ഇന്ത്യ-യു.എസ് വ്യാപാര കരാര് സംബന്ധിച്ച പ്രഖ്യാപനം അനിശ്ചിതത്വത്തില് തുടരുകയാണ്. പരസ്പരം പ്രയോജനകരമായ ബഹുമേഖലാ ഉഭയകക്ഷി വ്യാപാര കരാറിന്റെ ആദ്യ ഘട്ടം അന്തിമമാക്കുന്നതിനായി ഇന്ത്യയും യു.എസും പ്രവർത്തിക്കുന്നുണ്ടെന്നാണ് കഴിഞ്ഞ ദിവസം വിദേശകാര്യ മന്ത്രാലയം വ്യക്തമാക്കിയത്. തത്തുല്യ ഇറക്കുമതി ചുങ്കം (Reciprocal Tariffs) പ്രാബല്യത്തില് വരുമെന്ന് യുഎസ് പ്രസിഡന്റ് ഡൊണള്ഡ് ട്രംപ് നേരത്തെ പ്രഖ്യാപിച്ച ജൂലൈ 9 ന് മുമ്പായി വ്യാപാര കരാറില് എത്താന് സാധിക്കുമെന്ന പ്രതീക്ഷകള് വളരെ കൂടുതലായിരുന്നു.
ഓഗസ്റ്റ് ഒന്നിനുശേഷം യുഎസിലേക്കുള്ള ഇന്ത്യൻ ഇറക്കുമതിയുടെ തീരുവ 26 ശതമാനമായി ഉയരും. ഇന്ത്യയും യുഎസും ഒരു കരാറിലെത്തുമെന്ന് വിദഗ്ദ്ധർ ഇപ്പോഴും ശുഭാപ്തി വിശ്വാസത്തിലാണ്. ഇരു രാജ്യങ്ങളും ആദ്യം ഒരു അടിസ്ഥാന വ്യാപാര കരാറിന് അന്തിമരൂപം നൽകാനുളള സാധ്യതകളാണ് ഉളളത്. അതേസമയം കൂടുതൽ സമഗ്രമായ കരാറിനായുള്ള ചർച്ചകൾ ഒക്ടോബർ അല്ലെങ്കിൽ നവംബർ വരെ തുടരാം. അന്താരാഷ്ട്ര സമ്മര്ദങ്ങള് കാരണം ഇന്ത്യയ്ക്ക് മാത്രമല്ല യുഎസിനും ഒരു കരാർ പ്രധാനമാണെന്നാണ് വിദഗ്ദ്ധരുടെ വിലയിരുത്തല്.
പാലുൽപ്പന്നങ്ങൾ, ജനിതകമാറ്റം വരുത്തിയ (genetically modified) കാര്ഷിക ഉൽപ്പന്നങ്ങള് തുടങ്ങിയവയ്ക്ക് ഇന്ത്യൻ വിപണികളിൽ കൂടുതൽ പ്രവേശനം വേണമെന്ന അമേരിക്കയുടെ നിർബന്ധമാണ് ഒരു പ്രധാന തർക്കവിഷയം. കന്നുകാലി വളര്ത്തല് രാജ്യത്തെ ലക്ഷക്കണക്കിന് ആളുകളുടെ ഉപജീവനമാർഗമാണ്, പാശ്ചാത്യ ലോകത്തെ പോലെ വലിയ വ്യവസായമല്ല. ഇന്ത്യക്ക് ഇക്കാര്യത്തിൽ വിട്ടുവീഴ്ച ചെയ്യാന് സാധിക്കാത്ത സാഹചര്യമാണ് ഉളളത്.
മറ്റ് ഏഷ്യൻ രാജ്യങ്ങളെക്കാള് കുറഞ്ഞ താരിഫ് നിരക്കുകൾക്കായി ഇന്ത്യ സമ്മര്ദം ചെലുത്തുന്നതായും റിപ്പോർട്ടുകളുണ്ട്. റഷ്യയിൽ നിന്ന് എണ്ണ ഇറക്കുമതി ചെയ്യുന്ന രാജ്യങ്ങൾക്കെതിരായ അമേരിക്കയുടെ നിലപാടാണ് വ്യാപാര കരാർ അന്തിമമാക്കുന്നതിൽ കാലതാമസത്തിന് മറ്റൊരു കാരണം. റഷ്യയിൽ നിന്ന് എണ്ണ ഇറക്കുമതി ചെയ്യുന്നത് തുടരുന്ന രാജ്യങ്ങൾക്ക് മേൽ ട്രംപ് ഉയർന്ന തീരുവ ചുമത്താൻ ഉദ്ദേശിക്കുന്നതായി കഴിഞ്ഞ ആഴ്ച യുഎസ് സെനറ്റർ ലിൻഡ്സെ ഗ്രഹാം കർശന മുന്നറിയിപ്പ് നൽകിയിരുന്നു.
കരാറിലെത്താന് വൈകുന്നത് രാജ്യത്തിന്റെ വ്യാപാര കമ്മി വർദ്ധിക്കുമെന്ന ആശങ്കകൾ ഉളളത് വിപണിയെ സമ്മർദ്ദത്തിലാക്കും. ഇത് സമ്പദ്വ്യവസ്ഥയിലും ഇന്ത്യൻ രൂപയിലും അലയൊലികൾ സൃഷ്ടിക്കും.
അതേസമയം, വ്യാപാര കരാറില് എത്തുകയും 26 ശതമാനം പരസ്പര തീരുവ ഒഴിവാക്കുകയും ചെയ്താൽ വിപണി ഗണ്യമായി വീണ്ടെടുക്കാൻ സാധ്യതയുണ്ട്. കൂടാതെ ഇന്ത്യൻ ഓഹരികൾ വിറ്റഴിക്കുന്നതിൽ ശ്രദ്ധ കേന്ദ്രീകരിച്ചിരിക്കുന്ന വിദേശ നിക്ഷേപക സ്ഥാപനങ്ങളെ (FPI) ആകർഷിച്ചേക്കാം. ഉൽപ്പാദനം, സാങ്കേതികവിദ്യ, ആരോഗ്യ സംരക്ഷണം തുടങ്ങിയ മേഖലകളിലേക്ക് ഇടക്കാലത്തേക്കെങ്കിലും എഫ്പിഐ ഒഴുക്ക് വർദ്ധിപ്പിക്കാൻ ഇത് പ്രോത്സാഹിപ്പിക്കും. എന്നാല് ഓഗസ്റ്റ് ഒന്നിനുശേഷം പരസ്പര തീരുവ ചുമത്തിയാൽ വിപണി ഹ്രസ്വകാലത്തേക്കെങ്കിലും ദുർബലമായി തുടരാനുളള സാധ്യതകളാണ് ഉളളത്.
Uncertainty over India-US trade deal raises concerns in stock markets and economic stability.
Read DhanamOnline in English
Subscribe to Dhanam Magazine
