശേഷം അത് ആദ്യം ലഭിച്ച സ്ഥാപനമാണിത്. അനന്യ ബിർളയും അവരുടെ സ്ഥാപനമായ ആന്റിമാറ്റർ മീഡിയയും ചേർന്ന് കമ്പനിയുടെ 59.97 ശതമാനം ഓഹരികൾ കൈവശം വെക്കുന്നു. കമ്പനി കൈകാര്യം ചെയ്യുന്ന മൈക്രോഫിനാൻസ് ആസ്തികൾ (AUM) 2024 മാർച്ചിലെ 14,438 കോടി രൂപയിൽ നിന്ന് 2026 മാർച്ചിൽ 21,093 കോടി രൂപയായി വർദ്ധിച്ചു. ഇന്ത്യയിലെ ആകെ മൈക്രോഫിനാൻസ് ആസ്തികളിൽ കമ്പനിയുടെ പങ്ക് 3.26 ശതമാനത്തിൽ നിന്ന് 6.37 ശതമാനമായി ഏകദേശം ഇരട്ടിയായിട്ടുണ്ട്.
ബീഹാർ, ഉത്തർപ്രദേശ് എന്നീ സംസ്ഥാനങ്ങളിലെ ഏറ്റവും വലിയ എൻബിഎഫ്സി-എംഎഫ്ഐ ആണ് നിലവിൽ ഈ കമ്പനി. ചൈതന്യ ഇന്ത്യ ഫിൻ ക്രെഡിറ്റുമായുള്ള ലയനം ദക്ഷിണേന്ത്യയിൽ കമ്പനിയുടെ പ്രവർത്തനം വിപുലമാക്കാൻ സഹായിച്ചു. 2026 മാർച്ചിലെ കണക്കനുസരിച്ച് 20 സംസ്ഥാനങ്ങളിലായി 2,123 ശാഖകളും 42.66 ലക്ഷം ഇടപാടുകാരും കമ്പനിക്കുണ്ട്.
Read DhanamOnline in English
Subscribe to Dhanam Magazine
